Sa Rui ka Levu vei ira Lalai?

Ni sa Kidavaki Mai kina Lalai! A tucake tu e muailiu ni rumu o Sisita Agbor, na iliuliu ni Lalai nei Gift. “Nikua eda na vulica kina na sere ‘Love One Another.’”

Sa tekivu na ivakatagi, era sa vakarau na gonelalai me ra lagasere. Ia sa kila tu o Gift na sere oqo. Sa lagata ena drau na gauna o koya! E sega ni lomana dina tu me lagata nikua.

Sa oca o Gift na tiko ena Lalai. Sa qase tu o koya, balavu sara, ka levu cake mai vei ira kece na gone. Era sa tiko kece ena Goneyalewa ena gauna oqo na nona itokani ena lotu. Via dua na yabaki taucoko e se vo tiko vua ni bera ni rawa ni lako vata kei ira ki na kalasi kei na itaviqaravi ni Goneyalewa.

Nira lagasere kece, a galu toka ga o Gift. A vagugutaka eso na qaqa ni sere, ia e osooso na nona vakasama.

Sa qai yaco mai vua e dua na vakasama. De dua kevaka me veivosaki kei bisopi, ena laivi koya me lako totolo kina Goneyalewa me rawa ni tiko vata kei ira na nona itokani.

A raici Bisopi Achombi o Gift ni oti na lotu. “Bula bisopi,” a kaya. “Au vakila dina ni sa sega ni dodonu meu se tiko ga ena Lalai. Au sa levu cake ka qase cake mai vei ira kece na vo ni gone. E rawa beka niusa tekivu lako kina Goneyalewa?”

A matadredredre o Bisopi Achombi. “Au kila ni sa ka taleitaki na toso tu ki na Goneyalewa,” a kaya. “Ia sa rawa walega nio laki tekivu kina ni ko sa yabaki 12. Vosoti au.”

A raica sobu o Gift na nona ivava. “Sa donu.”

“Sa kalougata na Lalai ni o tiko kina,” a kaya o bisopi. “Au vakabauta nira dau qoroi iko vakalevu na gonelalai. O rawa ni cakava e dua na veisau levu kivei ira.”

Ena vo ni siga oya, sa yalorarawa o Gift. Dua na yabaki sa gauna balavu sara ni galili voli tu ena Lalai.

Ia sa vakasamataka vakalevu o Gift na ka a kaya o Bisopi Achombi. Era sa qoroi koya dina beka na vo ni gone? A se bera ni siqema ya o koya eliu.

Na macawa ka tarava, a vakamoce vei ira na nona itokani o Gift nira gole tu ki na rumu ni Goneyalewa. A vakatabuicegu o koya ka gole ki na rumu ni kalasi ni Lalai.

“Gift,” a kaci o Sisita Agbor, “ona lomasoli beka ni vukei au ni vakatavulica na sere ni macawa oqo?”

“Um, donu,” kaya o Gift. “Na sere cava eda vulica tiko?”

“‘Au Luve ni Kalou,’” kaya o Sisita Agbor. Vinaka na nomu veivuke. Au vakabauta ni ra na marautaka na gone na vuli mai vei iko.”

Ni sa tekivu na gauna ni lagasere, a tucake tu e muailiu ni rumu o Gift. “Nikua au na vakatavulica vei kemuni e dua na noqu sere taleitaki,” a kaya. Sa vukei ira na gone o koya me ra vulica na qaqana. Sa qai lagata vata kei ira na sere. Nira lagasere tu, sa lomavinaka o Gift ka marau saraga. E kila o koya ni sa vakila tiko na Yalo Tabu.

Sega ni dede, sa voleka tale ni cava na kalasi ni Lalai! Ni oti na masu ni suka, sa tekivu tu me gole kina olo o Gift. A vinakata o koya me raici ira na nona itokani ni oti na nodra kalasi ni Goneyalewa ka vakabula.

Ia a tarovi koya e dua vei ira na yalewa lalai. “Vinaka na lagasere vata kei keimami!” A mokoti Gift o koya. “Au vinakata meu vakataki iko niu sa levu cake.”

A matadredredre o Gift. E sega tikoga ni rawa ni wawa o koya me lako kina Goneyalewa, ka nuitaka tu ni na tasiri totolo na yabaki ka tarava. Ia sa kila o koya ni se rawa tikoga ni vulica ka cakava na ka vinaka eso ena Lalai.

Ka sa rairai dina beka o Bisopi Achombi. Sa rawa ni vakayaco duidui.

Droini mai vei Simini Blocker