“Kanooj Illu n̄an Jar,” Jera, Jānwōde 2025, 4–5.

Kanooj Illu n̄an Jar

Jān Abby Larkins

Gabriela ekar bōk jet kituwōn ko rem̧wilaļ. Ta eo emaron̄ kar kōm̧m̧an bwe en medļo̧k būruōn?

Juon bwebwenato em̧ool jān Gemany.

“Ejjeļo̧k juon ej meļeļe kōn n̄a!” Gabriela ekar ekkelo̧k ke ekar kabbokļo̧k kōjām in ruum̧ in kiki eo an. Rainin ekar juon raan epen. Juon ilo jikuuļ eo ekar kōm̧m̧an kōjak kōn leddik in. Im ke Gabriela ekar ro̧o̧lļo̧k n̄an m̧weo, ekar nana tam̧m̧ūn, im ekar pok ippān Mutti (M̧am̧a).

Gabriela ekar wōtlo̧kļo̧k ilo jikin babu eo an im kar jino jan̄. Drenin kōmejaaļaļ ko raar wōtļo̧k jān turin mejān, im ubōn ekar āinwōt obrak kōn illu. Ekar jab kōņaan en̄jake rōt in.

Leddik in ekar keememej an katak ilo Būraimere bwe emaron̄ jar n̄an Jemādwōj Ilan̄ jabdewōt iien ekar aikuj jipan̄. Ekar kōņaan ba juon jar n̄an jipan̄ bwe en em̧manļo̧k an en̄jake, bōtaab ekar kanooj in inepata n̄an an kate. Ekar kiil māj ko mejān im bōk jet kūtuwōn ko rem̧wilaļ. Ta eo emaron̄ kar kōm̧m̧an bwe en medļo̧k būruōn?

Ālkin jejjo jekōn ko, juon ļōmņak ekar etal n̄an ļōmņak eo an.

Ļōmņak kōn men ko kwoj kam̧m̧oolol kaki.

Leddik ekar kōpeļļo̧k māj ko mejān im reitok reitak ilo ruum̧ eo an. Ekar wōr juon pija ilo dipin ruum̧ eo pija in Mutti (Jinen) im Vati (Jemān). Gabriela ekar iakwe baam̧le eo an, jekdo̧o̧n n̄e leddik ekar illu ippāer.

“Ij kam̧m̧oolol kōn ro jinō im jema,” ekar ba.

Innām leddik in ekar ļōmņak kōn ro rilikin Gwendolyn, Lydia, im Thomas. Raar aolep iien ajije toy ko nejier ippān leddik im kōm̧m̧an bwe en kar ettōn̄. Ekar em̧m̧an ippān ikkure ippāer.

“Ij kam̧m̧oolol kōn ro rilikū,” Gabriela ekar ba.

Innām leddik in ekar reinam̧ōjļo̧k ilo wintō eo an.

Aļ ekar waļo̧k, im mejatoto eo ekar obrak kōn kōļar ko raiboojoj—oran, būrōrō, iaļo, im piin̄.

“Ij kam̧m̧oolol kōn tulo̧kin aļ,” Gabriela ekar ba.

Innām̧ ekar ļōmņak kōn elōn̄ļo̧k men ko. Ekar kam̧m̧oolol kōn kōraelep eo ekar kan̄e ilo jikuuļ rainin. Ekar kam̧m̧oolol kōn ro m̧ōttan. Ekar kam̧m̧oolol kōn jikin jokwe eo ekar jokwe ie.

Ekar kam̧ōņōņō n̄an ļōmņak kōn men ko n̄an kam̧m̧oolol kaki. Gabreila ejjan̄in kar kile ewi lōn̄ in men ko rem̧m̧an raar pād ilo mour eo an.

Leddik ekar jeļā bwe Jetōb Kwojarjar eo ekar leļo̧k n̄an e meļeļe ko n̄an ļōmņak kōn kōjeraam̧m̧an ko an. Būruōn ekar aenōm̧m̧an kiō. Leddik in ekar en̄jake epojak n̄an jar.

“Jema Ilan̄ Jitōnbōro,” ekar ba. “Joļo̧k aō bōd bwe ikar illu ippān Mutti. Kom̧m̧ool kōn Am̧ jipan̄ eō en̄jake jokane im bar m̧ōņōņō. Kom̧m̧ool kōn Am̧ jilkintok Jetōb Kwojarjar eo n̄an kakeememej eō kōn kōjeraam̧m̧an ko aō. Ilo etan Jisōs Kraist, amen.”

Ekar diwōjļo̧k jān ruum̧ eo an. Mutti im Vati raar pād ilo jikin kōmat eo im kōm̧m̧an kōjota. Ekar atbakwoj Mutti.

“Joļo̧k aō bōd kōn aō kar illu ippam̧,” Gabriela ekar ba.

“Ekwe Em̧m̧an.” Mutti ekar ba. “Kom̧m̧ool kōn am̧ joļo̧k bōd.”

Raar jijet im jepool e tebōl in kōjota eo im kar kōjeraam̧m̧an m̧ōn̄ā ko. Innām Gabriela ekar wōr juon an aitia!

Jen ļoor tebōļ eo im kajjojo en ba juon men jej kam̧m̧oolol kake,” ekar ba.

Vati ekar ettōn̄ dikdik. “Ej juon aitia em̧m̧an!”

“Ij kam̧m̧oolol kōn soap,” Mutti ekar ba.

Vati ekar ļōmņak juon jekōn.

“Pizza,” ekar ba. Raar aolep etton̄ ippā doon.

Innām ekar an Gabriela iien eo. Ekar jeļā kadede ta eo ekar kōņaan ba.

“Ij kam̧m̧oolol kōn jar”