Masulaki Alejandro

A vaqiqi yani o Gerardo kina ikabakaba e liu ni nona vale. A kele tu na motoka nei Mamá ena icurucuru mai. Kena ibalebale oya ni sa lesu mai vua na vuniwai o koya kei Alejandro na tuakana. A luvata o Gerardo na nona qiqi ni yava ka cici yani i loma.

“Gerardo?” A kaci o Mamá. “Keirau tiko eke!”

A curu yani kina rumu ni matavuvale o Gerardo. A davo koto ena idabedabe balavu o Alejandro. A dabe tikivi koya tu o Mama. E lomaleqa tu na kena irairai.

E lomaleqa tale ga o Gerardo. Ena macawa sa oti, era kila kina ni sa tauvi Alejandro na kenisa. Sa tauvimate bibi o koya.

Ia a dabe cake o Alejandro ka matadredredre ni curu mai o Gerardo.“Bula! “E vinaka li na nomu siga nikua?”

“Io, ia a vakaevei na vuniwai?” A taroga o Gerardo.

“E kaya o koya niu sa na sele,” kaya o Alejandro.

A deguvacu o Mama. “Ia na vuniwai vinaka sara me ra vukei koya sa tiko ena valenibula ni gone. Me vaka ni yabaki 14 o Alejandro, sa qase sara o koya me qaravi ekea. Meda na vaqaqara ena dua tale na vanua.”

E tadre na ketei Gerardo. Kevaka era sega ni rawa ni vukei Alejandro, na cava ena yaco? Ena ca vakalevu beka na kenisa nei Alejandro?

A lako kina nona rumu o Gerardo. Sa gadreva me vakasama.

Ena Lalai, a vulica o Gerardo ni na dau rogoci koya tu ga na Tamada Vakalomalagi. Sa kila o Gerardo ni na rawa tu ga ni kere veivuke Vua.

A qai tekiduru ena yasa ni nona loga o koya ka lobika na ligana. “Na Tamaqu Vakalomalagi, yalovinaka ni vukei Alejandro,” a masu o koya. “Yalovinaka vukei keitou ni raici ira na vuniwai ka rawa ni ra qarava na veisele.”

Sega ni dede sa kacivi koya o Mamá me laki vakayakavi. A caka pupusa tu o koya, ka dau taleitaka o Gerardo. A katia vakalevu o koya na tortilla qaqi vavaku e sinai tu ena jisi kei na bini. Ia e se lomaleqataki tacina tikoga.

O Alejandro a katia ga e vica na kena pupusa. A mata rarawa ka toso vakamalua tu o koya.

Sa na rairai siqema talega o Mamá. “Vakacava me tou sarava mada e dua na vidio ni Lotu?” a kerea o koya. Eratou dau taleitaka ni sarava na vidio baleti Jisu Karisito ni ratou yalorarawa.

“Sa donu.” A vagalalataka o Gerardo na veleti ka vakarautaka o Mamá na vidio. Ratou sa qai dabe sobu kece me sarasara.

Ena vidio, a masu o Jisu Karisito ena dua na were ena yasa ni dua na vunikau. Sa kila o Gerardo na italanoa oqo. A yaco ena gauna a vakararawataki kina o Jisu ni bera ni mate ena kauveilatai.

Ni sa cava na vidio, a loma malua ka vakacegu o Gerardo. Ia e dua tu na nona taro. “Na cava e vakararawataki kina vakalevu o Jisu?” a taroga.

A mokoti koya kei Alejandro vakavoleka o Mamá. “A digitaka o Jisu me vakila na mosi baleta ni lomani keda o Koya. A vakila o koya na mosi kece eda sotava.”

A raici Alejandro o Gerardo. “E kila li o Jisu na ka e vakilai tu ni veitauvi na kenisa?”

“Io, sa vakakina,” kaya o Mamá. “E kila o Koya na kena dredre. Baleta ni kila o Koya na ka e vakilai tu, sa kila o Koya na sala me vukei keda kina.“

E raragi na lomai Gerardo, me vaka e ovi tu ena dua na itutuvi levu. Na Tamada Vakalomalagi kei Jisu Karisito sa kila ka lomana tu na nona matavuvale. Rau sa kila na sala me vukei kina o Alejandro.

Ni lesu mai koronivuli o Gerardo ena siga ka tarava, a raica ni sa vakasosolo tiko o Mamá.

“iTukutuku vinaka!” a kaya. ”Au a veivosaki kei na vuniwai ena valenibula ni gone. Era sa na vukei Alejandro. Sa na sele tiko o koya nimataka.”

A mokoti Mama vakaukauwa o Gerardo. “Sa vukei kedatou tiko na Tamada Vakalomalagi! Rawa beka ni tou masu ka vakavinavinaka Vua?”

“Vakasama totoka,” kaya o Mamá. “Me kau mai o Alejandro.”

Ni ra masu vata tu, a loma vakacegu o Gerardo. E sa rogoca na nona masu na Tamada Vakalomalagi. Oqo sa na ciqoma o Alejandro na veisele e gadreva tu. Sa kila o Gerardo ni kila vakamatata tu o Jisu Karisito na ka eratou sotava tiko. Ka na vukei ira tu ga o Koya ena nodra veivakatovolei.

Droini mai vei Ricardo Guerrero