O Le A Ou Toe Vaai Ia Celeste

Sa ou faalagolago i tua i o’u mulivae ma vaai atu i le fanua. O loo i ai se laina o le eleele pogisa i autafa o le fale o le au Johnson lea faatoa ma totoina ai ma Tina ni fugalaau. Sa ou popo le eleele ma mapuea.

“Faafetai mo le fesoasoani e toto mea na,” o le tala lea a Tina.

Ou te tilotilo atu i o’u lima, ufitia i le palapala, ma ou te le fai atu se tala. O loo ou mafaufau ia Celeste Johnson. Celeste, o lē sa masani ona nofo i lenei fale. Celeste, o le sa toetoe lava tutusa tonu lava ona tausaga ma a’u. Celeste, o le na sau faatasi ma a’u i le Peraimeri. Sa ma taaalo faatasi ma o i pati o aso fanau o le tasi ma le isi. O nisi taimi ma te faatuina ai se faleie i lona tuafale ma faafoliga o loo ma tolauapi. O ia o la’u uo sili.

Ua leai nei Celeste. Na maliu o ia i se faalavelave tau taavale i ni nai masina ua mavae. Sa matou fetagisi tele ma lo’u aiga. O Celeste o la matou uo, ma sa matou iloaina o le a matou misia o ia. Sa matou fetagisi ona sa manu’a le tama o Celeste i le faalavelave tau taavale. Sa matou fetagisi ona sa faanoanoa le aiga o Celeste.

Sa ou matuai manao lava e fesoasoani i le aiga o Celeste. Sa ou tuuina atu se manu meataalo i le uso laitiiti o Celeste, o Ella. Sa ou fesoasoani foi i nisi tagata mai le uarota e fai ni meaalofa mo le aiga o Celeste. Sa ou manao ina ia latou iloa o loo alofagia i latou.

Ina ua ou alu i le maliu o Celeste, sa ou nofo latalata i uo mai le lotu. Sa matou usuina le pese e sili ona fiafia i ai Celeste o le Peraimeri, “Faatuatua,” e uiga i le auala e mafai ai ona matou toe nonofo faatasi ma le Atua. Na faamanatu mai ai ia te a’u o le a ou toe vaai ia Celeste. I le fanuatanu, sa ou tuuina ai se fugalaau i luga o le pusamaliu. O tagata uma lava na iloaina Celeste sa faanoanoa lava. Sa matou misia o ia. Ae ina ua ou tatalo ma anapogi, sa faaitiitia lo’u lagona faanoanoa. Na fesoasoani foi le faitauina o tusitusiga paia ma talanoa ma uo mai le lotu.

O le asō, na matou o mai ai e asiasi i le au Johnson e fesoasoani ia i latou e toto ni fugalaau i lo latou fanua. O loo laiti ma eena ia fatui le taimi nei. Ou te le iloa tonu pe faape’ī foliga o le a i ai i le tautotogo, ae e tatau ona aulelei.

Sa vaavaai mai Tina ia te a’u ma fai mai, “E te iloa le mea ou te fiafia i ai i fatu?”

Sa lulu lo’u ulu. Sa sesega le la, ma e tatau ona ou faataupupula e tilotilo atu ia te ia. “O le a?”

“E mamate fugalaau mai nei fatu i le taumalulu, ae e toe foi mai lava i taimi uma i le tautotogo,” o lana tala lea. “Latou te faamanatu mai ia te a’u le toetu. E le mafai ona e vaai i fugalaau pe a pepe, ae e le faapea ai ua leai. E pei lava o Celeste ma i tatou uma pe a tatou feoti. Ona o Iesu Keriso, o le a tatou toetutu uma ai ma toe feola.”

Ou te vaai i faaputuga palapala. O le a tupu a’e fatu, ma tupu a’e, ma tulei ese le palapala. Ou te iloa e oo atu i le tautotogo o le a avea ma fugalaau matagofie, ma ou te iloa o le a ou toe vaai ia Celeste.

Ou te faalagolago atu i le palapala lea e toto ai fatu ma feula atu ai se sogi. “Toe feiloa’i i le tautotogo!” Sa ou musumusu atu ai.

Open PDF

O Ata na tusia e Shawna J. C. Tenney