Ejja Āinwōt Josep

Jān Alelie Coronel-Camitan

Josep Smith ekar ke lukkuun lo Jemādwōj Ilan̄ im Jisōs Kraist?

Juon bwebwenato em̧ool jān Philippines.

Lhensay ekar kelōn̄ kelaļ ilo jea eo an turin jinen ilo an jeepney eo ettōr ilo town. Jabōt ekar raan eo em̧m̧an tata ippān Lhensay ilo juon wiik! Leddik in ekar iakwe etal n̄an Būraimere im katak kōn Jisōs Kraist.

Jeepney eo ekar bōjrakļo̧k ilo ijo rej bōjrak ie. Jinen ekar jibwe pein Lhensay ke raar etetalļo̧k n̄an m̧ōn jar eo.

Jinen im leddik eo rej etetalļo̧k n̄an m̧ōn jar eo

Ālkin kweilo̧k in kwojkwoj eo, Lhensay ekar etetalļo̧k n̄an Būraimere eo ippān eo m̧ōttan Maria. Ioon boot eo ekar wōr juon pija in juon likao ej jar ilo wōjke ko.

“Iakwe in Jibbon̄!” Rūkaki eo aer, Sister Cruz, ekar jitōn̄ļo̧k pija eo. “Ewōr en ejeļā ke wōn in?”

“ Josep Smith Ņe!” Lhensay ekar ba.

Sister Cruz ekar ettōn̄ dikdik. “Aaet, ejim̧we. Im ta eo Josep Smith ekar kōm̧m̧ane?”

Lhensay ekar reilikļo̧k n̄an pija eo. Leddik eo ekar jeļā bwe Josep Smith ekar juon rikanaan, bōtaab ekar jab jeļā eļapļo̧k.

“E ekar rikanaan eo m̧oktata an kabun̄ in ad,” Maria ekar ba

“Ebar jim̧we!” Sister Cruz ekar ba. “Ke Josep ekar dik, ekar jab jeļā ewi wōt kabun̄ eo n̄an kobaļo̧k ie. E ekar etal n̄an buļōn wōjke ko im kar jar n̄an Anij n̄an pukot ewi wōt eo ekar jim̧we. E ekar barāinwōt kajjitōk kōn jeorļo̧k bōd an jerawiwi ko an. Ke ekar jar, juon meram emeram ekar waļo̧k. Kom̧ jeļā ke wōn eo kar ilo meram jab eo?”

Lhensay im aolepān kūlaaj eo an raar kōttar.

Sister Cruz ekar bar likūt juon pija ioon boot eo. Men in ekar kwaļo̧k ruo em̧m̧aan ro rej jutak ilōn̄ in Josep Smith ilo mejatoto. Raar kōņak libooror ko remouj im meram aer rabōlļo̧k.

“Jemādwōj Ilan̄ im Jisōs Kraist raar kwaļo̧k er make n̄an Josep,” Sister Cruz ekar ba. “Er raar jiron̄ e bwe enaaj kar kōjepļaaktok Kabun̄ eo an Jisōs. Jej ņa etan Visōn eo M̧oktata.”

Lhensay ekar kajutak pein, māj ko mejān raar kabūrōrō. “Ekar ke lukkuun?” liin ekar ba.

Sister Cruz ekar em̧m̧ajidjid. “Aaet, ekar!”

Ekar okmeņeņ būruōn Lhensay. Leddik in ekar jeļā bwe ta eo Sister Cruz ekar ba ekar m̧ool.

Joten jab eo, Lhensay ekar ļōmņak wōt kōn Josep Smith. “M̧am̧a, ekōjkan aō maron̄ lo Jemādwōj Ilan̄ im Jisōs, āinwōt kar Josep Smith?” leddik eo ekar kajjitōk.

Jinen ekar atbakwoj Lhensay. “Elōn̄ wōt iaad jeban lo Jemādwōj Ilan̄ im Jisōs Kraist āinwōt an Josep Smith kar. Bōtaab Er rej maron̄ wōt kōnono n̄an kōj ilo ļōmņak ko ad im en̄jake ko jān Jetōb Kwojarjar eo. Innām kom̧ maron̄ jeļā Er rej aolep iien pād ippāmi.”

Lhensay ekar ļōmņak kōn wāween eo būruōn ekar en̄jake ke Sister Cruz ekar jiron̄ er kōn Visōn eo M̧oktata. Jetōb Kwojarjar eo ekar, jilkinļo̧k n̄an leddik in juon ennaan jān Jemādwōj Ilan̄ im Jisōs Kraist! Leddik in ekar ettōn̄ im atbakwoj bar jinen. Er raar kōnono n̄an leddin in, ejja āinwōt raar kōnono n̄an Josep Smith!