Na Cakacaka Mana ni Bisikete

Mai vei Julia A. Anderson

“Tamaqu mai Lomalagi, e sega na kakana me keitou ivakayakavi. Yalovinaka ni vukei keitou.”

E dua na italanoa dina mai Amerika.

iVakatakarakara ni dua na goneyalewa painia kei na ivakaraitaki ni dua na ibinibini bisikete kaukauwa

E vakacevaruru na cagi batabata, ka wavokita na qiqidreti na uca cevata. A dreta wavoki vakaukauwa e tabana o Jane na nona itutuvi mamare. E nunu na yavana, ia e taubale tiko ga. E ratou sa gole tiko i Salt Lake City, Utah.

E ratou a vulica o Jane kei na nona matavuvale na Lotu i Jisu Karisito ni Yalododonu Edaidai mai Igiladi. Ni kerei ira na lewe ni Lotu na parofita mera lako mai i Utah, eratou a maroroya na nona matavuvale na ilavo kece sara era rawata me rawa nira lako kina. Eratou soko takosova na wasawasa. Ia oqo eratou sa lako voli ena qiqidreti ka kosova na bucabuca. Eratou sa taubale tu me vica na vula, ka sa oti na kakana.

E drodro sobu mai balui Jane na wainimata. “Au sa viakana sara ga,” a kaya vei tuakana o Thomas. “Au sega ni vakabauta niu rawa ni lakova tale e dua na ikalawa!”

A musuka o Tomasi e dua na tiki ni ikuita ni manumanu mai na qiqidreti. “Qo, mamaca oqo,” a kaya. “Ena sega ni dua na leqa.”

“Vinaka vakalevu,” a vakasolokakanataka mai o Jane ni a mama ena tiki ni leca dredre.

Sega ni dede sa gauna ni keba ena bogi oya. Eso vei ira na turaga era biubiu mera laki vakasasa bafalo. A nuitaka o Jane ni na kunea eso. Sa lala sara ga vakalevu na ketena. Ni ratou wawa tiko, eratou sa qai vakavolivolita o Jane kei na nona matavuvale e dua na buka lailai, oca, viakana, ka batabata.

“Me da masu mada,“ a kaya o Jane.

Eratou tekiduru vata na matavuvale, ka masu o Na. “Tamaqu mai Lomalagi, e sega na kakana me keitou ivakayakavi. Yalovinaka ni vukei keitou.”

Eratou dabe galugalu o Jane kei iratou na tacina kei na ganena. Sa qai dabe vakadodonu cake o Na.

“Na cava oya? A taro o Thomas.

“Au sa qai nanuma ga e dua na ka.” A vakatotolo yani o Na kina qiqidreti ka dolava na bola ni matavuvale. Sa qai dreta mai e dua na kato kaukamea lailai ka dolava. E rua na bisikete kaukauwa e tu e loma. Erau a vo tu mai na nodratou soko mai wasawasa ena vica na vula sa oti.

E vakila o Jane na marau e lomana. E tiko na kedratou kakana! “E rawa ni datou voroka ena tikina lalai me da wasea,” e kaya o koya.

Ia ni rau tovolea, sa dredre mada ga me kavida i rua na bisikete.

“Meda tovolea mada oqo,” e kaya o Na. A biuta na bisikete ena ovani ni Dutch ka sovara kina vakalailai na wai. Sa qai ubia ena kena iubi ka biuta na kuro bibi ena koala.

Eratou soqoni wavokita na matavuvale na kuro e matadravu buka

Eratou masu tale o Jane kei na nona matavuvale. A vakasamataka na italanoa kei Jisu Karisito ena ivolanikalou, ena Nona vakani ira na lima na udolu ena vica walega na madrai kei na ika. E kila ni rawa talega ni vukei iratou na Tamada Vakalomalagi.

Ni oti vakalailai, a dolava vakamalua o Na na kuro. E vakasinaiti ena kakana! E veirauti me ra kana kina na nodratou matavuvale taucoko.

A mokoti tinana vakaukauwa o Jane. “Oqo na cakamana!”