“Jeje Ko Rekowjarjar ilo Kajin Swahili,” Jera Jānwōde 2025, 36–37.
Jeje Ko Rekwojarjar ilo Kajin Swahili
Ikōņaan bwe en kar wōr juon men imaron̄ kōm̧m̧ane n̄an jipan̄, Jared ekar ļōmņak.
Juon bwebwenato em̧ool jān Australia.
Jared ekar deļo̧n̄ļo̧k n̄an kilaaj in Jabōt Jikuuļ eo im kar jijet ippān rijikuuļ ro m̧ōttan. Ekar kile juon ļaddik ekar jab kile ej deļo̧n̄ļo̧k im jijet jejjo jea ļo̧k jān e.
Rūkaki eo an Jared, Brother Trudgen, ekar ettōn̄ dikidk n̄an kūļaaj eo. “En̄in ej Emmanuel,” ekar ba. “E im baam̧le eo an rej kab em̧m̧akūtok jān Australia. En̄n ej Jabōt eo aer kein kajuon in ilo ward eo ad!”
Jared ekar ļōmņak emaron̄ in kar pen n̄an etal n̄an juon ward kāāl. Ekar kōņaan kajjieon̄ in erom eo m̧ōttan Emmanuel.
Brother Trudgen ekar kwaļo̧ktok jeje ko rekwojarjar an. “Jen aolep elōkļok n̄an 3 Nipai,” ekar ba.
Jared ekar kōppeļo̧k jeje ko rekwojarjar an im kar reilo̧k n̄an Emmanuel. Ekar ejjeļo̧k an jeje ko rekwojarjar.
Jared ekar leļo̧k n̄an e juon ettōn̄ dikdik eļap im kar m̧alļo̧k. “Iakwe, N̄a Jared,” ekar ba. “Kwoj kōņaan ke lale ippa jeje ko rekwojarjar?”
Emmanuel ekar ettōn̄ļo̧k. “Um, Ijjab jeļā eļap kajin In̄lij,” ekar ba. “Joļo̧k bōd.”
“Ta kajin eo kwoj ekōnono?”
“Kajin Swahili.”
Jared ekar jab jeļā jabdewōt kajin Swahili. E im Emmanuel raar jab ba eļap ilo aolepān kūlaaj eo.
Joten eo ilo kōjota eo, Jared ekar jiron̄ baam̧le eo an kōn Emmanuel.
“Ļaddik in ekar āinwōt elukkuun em̧m̧an,” Jared ekar ba. “Bōtaab kōmij jab kanooj in meļeļe doon.”
Jinō ekar em̧ajidjid. “Emmanuel im baamļe eo an raar iion elōn̄ men ko kiiō,” ekar ba. “Raar aikuj in door laļ eo aer ilo juon iien eo elukkuun jidimkij kōnke kōn nana koo raar waļo̧k ijōņ. Raar door aolep men otemjej.”
Jared ekar jab mejān em̧ōņōņō. Ta eo ej āinwōt n̄an likūt kapijuknen eo ilju im em̧m̧akūtļo̧k n̄an juon laļ elukkun kāāl? Enaaj kar kanooj in pen!
Ikōņaan en kar wōr juon men imaron̄ kōm̧m̧ane n̄an jipan̄ Emmanuel, ekar ļōmņak. Bōtaab ta?
Jared ekar jab maron̄ bōjrak an ļōmņak kōn Emmanuel ke ekar pojak n̄an kiki. Ekar jijet laļļo̧k ilo tebōļ eo an kōn Bok in Mormon eo an im riiti jejjo eoon ko. Riiti jeje ko rekwojarjar aolep iien ekar kōm̧m̧an an em̧m̧anļo̧k an en̄jake. Joteniin raar barāinwōt kakeememej e bwe Emmanuel ekar ejjeļo̧k ippān jeje ko rekwojarjar n̄an riiti. Jared ekar kiil jeje ko rekwojarjar an im kar kalimjōk kōbar eo. Innām ekar kelōn̄ļo̧k jān jea eo an im ekairir nam̧ōjļo̧k n̄an hallway eo.
“M̧am̧a!” ekar ikkūr. “Ij ļōmņak ijeļā ekōjkan eo jipan̄ Emmanuel!”
Jabōt eo tok juon, Jared ekar jab maron̄ kōttar n̄an loe lok Emmanuel. Ekar jijet ippān tikōn ro jet ilo im̧aan jikin jar eo im kar kōttar kōn juon Bok in Mormon kāāl ilo ioon neen. Mijenede ro raar jipan̄ e bōk juon kape ainjuon n̄an baj Emmanuel.
Ke Emmanuel ekar deļo̧n̄ļo̧k jikin jar eo ippān baam̧le eo an, Jared ekar ettōn̄ im jeaļe ļo̧k. Emmanuel ekar tarpok ke ekar jijet laļļo̧k turin Jared. Bōtaab māj ko mejān rekajju kilepļo̧k ke Jared ekar lelo̧k n̄an e juon Bok in Mormon.
“N̄an n̄a?” Emmanuel ekar kajjitōk.
Jared ekar em̧ajidjid.
Māj ko mejān Emmanuel raar m̧ōņōņō. Ekar elōki peij ko an Bok in Mormon kāāl eo an. “Kajin Swahili!” ekar ba. Ekar ettōn̄ n̄an Jared im atbakwoj bok eo n̄an ubōn. “Kom̧m̧ool!”
Būruōn Jared ekar okmeņeņ ke ekar bar ettōn̄ļo̧k dikdikļok. Ekar jeļā eban kar kōkōm̧anm̧anļo̧k aolep men ko n̄an Emmanuel, im ekar jan̄in de kanooj em̧m̧an aer kōnono n̄an doon. Bōtaab ekar Em̧m̧an. Raar jab aikuj in kōnono juon wōt kajin n̄an m̧ōttā!
Kōmeļeļe jān Keith Negley