I Kainnanoa te Riki n Kororaoi?

E karaurau n nakonako Henry inanon ruun te Moanrinan. E namakina te tinebu ngke e a roko n ana kaintekateka.

Ana tia reirei, te Tari Rass, e moangare nakoina. “Ko a tauraoi n taetae iaon taian tembora?” e titiraki.

“Eng,” e kaeka Henry.

Bukin tera I taekina anne? E iango Henry ngke e tekateka. E aki namakina te tauraoi. Nakon anne.

N ana Moanrinan Henry e reiakina te anene “I Love to See the Temple.” N ana kiraati a kaman tuangaki bwa a na taetae iaon te nako n te tembora.

Ma Henry e namakina te nanokawaki. E tangiria ni kan nakon te tembora ngkana e a bon ikawai riki, ma e namakinna ae karaoi kaairua aika mwaiti.

Temanna imwiin temanna, raoraon Henry a teirake. A rang ni kukurei ao n ingainga ngke a marooro iaon kawaran te tembora n teuana te bong. E namakina te nimatoaua ae bati.

Ngkanne e a boo tain te anene. E anene Henry ma kaain ana Moanrinan: “N na katauraoai ngkai te kairake ngai; aio tabeu ae tabu.”

N na kanga ni kona ni katauraoai n nakon te tembora ngkana a mwaiti au kaairua ae I karaoi? E iango Henry. E kauangii iaon ana kaintekateka.

Ngke e a moti te anene, te Tari Rass e raranako. “Ko RAOIROI?” e titiraki te Tari Henry.

Henry e baraaki n taatarai baina. Ngkanne e taku ni karaurau, “I tangiria ni kan nako n te tembora, ma I maaku bwa I aki tau.” E kabubura ikerakena. “I aki nanakoraoi ma au utu n taainako. I mwaninga ni kakaraoi tabeu. I karaoi kaairua aika mwaiti. I bon tangiria raoi n riki n tamaroa?”

E moangare te Tari Rass. “Te riki ni kororaoi n nakon te tembora e aki nanonaki bwa kona riki n tamaroa. Ti na kona n tau man onimakinan Iesu Kristo ao ni koaua raoi ni kataia ni kawakin tuua. Ti bane ni karaoi kaairua, ma ti kona n rairinanora ao ni manga itiaki.”

E tekateka Henry ni kaetia teutana.

“I kakoaua bwa Tamara are i Karawa e kamoamoa iroum ngkai ko kataia n tamaroa,” e taku te Tari Rass.

E iangoi bwaai aika a raraoi Henry are e a tia ni karaoi n te wiiki anne. E buoka tinana ni kuuka, e buoka mwanena ma ana bwai n reirei, ao e kamaura te ataeinimwaane ae boou n te reirei.

Te rawawata are e raraomwa iai Henry e moanna ni bebete. E ataia bwa te Tamnei ae Raoiroi e buokia n namakina te rau.

Ngke e a roko ana tai Henry n tibwatibwa, e moangare ao e teirake. “I tangiria n teimatoa n rairananou ao n riki n ai aron Iesu Kristo bwa n teuana te bong N na kona n rin te tembora,” e taku.

E namakina te kukurei Henry ngke e tekateka. N teuana te bong, e na kona ni karaoi berita aika tabu ma te Atua inanon te tembora. E tangiria ni kataa ana kabanea n tamaroa ni katauraoi!

Kamataata n te Tamnei iroun Gail Armstrong