O Maua(Kites) o le Eseta

Sa nonoa faatasi e Colin ni fasi laupapa uumi se lua e fai ai lana maua. Ona ia lio faapona lea o le manoa i fafo o le maua ina ia malosi ai. O le taimi lenei e faaopoopo ai le pepa felanulanuai.

Sa faasino atu e Uncle Ladd i lana lava maua. “Pe sa’o ea la’u faia o lenei mea?”

“Ioe. Ia toso mau le manoa,” o le tala lea a Colin.

“Ma filifili se ie mo le siusiu,” o le tala lea a Aleki, le uso laitiiti o Colin. Sa ia faasino atu i fasi ie o loo i luga o le laulau. “E fesoasoani lena e lele ai.”

Sa faia e Colin ma lona aiga ni maua mo le Aso Maliu(Aso Faraile) . O le Aso Maliu(Aso Faraile) o se aso malolo tele lea i Bermuda. O le aso Faraile a’o lumanai le Eseta. Sa faamanatuina e tagata uma e ala i le o i le matafaga e faalele a latou maua. Sa asiasi atu Uncle Ladd i le aiga o Colin. Na te le’i fausia muamua lava se maua.

“Aisea tou te faalele ai maua i le Aso Maliu(Aso Faraile)?” Na fesili ai Uncle Ladd. Sa ia filifilia se pepa lanumumu ma le lanumoana mo lana maua.

“O maua o loo felelei i le ea e faamanatu mai ai ia i tatou na toetu Iesu Keriso,” o le tala lea a Colin. “Sa toe alu o Ia e faatasi ma le Tama Faalelagi. O lea o le a tatou toetutu uma ai i se aso.”

Sa luelue le ulu o Aleki. “E tagata uma i Bermuda e faalele a latou maua e faamanatu ai.”

“O le a le vaega e te fiafia i ai?” Na fesili ai Uncle Ladd.

Sa filifili e Colin ni pepa lanu. “Ou te fiafia ona e aumaia ai i tatou ia latalata atili atu i le Atua. Ma e mafai ona matou faaaluina le taimi ma aiga ma uo.”

“Ou te fiafia i le toatele o tagata e faamanatu faatasi,” o le tala lea a Aleki.

I le Aso Maliu(Aso Faraile), na o ai Colin ma lona aiga i le matafaga. Sa latou aveina a latou maua, keke i’a, ma pani vevela koluse.

Sa toatele tagata sa i ai i le matafaga. Sa faatumulia le lagi i maua felanulanuai. Sa feula solo e le matagi lauulu o tagata uma, ma sa tutusa le lagi lanumoana ma le lanu o le sami. O se aso lelei tele mo le faalele maua!

Sa latou nonofo i le matafaga e aai. Sa mafanafana keke i’a, ma sa vaivai ia pani vevela satauro. Sa talotalo atu Colin ma Aleki i uo o loo savavali mai.

Ona latou savavali lea ma Uncle Ladd i lalo i le matafaga. Sa uu mau e Colin lana maua. Sa tatau ona tamoe ma taumafai mo ni nai taimi a o le’i pikiina e le matagi le maua ma mau ai i le ea. Sa ia matamata i lana maua felanulanuai o siva i le savili.

“Ua ou fiafia ua toe soifua Iesu,” o le tala lea a Aleki.

Sa sioa atu Colin i lana maua ma ataata. “Ma a’u foi.”

O Ata na tusia e Tatsiana Burgaud