Rogoca na Yalo Tabu

A dolava na matana mocemoce o Chim. Sa qai yaco mai na mua ni macawa!

“Gauna ni yadra, de da na bera,” a kaci mai o Na.

A diva o Chim me rawa ni moce vakabalavu, ia nikua na siga ni makete. E gadreva me vukei Na me voli kakana ena loma ni macawa. A qai tucake ka kania vakatotolo na kena ikatalau.

E levu na ka a cakava o Na vei Chim kei rau na tacina. E osooso sara ena cakacaka, ka sega ni levu na gauna me tiko kina e vale. Eratou cakacaka vata o Chim kei iratou na tacina me ratou cakava e levu na cakacaka. A marautaka o Chim me veivuke.

Ni rau lesu mai na makete o Chim kei Na, sa biubiu tale o Na me laki cakacaka. Ni lako tu eratou sa vakarau o Chim kei iratou na tacina kina Sigatabu. A vakarautaka o Chim na ivava, tarausese, kei na sote ena dara me laki lotu ni mataka. A vukei koya o Robin, na tuakana, me yania na nona sote. Eratou sa qai vakasaqa ivakayakavi.

A samaka tiko o Chim na valenikuro ni lesu mai vale o Na. E rairai oca.

“Qo, Nau.” A solia vua o Chim e dua na veleti kakana katakata me kania.

A matadredre sara o Na. “Vinaka vakalevu na nomudou veivuke nikua. E rairai totoka oqo!”

Ena mataka ka tarava, a yadra vakamataka lailai o Chim ka vakarau ki lotu. A nanamaki o koya me raici ira na nona itokani ena Lalai ka vulica na veika baleti Jisu Karisito.

“Nau?” a kaci vakamalua, ni tukituki ena nona katuba. “O na lako vata kei keitou ki lotu nikua?”

“E sega ni rawa,” a kaya o tinana. “Me cakacaka ena yakavi nikua.”

“Sa donu.” E rarawa vakalailai o Chim. Sa voleka ni dua na yabaki mai na gauna a lako vata mai kina kei rau o Na ki lotu. “Qaqarauni ena nomu draiva me kalougata nomu siga nikua,” a kaya vua.

“Vakarau me lako?” a taroga o Mattew na tacina lailai.

“Io!” A dara o Chim na nona ivava ka cici yani ki tuba kei iratou na tuakana me ratou waraka na basi.

A marau o Chim ni curu yani kina valenilotu. A tovolea me vakasamataki Jisu Karisito ena gauna ni sakaramede. Ena Lalai, a tovolea vakaukauwa sara me vakarorogo kina lesoni nei Sisita Ortega.

“Nikua eda na vulica na veika me baleta na Yalo Tabu,” e kaya o Sisita Ortega. “Na Yalo Tabu e kauta mai vei keda na itukutuku mai vua na Tamada Vakalomalagi.” E via vaka na retio.

A raica o Chim na iyaloyalo ni dua na retio a taura cake tiko o Sisita Ortega.

“E cakacaka e dua na retio ena nona ciqoma e dua na sikinala ka vukica me ua rorogo eda rawa ni rogoca,” a vakamacalataka. “Mo na biuta kina sala dodonu mo rogoca kina. Me da rogoca na Yalo Tabu, e dodonu meda vagolea talega na yaloda kei na noda vakasama kina sala dodonu. Eda na cakava vakacava oya?

Era a vakasama na tamata kecega. Qai kaya o Chim, “Nida sa muri Jisu Karisito ka muria na vunau.”

A dredre sara o Sisita Ortega “Donu vinaka”

Ni oti na lotu, a veivuke o Chim ena vakasaqa ivakayakavi tale. E vakila na raragi e loma ni veivuke. E kila o koya ni ena nona qarava na nona matavuvale, a biuta kina na yalona kina sala dodonu me vakila kina na Yalo Tabu.

Ni yaco yani i vale o Na, a mokoti koya sara vakaukauwa o Chim. Eratou sa qai masulaka na kakana ka tekivu kana.

“Kila mada na veika au a vulica ena lotu nikua,” e kaya o Chim. E dau taleitaka me tukuna vei Nau na veika me baleta na Lalai.

“Na Cava?” A taroga o Na.

“Keitou vulica na veika me baleta na Yalo Tabu,” e kaya o Chim. “E vaka e dua na retio!” Nida muria na ivakaro, eda na rawa ni vagolea na yaloda kina sala dodonu me da rogoci Koya.”

A deguvacu o Na. “Totoka sara oqori Na cava e dua na ivakaraitaki ni kena maroroi na ivakaro?”

A dredre o Chim. “Vukea na tinamu!” A dredre. “Au lomani iko Nau!”

Droini mai vei Uran Duo