Kakaean Taian Mwangkii

“Whoa!” E taku Ethan. “Ko noora are teuana arei?”

“Eng, an noora bukina ae uarereke ae kakateke!” e taku Lily.

E tararake Boston, ma e ti noora te nuu.

“Ti a tia n noori teniman mwangkii n te bong aei!” E taku Ethan.

Ma Boston e tuai n noora temanna! Ana utu a kawara te rainforest bwa a na noori mwangki aika aki manana. Ma tenan mwangkii a rang raroanako ibukin Boston bwa ena kona n norii.

E mataki Boston. E ti kona n noori bwaai aika a kaan nakoina. N angiin te tai, e aki tabe ngkai e mataki. E teimatoa ni kona ni karaoi bwaai aika a raraoi. E kona ni wareka te Braille ma tabon baina ao n nakonako n ana kai n te roo. Ao e kona ni kuneia aomata man ana kakauongo nakon bwanaaia.

Ma n tabetai, Boston e aki tangira rikina n mataki. N aekan te bong aei.

E tekateka Boston i aontano ao e katinakoa te ang. E aki bootau! e iango.

Tabeua te miniti imwiina e reke ana iango. Tamara are i Karawa, taiaoka buoka te mwangkii bwa e na kaan riki nakoiu bwa N na nooria, E tataro Boston i nanona.

E tuai kona Boston n noori mwangkii moa. Imwiina e ongo te karongoa man te tabo ae raroa.

“Ko ongo arei?” E titiraki Boston. “I taku bwa bon te mwangkii!”

“Akea te bwai ae I ongo,” e taku Ethan.

“Ngai naba,” e taku Dad. “E tamaroa am kakauongo!”

E ongo birin te mwangkii Boston rinanon te buakonikai irarikin te kawai. E kotea te tabo are nako mai iai te karongoa. “Ikekei!”

Imwiina e ongo riki temanna, ao imwiina temanna riki. N tabetai ana utu a kona n noora te mwangki ngkan e koteia nakoia. Ma akea te mwangkii ae e a tia n rang kaan nakoina ae e nooria.

Imwiina e a roko aia tai n okira mweengaia.

“I karautaeka ko aki noori mwangkii,” e taku Mom ngke a rianna nakon te kaa.

E kakuia angana Boston. “E Raoiroi. I tangiria n noora temanna, ma I ongo tangiia aika a mwaiti n oneanmwiina.” Imwiina e iangoa taekan ana tataro. “Kanga e kauringai taekan te Tamnei ae Raoiroi.”

“Tera ae ko nanonna?” E titiraki Tinana.

“Ngke I tei ni kakauongo, I a ataia bwa a bane ni katobibiai. I kona n ongo bwanaaia e ngae ngke I aki kona n nooriia. Ai aron raoi arou n ongo Te Tamnei ae Raoiroi ngkana I kakauongo.”

“Anne bon te reirei ae tamaroa,” e taku Mom.

E ongo te bwai teuana Boston n te buakonikai n uakaan ma ngaia. Imwiina iai te bwai ae biri n otinako iaon te kawai—nako raoi i matana! Iai buraena ae uraura ao bukina ae abwabwaki. E tei ao e a bon taraia. Imwiina e a manga biri nakon te aroka.

Te mwangkii! E a reke ae e a noora temanna!

E moangare Boston. Te mataki n tabetai e bon kangaanga. Ma n te bong aei, e ibuobuoki nakoina n ataakin te Tamnei ae Raoiroi. Ao anne ae rang tamaroa.

Te Kamataata n te tamnei iroun Alyssa Gonzalez