Meu na Vinaka SaraBeka?

A curu vakamalua yani o Henry kina rumu ni Lalai. E bibi na yavana ni yaco yani kina nona idabedabe.

A matadredredre vua na nona qasenivuli, o Baraca Rass. “O sa vakarau tu mo vosa me baleta na valetabu?” a taroga.

“Io,” a sauma o Henry.

Cava na vuna au kaya kina oya? A vakasamataka o Henry ni dabe sobu. A vakila ni sega ni vakarau tu. Sega sara ga.

Era vulica tiko na Lalai nei Henry na sere “I Love to See the Temple.” Era a kerei na nona kalasi me ra veivosakitaka na lako ki na valetabu.

Ia a rarawa o Henry. A vinakata me lako kina valetabu ni sa qase cake, ia e vakila ni sa cakava tu e vuqa na cala.

Era tucake yadudua na itokani nei Henry. Era a marau ka taleitaka na nodra veivosakitaka na lako kina valetabu ena dua na siga. Sa lomaleqa saraga o Henry.

Sa qai mai gauna ni lagasere. A lagasere vata kei ira na vo ni Lalai o Henry: “Au na vakarautaki au niu se gone; oqo na noqu itavi tabu.”

Meu na vakavakarau vakacava ni lako kina valetabu ni vuqa tu na noqu cala? E vakasamataka o Henry. A kino sobu ena nona idabedabe.

Ni sa cava na sere, a kala sobu yani o Baraca Rass. “O vinaka tiko?” a tarogi Henry.

A vakaraica sobu o Henry na ligana. A qai kaya vakamalua, “Au vinakata meu lako ki na valetabu, ia au rere niu sega ni kilikili.tu.” A cegu levu o koya. “Au sega ni dau veimaliwai vinaka kei na noqu matavuvale. Au guilecava meu qarava noqu itavi. Au dau cakava e levu na cala. E dodonu beka meu vinaka sara?

A matadredredre vakamalua o Baraca Rass. “Na bula kilikili ni lako kina valetabu e sega ni kena ibalebale mo vinaka sara. Eda rawa ni bula kilikili ena vakararavi vei Jisu Karisito ka tovolea vagumatua ni muria na ivunau. Eda caka cala taucoko, ia eda rawa ni veivutuni ka savasava tale.”

A dabe vakadodonu cake o Henry.

“Au kila ni sa dokai iko na Tamada Vakalomalagi ena nomu tovolea tiko mo vinaka,” kaya o Baraca Rass.

A vakasamataka o Henry eso na ka vinaka a cakava ena macawa oya. A vakasaqa vata kei Na, vukei ganena ena nona lesoni, ka vakabula vua e dua na gonetagane vou e koronivuli.

Sa tekivu me taluva na lomaleqa nei Henry. Sa kila o koya ni sa vukei koya tiko na Yalo Tabu me yalovakacegu.

Ni sa yaco mai na gauna me veiwasei o Henry, a matadredredre ka tucake. “Au vinakata meu veivutuni tikoga ka yaco me vakataki Jisu Karisito vakalevu meu rawa ni curu kina valetabu ena dua na siga,” a kaya.

Sa yalomarau o Henry ni dabe sobu. Dua na siga, sa na rawa vua me caka veiyalayalati tabu kei na Kalou ena loma ni valetabu. Sa vinakata o koya me sasagataka vakaukauwa me vakavakarau!

Droini mai vei Gail Armstron