Puleaina o Faamuamua Faatautava: Garma Mejia

Ou te mafaufau mo au pe afai ou te faapea atu, "O le a le mea e tasi na fesoasoani ou te sao ai mai se taimi faigata po o le puleaina o mea sa foliga mai o ni mea e sili ona faamuamua e faatautava ai?" O le manatu faavae lea o le "manatua, ia manatua." Aisea e fetalai tele mai ai le Tama Faalelagi ia i tatou i lena mea? Pe ona atonu e i ai so tatou uiga o le faagaloina? Pe ona atonu e te oo i lenei vavega matagofie ona, e te iloa ai lea, ua e alu e faaauau pea lou ala o le olaga, ona i ai lea o se isi luitau, ma e faigata tele ona talitonuina o le a lelei mea uma, ma o le a lelei mea uma? Ou te manatu ua fetalai mai le Tama Faalelagi ia i tatou ia manatua aua o loo Ia faamoemoe o le a tatou aoao e faalagolago atu ia te Ia. Afai e mafai ona tatou faatuatuaina o Ia, po o le a lava le auala e oo mai ai, o le a mafai ona tatou sao mai ai—ma o le a mafai ona tatou maua ma le olioli, ma le maufetuunai. E te iloa, Na te lei tuuina i tatou i luga o le fogaeleele ina ia faanoanoa. E tusa lava pe na tutupu ni mea faanoanoa ia i tatou, e le o i tatou na.

Pe a ou mafaufau i mea e faamuamua, ou te manatu moni lava i tulaga o le faagasologa o le foafoaga. E te iloa, o le filimaotiina pe faapefea ona e manao e faaaoga lou taimi, o mea e te manao e faaalu ai lou taimi i totonu, o le filifili moni lea o le mea e te manao e fatufatu. O le a le ituaiga o olaga e te manao e fatu mo oe lava? Ua ou iloa a ou avea le Atua ma a’u faamuamua ma talitonu o le a Ia fesoasoani mai ia te a’u e fausia se olaga matagofie, ona mafai lea ona sologa lelei mea o totoe. Ona ua ou iloa o na mea uma e mulimuli mai i lo’u manao e auauna atu i le Atua ma alofa ia te Ia ma faaali atu ia te Ia ou te alofa ia te Ia.

Pe a ou mafaufau i le ala ou te ola ai i lo’u olaga, ou te le mafaufau po o le a lo’u tagata i se galuega. Ou te taumafai e mafaufau po o ai e tatau ona avea ai au, ma o le mea lena e avea ma o’u Fetu i Matu. O le mea lena e taiala ai lo’u faaaogaina o le taimi ma mea e faamuamua o le alofa lena mo Keriso, lena alofa mo lo tatou Tama Faalelagi. Ma ou te manatu e i ai foi se vaega taua. Afai tatou te latalata i le Agaga, o le a Ia taialaina i tatou i la tatou malaga o le olaga. O le a Ia fesoasoani ia te oe e sagatonu i le taimi sa’o. O le a ia fesoasoani ia te oe e faia ni faaiuga e i ai ni taunuuga e faavavau—e pei o le faaipoipoga, aiga, lagolagoina o i latou e te alofa i ai, auauna atu ia i latou e te alofa i ai—ina ia le avea pea le taulaiga mo oe po o mea o loo e faia ae o le tagata ua avea ai oe.