Rarawa

A dreta na itutuvi o Savannah e uluna. Nikua e sega ni siga vinaka.

Ena gauna ni vuli nikua, e sega ni rawa ni vakanamata o Savannah kina dua na ka. Sa oca, yalolailai, ka rarawa. E dua na ka bibi e tu e ketena ka na sega ni takali yani. Ni sa cava na siga, na ka ga e vinakata me cakava oya me qasi ena ruku ni nona desi ka vunitaki koya.

Ena dua na gauna lekaleka oqo, e voleka ni dau rarawa o Savannah ena veigauna kece. Era saga na nona itokani me ra vakamarautaki koya, ia ena so na gauna a sega ni vinakata o Savannah me tiko vata kei ira. Era dau marau tu ga. Ena so na gauna e nanuma ni ra na marau vakalevu cake ke sega o koya.

Na cava e leqa vei au? E vakataroga o Savannah. Na cava e sega ni rawa kina niu marau me vakataki ira na tamata kecega?

E vakila ni batabata ka galili me vaka na o loaloa e tautuba. Ia oqo sa via moce ga.

A rogoca o Savannah ni tadola na katuba ni nona rumu ni moce.

“Savannah,” e kaya o Na, ni dabe toka ena bati ni imocemoce, “na cava e leqa?”

“E sega ni dua na ka,” e kaya o Savannah. “Au sa rui oca vakalevu.”

“O dina?” A taroga o Na. “Au leqataki iko.”

“Au sa vinaka,” e kaya o Savannah.

“Sa donu.” E tucake o Na. “Nanuma tiko ni rawa nio tukuna vei au e dua ga na ka. Au lomani iko.”

A tiko ga o Savannah ena imocemoce me yacova na gauna ni vakayakavi. Ena bogi oya, a sega ni moce rawa. E sega ni cegu na nona mona ena nona vakasamataka na veika kece.

Ena siga ka tarava e se oca tiko ga. Sa dua tale na siga balavu. A lesu mai koronivuli o Savannah ka dabe ena teveli ni valenikuro. A cegu ka rai yani ki tautuba. Sa lutu tale tu na uca cevata.

“Savannah?”

A vuki o Savannah ka kurabui ni raici Bubu ni lako mai kina rumu.

“Bula, Bubu,” e kaya o Savannah. Na cava o cakava tiko eke?

A dabe sobu o Bubu. “E vinakata o tinamu meu lako mai,” a kaya. “E leqataki iko tiko.”

“Au sa oca sara ga. Ia au vinaka tiko,” e kaya o Savannah.

A dredre vakamalua o Bubu. “Au a bau tukuna beka vei iko na veika me baleta na vulaikatakata keirau a toki kina kei Tukamu?”

“Au sega ni vakabauta,” e kaya o Savannah.

“Au a rarawa tu ga ena veigauna kece,” e kaya o Bubu. “Au vinakata meu marau, ia au sega ni kauwaitaka e dua na ka. Sa dua na ka na noqu galili.

“Ia erau tiko o tukaqu kei tinaqu.” A raica sobu o Savannah na nona ivava. “Na cava o galili kina?”

“Au sega ni kila rawa na ka e yaco tiko,” e kaya o Bubu. Au se sega vakadua ni vaqori mada ena dua na gauna e liu. Au a qai lako vua na vuniwai.”

“E vakacava?”

A mokoti koya o Bubu. “Au vulica niu sa lomaocaoca.”

“Oi, o sa rarawa ga kina?” a taroga o Savannah.

“Sega, na lomaocaoca e sega walega ni rarawa,” e vakamacalataka o Bubu. “E vaka me sega ni takali na noqu rarawa. Au saga vakaukauwa meu cakava na ka kece au dau cakava. Ka dredre sara ga vei au meu veimaliwai kei ira na tamata, na noqu matavuvale sara mada ga. Au gadreva dina na veivuke.”

A rai cake o Savannah. “Na mataqali veivuke cava?”

“A vakamacalataka na vuniwai na ka e leqa, ka keirau tuvanaka vata e dua na ituvatuva me vukei au meu vinaka cake,” e kaya o Bubu. “Ia ena so na gauna au se rarawa tikoga. Au dau masu vakalevu. Niu galili, au a raitayaloyalotaka na iVakabula ni dabe toka e yasaqu. Au vakila ni vinaka cake na noqu vakasamataki Koya.”

A raica na uca cevata e tautuba o Savannah ka sautaninini. “Au dau rarawa vakalevu talega. Au tovolea meu marau, ia ena so na gauna au sega ni rawata, kau sa qai cudruvi au ni vaqori na noqu nanuma.”

“Au kila, noqu daulomani.” A mokoti Savannah o Bubu. “Oqori talega na ka au vakila ena so na gauna. O sega ni tu duadua. Au lomani iko, rau lomani iko na nomu itubutubu, ka lomani iko na Tamada Vakalomalagi kei Jisu Karisito. Era kila na nomu mosi ka ra na sega vakadua ni biuti iko.”

De dina beka o Bubu, e vakasamataka o Savannah. Au sega ni tu duadua. Na bibi ni ketei Savannah sa sega ni bibi sara.

“Au vakabauta ni dodonu meu vosa vei Na,” e kaya o Savannah. “E vinakata talega me vukei au.”

“Sa dua na vakasama uasivi oqori.” A taura na ligai Savannah o Bubu.

A dredre o Savannah ka vakararavi ki na tabai Bubu. Sa sega tale ni batabata ka galili na yalona.

Droini mai vei Marina Pessarrodona