Lagata Laivi na Yaloyalo

“Gauna ni moce,” e kaya o Mamá ena matadredredre.

A curu kina nona rumu o Logan. A masu ka qasi yani kina imocemoce. Sa qai wilika vua o Mamá e dua na italanoa. A bobo vakamalua na matana. Sega ni dede sa moce lutu okoya.

Ia a rerevaki na tadra nei Logan. A tiko duadua ga ena dua na vanua butobuto. A raica e dua na manumanu levu ka vakadomobula ka vakaitamera na batina. E vakasigege bati mai vua. Sa qai tekivu cici yani vua!

A saga o Logan me dro. Ia sikalutu ka bale! Sa voleka cake tikoga na manumanu ka levu cake me yacova ni—

A yadra mai o Logan ka dabe ena imocemoce. A tavoya na wainimatana ka raica ni se buto tu e tautuba.

E vinakata me tukuna vei rau na nona itubutubu me baleta na tadra. Ia a sega ni via biuta na nona imocemoce. Na butobuto e vakavuna me nanuma ni sa vuni tiko e dua na manumanu ena dua na vanua. E vakarerevaki na iyaloyalo kecega. E kodro tiko e tautuba e dua na koli me vaka e dua na manumanu e godro tiko.

A dreta cake o Logan na itutuvi ki ucuna. Sa rui rere o koya me toso.

E vinakata me moce tale. Ia ena veigauna kece e bobo kina, e raica na mata ni manumanu cudru kei na batina gata. E sega ni tarova rawa na nona raica na iyaloyalo rerevaki.

Sa qai raica e dua na iyaloyalo ena teveli ena yasa ni nona imocemoce. Oqo e dua na kena itaba, kei rau na tacina e rua, o Papá, kei Mamá ena taudaku ni valetabu mai Monterrey, Mexico. Eratou mata mamarau vakalevu.

Vakasauri ga, sa basika mai na nona vakasama na qaqa ni nona sere taleitaki ni Lalai. “I love to see the temple,” sa tekivu lagasere vakamalua o Logan. “I’m going there someday. To feel the Holy Spirit, to listen and to pray.”*

Ni lagasere tiko, a vakasamataka o Logan na siga o ya ena valetabu vata kei na nona matavuvale. Sa vakacegu sara na yalona. Ena vuku ni valetabu, sa rawa kina me tiko vata kei na nona matavuvale me tawamudu.

A sega ni rogoca rawa o Logan na kodro ni koli mai na rorogo ni domona. A bobo na matana ka lagasere tikoga. “As a child of God, I’ve learned this truth: A family is forever.” A vakila e dua na vakacegu e yalona ka vakavuna me matadredredre. E kila ni sega na manumanu.

A buto ka vakarerevaki na rumu. Ia oqo sa dua na vanua malumu, ka taqomaki. A davo lesu o Logan ena nona ilokoloko ka moce ena vakacegu.

Ni yadra mai, sa cila tu na siga e tautuba. A tucake ka raica na rarama ni matanisiga ni cilava tu na nona itaba ni valetabu. A vagugutaka toka na nona sere taleitaki ni vakarau me lako i lotu.

Ni lako tiko i lotu, a tukuna vei iratou na nona matavuvale na nona tadra butobuto kei na sere a lagata. A vakarorogo kina vosa ka lagata na serenilotu ena valenilotu. Oti sa yaco mai na gauna ni lako kina Lalai.

E dau taleitaka o koya na vakarorogo kina sere/ivakatagi. Ia oqo sa kila o koya ni so na sere e kaukauwa sara ka rawa ni dro tani kina na manumanu rerevaki.

“Ni sa kidavaki mai kina gauna ni lagasere,” e kaya na iliuliu ni Lalai. “Na sere cava me da lagata taumada?”

“Au kila!” a kaya o Logan, ka laveta cake na ligana ki macawa. “Me da laga ‘I Love to See the Temple.’”

Droini mai vei Carolina Farías