Dua na Koniferedi Vakatabakidua

“Aminah, oqori e noqu!” A kailavaka o Indira. A taura tani na doli mai vei tacina.

“Kemudrau na yalewa, au sa lako,” a kaci o Na. “Drau yalovinaka vei Ta.”

A rai cake o Indira. “O lako kivei?”

“Ki na makete. Au voli kakana meu vakasaqara e dua na ka vakatabakidua nimataka.” A yaloyalo ena vakamoce o Na.

Dua na kakana vakatabakidua? Na cava na vuna? Sa lako o Indira me vakasaqarai Ta. “Na cava e vakatabakidua tu nimataka?” a taroga o koya.

A matadredredre o Ta. “Nimataka tou na sarava kina na koniferedi raraba! E vakatabakidua baleta ni tou na rogoca na nodra vosa na parofita kei na iliuliu ni Lotu tale eso. Era na tukuna vei kedatou na ka e vinakata na Tamada Vakalomalagi me tou rogoca.”

Ni yaco mai vale o Na, sa maroroya sara na kakana. A taviraka na vuloa o Ta.

“Indira, o rawa beka ni vukei Aminah me vakarautaka na nona isulu ni mataka?” A taroga o Na.

A rubu na matai Indira. “Na cava meu vukei koya kina?”

“Yalovinaka cakava na ka au kerea,” a kaya o Na.

A vutugu o Indira. A yaraka na yavana ka lako me vukei Amina.

Na mataka ka tarava, a vakayadrati Indira ena dua na iboi totoka ni kakana. A rika mai na idavodavo ka cici yani ki valenikuro. A cakava o Na na rendang bulumakau kei na satay me ivakasigalevu malua! Ena kana vinaka sara.

Sega ni dede sa tekivu na koniferedi raraba. E dabe vata kei na nona matavuvale o Indira me sarava na Retioyaloyalo. A vakarorogo kina lagasere ni matasere. A rogoca na nodra vosa na tamata me baleta na valetabu kei na ivolanikalou kei Jisu Karisito.

Na iotioti ni vosa o ya na parofita, o Peresitedi Russell M. Nelson. A tukuna na sala e dau veivuke kina na Lotu vei ira na tamata e vuravura.

“Na noda reki levu duadua e yaco mai ni da vukei ira na tacida kei na ganeda,” a kaya o koya.

A vakasamataka na ka oya o Indira. Sa vakamarautaki koya beka na nona veivuke? A vakarorogo tikoga o koya. A kaya o Peresitedi Nelson ni sa rawa ni vukei keda meda vakataki Jisu Karisito.na bulataki ni karua ni ivakaro cecere.

Ni sa oti, ratou sa kania na vakasigalevu a cakava o Na. A vakasamataka tu ga o Indira na vosa ni parofita.

“Na cava na ikarua ni vunau levu?” a taroga o koya.

“Lomana na kai nomu me vaka ko sa lomani iko,” a kaya o Ta.

Sa vakasamataki ira na tamata e vukea tu na Lotu e vuravura taucoko o Indira. “Au na veivuke vakacava kevaka era vakaitikotiko vakayawa na wekaqu?”

“Na wekamu sai ira kecega na tu wavoliti iko,” a kaya o Na. “Vakataki ira na lewe ni nomu matavuvale.”

A rai sobu o Indira. E sega so ni dau yalovinaka vei iratou na nona matavuvale o koya.

Ia ena rawa ni vakamarautaki koya tu na nona vukei ira, me vaka a kaya o Peresitedi Nelson. Oqo e dua na sala e rawa ni muri Jisu kina. Sa vinakata o koya me tovolea!

Ena vo ni macawa, a saga tu o Indira me vinaka cake vei ratou na nona matavuvale. A qito vata kei Amirah. A wasea na nona vakatatalo. A cakava na ka e kerea o Na kei Ta ka sega ni kudruvaka. Ni vukea na nona matavuvale o Indira, ratou sa marau. Ka sa vakamarautaki koya talega.

Sa dina na parofita. Na nodra vukei na tani sa vakamarautaki koya!

Droini mai vei Judi Abbot