“Vaqara Maqe,” iTokani, Maji 2025, 4–5.

Vaqara Maqe

Mai vei Chelsea Mortensen

“E vaka ga na sala au rawa ni rogoca kina na Yalo Tabu niu vakarorogo.”

E dua na italanoa dina mai Costa Rica.

Gonetagane vakamatailoilo ka matacudrucudru ni rau matadredredre e dua na goneyalewa kei na gonetagane e dakuna ka dusia e dua na ka sega ni laurai

“Oilei!” A kaya o Ethan. “O raica beka o ya?”

“Io, raica mada na buina lailai totoka!” e kaya o Lily.

A rai cake o Boston, ia a raica ga na iyaloyalo.

“Tou sa raica rawa e tolu na maqe nikua!” A kaya o Ethan.

Ia a sega ni raica o Boston e dua! Eratou a tiko ena dua na veikau na nona matavuvale me raici ira na maqe kila. Ia era sa rui yawa sara na maqe me raica o Boston.

E mataboko o Boston. E raica rawa ga na veika e voleka sara vua. Sa matau vua ka sega ni kauwaitaka tu nona mataboko. E se rawa ni cakava e levu na ka totoka. E rawa ni wilika na Braille ena iqaqalo ni ligana ka taubale ena nona ititoko ena butobuto. Ka rawa ni kunei ira na tamata ena nona vakarorogo ki na domodra.

Ia ena so na gauna, a sega ni taleitaka o Boston ni mataboko. Me vaka nikua.

A dabe toka ena qele o Boston ka cegulevu. E sega ni dodonu! a vakasamataka.

Ni oti ga e vica na miniti a dua na nona vakasama. Tamaqu Vakalomalagi, yalovinaka vukea e dua na maqe me toro voleka mai meu raica, a masu ena nona vakasama o Boston.

A sega ni raica rawa o Boston e dua na maqe. Sa qai rogoca e dua na rorogo vakayawa.

Gonetagane matadredredre ni qovia na ligana e daligana

“O sa rogoca beka oya?” A taroga o Boston. “Au vakabauta ni dua na maqe oya!”

“Au sega ni rogoca e dua na ka,” e kaya o Ethan.

“E sega talega o au,” a kaya o Ta. “E vinaka na daligamu!”

A rogoca o Boston ni cici e dua na maqe ena loma ni veikau ena yasa ni sala. A dusia na rorogo. “E kea!”

Sa qai rogoca e dua tale, ka dua tale. Ena so na gauna e rawa ni ratou raici ira na maqe na nona matavuvale ni dusia yani. Ia e sega ni dua vei ira na maqe e voleka sara me raica.

Gonetagane vakamatailoilo vosa tiko ena dua na vakataqara ni vosa ka vakaraitaka na ua ni rorogo

Sa voleka sara na gauna ni lesu i vale.

“Vosota ni o sega ni raica e dua na maqe,” e kaya o Na ni rau taubale yani ki na motoka.

A kuretaba o Boston. “Sa Donu. Au vinakata meu raica e dua, ia au a rogoca e levu sara.” A qai vakasamataka na nona masu. “E vakananuma vei au na Yalo Tabu.”

“Na cava o tukuna tiko? A taroga o Na.

“Niu sa cegu meu vakarorogo, au qai kila ni ra tu wavoliti au. Au rogoci ira rawa e dina ga niu sega ni raici ira. E vaka ga na sala au rawa ni rogoca kina na Yalo Tabu niu vakarorogo.”

“Oqori sa dua na lesoni cecere,” a kaya o Na.

A rogoca o Boston e dua na ka ena veikau voleka. Sa qai cici yani e dua na ka ena salatu—e matana sara ga! E damudamu na vutina ka bui balavu. A tu vakadua ka raici koya mai vakadodonu. Sa qai cici tale kina veivunikau.

Na maqe! Sa raica rawa e dua!

A dredre o Boston. Ena so na gauna e dau dredre na mataboko. Ia nikua, a vukei koya me vulica na veika me baleta na Yalo Tabu. Ka sa rui totoka oya.