Kakauongo nakon te Tamnei ae Raoiroi

E kaurei matana aika nimatutu Chim. E a roko te wiikente n tokin te tai!

“Te tai n teirake, ke tina rimwi,” e wewete Mom.

E iangoia bwa e kona n reita riki matuuna Chim, te bong aei te bong ni mwaakete. E riai ni buoka Mom ni kabooi amwarake ibukin te wiiki. Ngaia are e a teirake ao e waekoa ni kana ana kaingabong.

E mwaiti bwaai aika e karaoi Mom ibukin Chim ma tarina aika uoman. E rang tabetabe ni mwakuri, ao e aki tau ana tai n tiku n te mweenga. Chim ma tarina a ikotaki ni mwakuri ni karaoi angiin te mwakuri. Chim e kukurei n ibuobuoki.

Ngke e oki Chim ma Mom man te mwakete, Mom e waekoa ni kiitaniia n nako ni mwakuri. Ngke e nako, Chim ma tarina a katauraoia ibukin te Tabati. Chim e kaotinakoi kau, raongibaan, ao kabaraaki ake e na kabonganai nakon te taromauri ningabong. Tarina are ikawai, Robin, e buokia ni katirai ana kabaraaki. Imwiina a karaoa aia katairiki.

Chim e kaitiaka te tabo ni kuuka ngke e oki Mom nakon te mweenga. E rang taraa ni kua.

“Aio am bwai, Mom.” Chim e anganna te boora n amarake ae kabuebue bwa e na kannan.

E wiingare tinana. “Ko rabwa n am ibuobuoki n te bong aei. E rang mata kangkang!”

Te ingabong are imwiina, Chim e utimwaaka ao e katauraoia nakon te taromauri. E ingainga ni kan nooriia raraona n te Moanrinan ao n reiakina rongorongon Iesu Kristo.

“Mom?” e karaurau ni wewete, ni karebwerebwe iaon ana mataroa. “Kona raoniira n taromauri n te bong aei?”

“I aki kona,” e taku Mom. “N na mwakuri ni bwakantaai.”

“E TAMAROA.” E namakina te nanokawaki teutana Chim. E a kan reke teuana te ririki man te tai are e raoniia iai Mom n taromauri. “Buti ma te karaurau ao tekeraoi am bong,” e taku nakoina.

“Kam tauraoi ni mwananga?” tarina are uarereke, Mattew, e titiraki.

“Eng!” E karini ana kau Chim ao e biri n otinako man te mataroa ma tarina ni kaea te bwati.

E namakina te kukurei Chim ngke e rianna n ana kateitei te aro. E kataia n iangoa Iesu Kristo n tain te toa. Ao n te Moanrinan, e kakorakora riki n ongora nakon ana reirei Titita Ortega.

“N te bong aei tina reiakina taekan te Tamnei ae Raoiroi,” e taku Titita Ortega. “Te Tamnei ae Raoiroi e uoti rongorongo nakoira mairoun Tamara are i Karawa. Taraan ae kanga bon te rerio.”

Chim e tara tamnein te rerio are e taua i eta Titita Ortega.

“E mwakuri te rerio ngkana e karekea te tikinoo ao ngkana ko bitia nakon tangina are ti kona n ongo,” e kabwarabwara. “Kona kaetia nakon te tiaeno ae eti bwa kona ongo iai. Ngkana tina ongo iroun te Tamnei ae Raoiroi, ti riai ni kaeta nanora ao ara iango nakon te tiaeno naba ae eti. Ti na kanga ni karaoa anne?”

A bane n iango te koraki. Ngkanne e taku Chim, “Man iriirakin Iesu Kristo ao kawakinan ana tua.”

E moangare Titita Ortega. “Eti anne”

Imwiin te taromauri, e ibuobuoki Chim ni manga karaoa te katairiki. E namakina te aabue inanona ngke e ibuobuoki. E ataia bwa man buokaia ana utu, e kaeta nanona nakon te kawai ae eti n namakina te Tamnei ae Raoiroi.

Ngke e okira te mweenga Mom, Chim e anganna te inga ae bubura. Ngkanne a tataro iaon te amwarake ao a waaki n amwarake.

“Keetinna bwa tera ae I reiakinna n te taromauri n te bong aei,” e taku Chim. E tatangiria n tuanga Mom taekan te Moanrinan.

“Tera?” E titiraki Tinana.

“Ti reiakina taekan te Tamnei ae Raoiroi,” e taku Chim. “Kanga aiaron te rerio. Ngkana ti kawakin tuua, ti kona ni bita nanora nakon te kawai ae eti n ongo Irouna.”

E katoutoua atuuna Tinana. “E rangin n tamaroa anne. Ngaia tera te katoto ni kawakinan tuua?”

E wiingare Chim. “Buoka tinam!” E ngare. “I ltangiriko, Mom.”

Kamataata n te tamnei iroun Uran Duo