E a Rangi n Ikawai ibukin te Moanrinan?

“Kam Butimwaeaki nakon te Moanrinan!” Titita Agbor, ana tia kairiiri Gift n te Moanrinan, e tei mai moa inanon te ruu. “Te bong aei ti na reiakina te kuna ‘Love One Another.’”

E tang te katangtang, ao kairake n ataei a tauraoi n anene. Ma Gift e a kaman bwaati te anene aei. E a kaman aneneia tebubua te tai! E aki namakina te kan aneneia n te bong aei.

E a kua Gift n te Moanrinan. E a bon ikawai, abwabwaki, ao ni bubura nakoia tabeman ataei. Raoraona n te taromauri ni kabane a bane ni mena n te Bootaki n Ataeinnaine ngkai. E a bon kaan bane te ririki ae bwanin imwain are e kona n nako ma ngaia nakon te kiraati n te Bootaki n Ataeinnaine ao waaki ni kakukurei.

Ngke a bane n anene te koraki, e bon rau Gift. E wirikirikiia tabeua taekan te anene, ma e tabe n iango.

Ngkanne e a reke ana iango. Tao ngkana e marooro ma te bitiobi, e na moantaai ni kanakoa nakon te Bootaki n Ataeinnainei n te aro are e na kona ni bootaki ma raoraona.

E noora te Bitiobi Achombi imwiin te taromauri. “Mauri, Bitiobi” e taku. “I namakinna bwa kanga I aki tau n riki bwa kaain te Moanrinan. I a bubura ao n ikawai riki nakoia ni kabane ataei. I kona n onea mwiin anne n nakon te Bootaki n Ataeinaine?”

E moangare Bitiobi Achombi. “I ataia bwa te mwaing nakon te Bootaki n ataeinnaine e bon kakukurei,” e taku. “Ma ko tii kona n iriiria ngkana e a koro 12 am ririki. Kabwara au bure.”

E baraaki Gift n tarai ana kau. “E TAMAROA.”

“Ai tekeraoira ngkoe ngkai ko a mena irarikiia kaain te Moanrinan,” e taku bitiobi. “I taku bwa ataei ake a uarereke a na rangi n kamoamoa iroum. Ko kona ni karaoa te kaokoro nakoia.”

Inanon te bong anne, Gift e namakina te nanokawaki. Te ririki bon te tai ae maan n namakina te tiku n tii ngkoe inanon te Moanrinan.

Ma imwiina Gift e a iangoia riki bwa tera are e taekinna Bitiobi Achombi. E bon koaua bwa ataei tabeman a bon kamoamoa irouna? E aki ataa anne mai mwaina.

Te wiiki are imwiina, Gift e a kaboo nakoia raoraona ngkai a nakonako nakon te Bootaki n Ataeinnaine. E ikerake ao n nakonako nakon ana kiratiruum te Moanrinan.

“Gift,” e taku Titita Agbor, “ko kukurei ni buokai n reiakina te anene n te wiiki aei?”

“Um, eng,” e taku Gift. “Tera te anene ae ti na reiakinna?”

“‘Ngai Natin te Aua,’” e taku Titita Agbor. “Ko rabwa ibukin am ibuobuoki! I taku bwa ataei aika a uarereke a na rangi n unga n reiakinna mai iroum.”

Ngke e moanaki tain te anene, Gift e tei mai imoa inanon te ruu. “Te bong aei N na reireiningkami teuana te anene mai ibuakon ae I tatangiria,” e taku. E buokiia ataei n reiakin taian taeka. Imwiina e anenema ngaiia. Ngke e anene, Gift e namakina te abuee ao te kukurei inanona. E ataia bwa e bon namakina te Tamnei ae Raoiroi.

Imwain ae maan, e nang bon bwara te kiraati n te Moanrinan! Imwin te tataro ni kainiin, Gift e moana nakonako n otinako nakon te hall. E tangiria ni kakaeiia raoraona ni kamauriia imwiin aia kiraati n te Bootaki n Ataeinnaine.

Ma temanna te teei n aine ae uarereke e katokia. “Ko rabwa ngkai ko anene ma ngaira!” E rabwata Gift. “I tangiria n riki n ai arom ngkana I a ikawai.”

E matangare Gift. E bon tiku n aki kona n tataninga ni kan nakon te Bootaki n Ataeinnaine, ao e kantaningaia bwa e na birimwaaka te ririki. Ma e ataia ae e na teimatoa n reiakinaki ao ni karaoi bwaai aika a tamaroa inanon te Moanrinan.

Ao tao e bon eti are e taku Bitiobi Achombi. E na kona ni karaoa te kaokoro.

Kamataatan korotamnei iroun Simini Blocker