Au Boki ni Korotamnei ibukin te Tembora

Mauri!

Arau bon Brayden, ao I maeka i Utah, USA.

N na tuangkami taekan au kouru are I karaoia ngke 10 au ririki.

E moanaki iaon mwanangara ni kawariia tibuu. Tibuu iai aia booki ibukin te tembora n aia ruu ni katangaina, ao I tangiria ni mamataku n tamneia. I iangoia bwa N na tangiria ni karaoa oin au boki ibukin te tembora. I karaoa au kouru ae maan-taina ni korei tamnein taian tembora.

I iangoia ni korea tamnein au moan tembora. I anaa au bentira, tarai tamnei iaonrain, ao I korea tamnein St. George Utah Tembora. Ngkanne I korea tamnei te Logan Utah Tembora ao te Manti Utah Tembora. Tinau e taekinna bwa N na kabonganaa te boki ni korotamnei ae bubura ibukin au tembora. Ngkai, teuana ao te iterana te ririki imwina, I a roko n au ka 81 n tembora, te Reno Nevada Tembora. Ai tii 105 tembora ae I waaki iaona!

Iai taai ake I a tangiria ni katoka au korotamnei iaon te tembora. Ngkana e riki aei, I tangiria n tataro ao ni butiia Tamau are i Karawa ni buokai rinanon mwakoro ake a kangaanga.

Te bwai teuana ae kakukurei iaon te kouru aei bwa e kanga n tia ni buokiia tariu aika karimwiiu bwa a na tatangira riki te tembora. Tariu ae Kade e korei tamnein taian tembora are e tangiria n kawarii teuana te bong, ao tariu ake tabeman a korei tamnein tembora ibukiia aia tia reirei ao raoraoia.

Au kouru e a tia naba ni buokai ni kunei tabeua ake a anaaki nanou iai. I tangiria ni karaoa te korotamnei! I moana karaoakin 3D katotongan tembora n tain te kabuebue ae nako, ao au kantaninga bwa N na riki bwa te tia kateitei ngkana I a ikawai.

Te kouru aei e a tia ni buokai n namakina kaaniau nakon Tamau are i Karawa ao Iesu Kristo. Ngkana I korea tamnein te tembora, I namakina te Tamnei. I ataia bwa taian tembora bon ana auti te Atua. Te tai ae aki maan nako, e reke au tai n rin inanon te Payson Utah Tembora ao ake tabeua. I namakina te Tamnei ae rang korakora ngke I karaoa te bwabetito n te tembora.

Ngkana I noora te tembora, e buokai ni kakorakoraai n rinean te eti.

Korotamnei iroun Brayden B.