Anene ni Karokoa e Maunanako te Roo

“Tain te matu,” e taku Mamá ma te moangare.

E nako Logan nakon ana ruu. E tataro ao a kawakawa nakon ana kainiwene. Ngkanne e wareka te karaki nakoina Mamá. E karaurau ni kamatui matana. Inanon tabeua te tai ao e a matu.

Ma e mii Logan n te mii ae kakamaku. E tiku n ti ngaia n te tabo ae roo. E noora te man ae bubura, kateketeke ae kakamaku ma wiina ae bubura. E bekorara nakoina. Ngkanne e a waaki ni biri ni kainetia!

E kataia ni birinako Logan. Ma e marannako ao e bwaka! E a tabe n roko te man ae kakamaku man bubura ni karokoa—

E a uti Logan ao e a tekateka iaon ana kainiwene. E kaoi ranin matana ao e nooria bwa e bon roo naba tinaniku.

E tangiria n taetae nakoia ana karo ibukin miina. Ma e aki kan kiitana ana kainiwene. Te rootongitong e anganna te namakin bwa te man ae kakamaku e karaba n te tabo teuana. Tabo nako ake a roo a taraa ni kakamaku. Te kamea are e kaukau i tinaniku kaanga ai aron te man ae kakamaku are e bekorara.

E katika te rabuna nakon bairina Logan. E rang ni maaku ni mwaing.

E tangiria ni manga matu. Ma ni katoa tai are e kamatui matana, e noora ubun te man ae kakamaku ae un ma wiina aika kakang. E aki toki n tara te nuu ae kakamaku.

Ngkanne e a noora te tamnei iaon te taibora irarikin ana kainiwene. Bon tamneina, ma tarina uoman, Papá, ao Mamá i tinanikun te tembora i Monterrey, Mexico. A taraa ni kukurei.

N te tai ae tawe taekan kunana ae tatangiria n te Moanrinan e kaoti n ana iango. “I love to see the temple,” e waaki n anene ni karaurau Logan. “N na nako Ikekei n te taina. N namakina te Tamnei ae Raoiroi, n ongora ao n tataro.”*

Ngke e anene, e iangoia Logan te bong are n te tembora ma ana utu. E a tia nrang n namakina te rau. Ibukin te tembora, e kona n ikotaki ma ana utu n akea tokina.

E a aki kona n ongo kaukaun te kamea Logan iaon riki bwanana. E kamatui matana ao e reitinako n anene. “Ngkai ngai natin te Atua, I ata te koaua aei. Te utu akea tokina.” E namakina te rau inanona are e a moangare iai. E ataia bwa akea te man ae kakamaku.

Te ruu e rotongitong man kakamaku. Ma ngkai e a rau, te tabo ae mano. E raranako Logan nako aon uningana ao e matunako ma te rau.

Ngke e a uti, e a riringa tinaniku. E teiraki ao e tara otan taai are e kaota tamneina n te tembora. E anene inanona te kuna are e tatangiria ngkai e katauraoia n nako n taromauri.

Iaon kawaia nakon te taromauri, e tuangiia ana utu taekan miibuakana ao te kuna are e aneneia. E ongora nakon te maroro ao e anenei kuna n anene n te umwantabu. Ngkanne e a bon boo aia tai n nakon te Moanrinan.

E tatangiria n ongora tangin te aokan Logan. Ao ngkai e ataia bwa tabeua anene a rang mwaaka ni kabirinakoia maan aika kakamaku.

“Kaaraki nakon te tai n anene,” e taku te tia kairiri n te Moanrinan. “Tera te kuna ae tina aneneia moa?”

“I ataia!” e taku Logan, ni katea baina ni karieta n te eea. “Tia anenea ‘I Love to See the Temple.’”

Kamataata n te tamnei iroun Carolina Farias