Otantaai iroun Maja bon Koroboki aika Tabu

E tekateka Maja iaon kain tamwareken ana auti man botii baina iaan bwangena. Taai e bon ranea otana, abueen otan taai rimarenan aroka aka a rietaata. Boin te ang kanga aron boin te burukam ae kateketeke.

E otinako Mami ao e tekateka irarikin Maja. “Tera ae ko a bon iangoia?”

“Kanga N na tibwaua ae mamaten nanou ni koroboki aika tabu n te Moanrinan,” e taku Maja. “Ma akea te bwai ae mamate nanou iai. “Ma I aki ataia ngkana I kona n nakon te tembora.”

E katoutoua atuna Mami. “Rineakin koroboki aika tabu ae mamaten nanou e bon kangaanga.” E tarai taian aroka, ngkanne e teirake. “Iai au iango.”

E a manga rinnako Mami. Ngke e okirikaaki, e taua ana boki ae tabu. “Tia moanna ma te karaki. Tera te karaki ae mamaten nanom man te boki ae tabu?”

E tabe n iangoia Maja. “I tangiria ngke Iesu e kawariia Nibwaite.”

E rairaira iteranibaan Ana Boki Moomon. “Te karaki anne e moanaki n te ka-3 n Nibwaai.” E kotei iteranibaa. “Ti na ikaruoruo ni wareware ao n rinei taian kibu ake ti tangirii.”

E katoua atuuna Maja ao e ongora ngke e wareware Mami. E wareka taekan Iesu Kristo ngke e weteiia Ana abotoro. E wareka taekaia taan raoi ao te tataro.

Imwiina ai ana tai Maja. Ngke e bane teuana man taian kiibu, e toki. E namakinna ae kanga otan taai e ranea otana n ae bon tau n namakina te rau inanona.

E tararake n taraa Mami. “I tangira ane teuana anne.”

“Ngai naba. Tera taekana ae ko tangira iai?” E titiraki Mami.

E kakuii angana ngke e moangare. “Bon taekan Iesu. Ao e anganai namakinan te kukurei.”

E wiingare rikaaki Mami. “Anne bon te kawai ae tamaroa ngkai ko a kunea mamaten nanom man koroboki aika tabu. “Ko tangiria n tibwa anne n te Moanrinan?”

E katoua atuuna Maja. “Ko kona ni buokai n reiakinna?”

“Engi!” E taku Mami.

Mami ao Maja a kamatenikunai taeka teuana imwin teuana. Ngke a tabe ni mwakuri, taian manikiba a ketengetenge n taian aroka, ai aron a reiakinna naba.

Ni kabanea te wiiki, Maja e kataneiaia ana kibu ae boou ae maten nanona ni boki aika tabu. Moaningabongin te Tabati, e bon nako nanona teutana. E kamatenukanai atongan ana kibu man te boki ae tabu iaon kawaia ae abwabwaki nakon te taromauri.

Bon tii tabeman ataei n ana Moanrinan Maja. Ma ngke e nakonako inanon ana kiraatiruum, Maja e namakin taian bwebwe ni kiba n tobibi inanon birotona.

Ngke e a roko ana tai n tibwabwa, Maja e teirake ao e ikerake. “Nooria, bon Ngai te tua, ao te oota,” e taku. Tarai, ao teimatoa n uaa te toki, ao kam na maiu; bwa ane e teimatoa n uaa te toki ao N na anganna te maiu ae akea tokina.”

Ngke e a tia Maja, e tekateka ao e moangare. E koro bukina! Te nakonnano ake bweebwe a bua, ao te abuee, ao namakinan otantaai a oki. E ataia bwa ana kibu are mamaten nanona e bon uota te namakin anne ngkana e kainanoia.

Kamataata n te Tamnei iroun Chloe Dominique