“O Se Uo Fou,” Uo, Aperila 2025, 36–37.
O Se Uo Fou
Sa iloaina e Teila le lagona o le popole.
O se tala moni mai Kanata.
Sa fesoasoani Teila ia Tina e ave sapalai mo le gaoioiga a le Peraimeri agai i le paka. Sa mafanafana le la i ona foliga, ma sa toe lanu meamata le mutia i le paka. E ese le manaia o le i ai i fafo!
O le tautotogo o se tasi lea o mea na faamanatu atu ai ia te ia e alofa le Tama Faalelagi ia te ia. Sa fiafia Teila e vaavaai mo le alofa o le Atua i mea uma—e pei o se lagi lanumoana po o le vaai atu i ana uo i le gaoioiga a le Peraimeri.
Sa mulimuli atu Teila ia Tina i le mea sa faatulaga ai e isi taitai o le Peraimeri ni taaloga mo tamaiti.
Sa talotalo atu Sister Kingsley ma fai mai, “O le a sau Jane!”
“Lelei tele!” Na fai atu ai Tina.
“O ai Jane?” O le fesili lea a Teila.
“O ia o se teine fou sa ma valaaulia. Matou te faamoemoe e mafai ona e fesoasoani ma isi tamaiti ia te ia ia lagona le taliaina,” o le tala lea a Tina.
Sa lagona e Teila se faapona popole i lona manava. Sa faigata ia te ia ona talanoa i tagata fou. Sa ia manao ia agalelei. Ae faapefea pe a le fiafia le teine fou ia te ia?
E le’i umi, ae taunuu mai tagata uma, e aofia ai ma se teineitiiti e le’i iloa e Teila.
“Susu maia i la matou gaoioiga a le Peraimeri!” O le tala lea a Sister Kingsley. Sa tuu lona lima i luga o le tauau o le teineitiiti fou. “O Jane lenei. O le a faatasi mai o ia ma i tatou i le asō. Matou te faamoemoe e fiafia tagata uma e taaalo faatasi i le paka.”
“E mafai ona tatou taaalo i le tuli?” o le fesili lea a se tasi o tamaiti o le Peraimeri.
“Ioe, faamolemole!” O le ee atu lea a Teila.
Sa matuai fiafia lava o ia! O le tuli o lana taaloga e sili ona fiafia i ai. Sa mili atu Teila ma isi tamaiti i le malae taalo. Ona tu lea o Teila ina ua ia vaai ia Jane o tu na o ia.
Na tuuina atu e le Tama Faalelagi ia te ia lenei aso matagofie ma le faapitoa. Sa manao o ia e fiafia i ai, ma sa manao foi ia fiafia i ai Jane. Sa lagona le gatete o totonu o Teila, ae sa ia manava loloto ma toe savali atu ia Jane.
“Malo. O a’u o Teila.
“Malo.” Sa ataata teisi Jane, ae sa foliga popole o ia.
“Na e taalo muamua i le tuli?” O le fesili lea a Teila.
Na lūlū le ulu o Jane.
Sa iloa e Teila le tulaga o le popole i mea fou.
“E ese le malie!” Na fai mai ai Teila. “O le tagata e ‘pe’ o ia e moeiini ona mata a o taumafai e tape se tasi i luga o le malae taalo. E mafai e isi tagata uma ona taufetuli solo. Ae afai e valaau atu le tagata o loo pe ‘tutu laueleele!’ o lona uiga o soo se tasi o loo i ai pea vae i luga o le eleele o ia lea ua ‘pe.’”
Sa foliga popole pea Jane.
“E te manao e nofo i o’u tafatafa mo sina taimi?” O le fesili lea a Teila.
Sa ataata Jane. “Ioe!”
Sa savavali atu Teila ma Jane i le malae taalo. A o la’ua a’e i le tumutumu, sa faatalofa atu isi tamaiti ia Jane. Sa nofo latalata Jane ia Teila i le taimi muamua, ae e le’i umi ae fesoasoani foi isi tamaiti ia Jane. Mo le vaega o totoe o le gaoioiga a le Peraimeri, sa talanoa ai Teila ma isi tamaiti uma ia Jane. E oo ane i le faaiuga, ua le toe lagona e Teila le popole, ma sa ia mautinoa ua leai foi se popole o Jane.
“E i ai se tasi e manao i se aisa poloka?” Na fai mai ai Tina a o ia tatalaina se kula.
Ina ua uma le tamoe ma le taalo, sa lagona e Teila le fiafia e nonofo faatasi ma ana uo ma malolo. Ina ua alu Jane i le fale, sa faatofa atu Teila ma isi tamaiti ia te ia.
E le’i umi ae na o Teila, lona tina, ma isi taitai. Sa piki i luga e Teila ni pepa a isa poloka ma tuu i totonu o se ato lapisi.
“Ua ou mitamita lava ia te oe,” na fai atu ai Tina. “Sa e faasoa atu ma au uo le alofa o le Tama Faalelagi ia Jane i le asō.”
Sa mafaufau Teila i lena mea. E ui lava sa masani ona ia saili mo auala na faaalia ai e le Tama Faalelagi Lona alofa mo ia, ae o le asō sa ese lava. O le asō, o ia lea na faaalia Lona alofa.
Ata na tusia e Hollie Hibbert