Ua Tamau e Tamaitai Paia lo Latou Taulai atu ia Iesu Keriso

O se tasi o faamanuiaga sili ona matagofie o lo’u valaauga o le lagonaina lea o se alofa faagaeetia loto mo outou, o tamaitai O Le Ekalesia a Iesu Keriso o le Au Paia o Aso e Gata Ai. I mata o lo’u mafaufau, o loo tatou faatasi ma outou i o outou avanoa paia—atonu o loo potopoto i totonu o se falesa, po o lalo o se faleie, i se casita, po o le fale, po o lou falemautotogi—ma o loo tatou nonofo soosootuli ina ia mafai ai ona ou ta’u atu ou te alofa ia te outou, ma ou mautinoa o oe o se afafine o se Tama Faalelagi alofa, ma ua mautinoa foi e mafa ona e faatuatuaina Iesu Keriso.

O se meaalofa le nonofo faatasi ma uso o le Au Paia i le lalolagi atoa o e faaalia le malosi loloto, gafatia, talitonuga maumaututu, ma le faatuatua ia Iesu Keriso. O le alofa o le Atua mo tamaitai ua faaalia i le tuuina mai ia i tatou o le avanoa e aoao mai ai mai le tasi ma le isi.

O le a se mea ua ou iloa mai le taimi na faaaluina faatasi ma tamaitai o le Ekalesia a Iesu Keriso—o na asiasiga faaleauaunaga, o feiloaiga i le paka o taavale, ma talanoaga i faatauga meaai ma mea e faaaoga i fale?

Ou te iloa e faigata le olaga.

E mafai ona e faia mea faigata faatasi ma Iesu, pe e mafai foi ona e faia na o oe. O lau filifiliga lena. Ae a e faia le mea faigata faatasi ma Iesu Keriso, o le a paia le mea faigata. E avea outou ma tamaitai paia.

Sa ou feiloai talu ai nei i se uso i se paka o taavale. Sa sau o ia ia te au e ta’u mai ia te au sa i ai lana tama teine i se faalavelave tau taavale na taavalevale ma sa i ai i le falemai. Sa ia ta’u mai na maliu sana tama teine i se taimi na muamua atu i le kanesa. Sa ou manatu sa manaomia e la’u uo fou se faamafanafanaga mai ia te a’u. Ae e le o le mea lena sa ia manao ai. Sa lei sau o ia ia te au mo se faamafanafanaga, sa ia saili mai ia te au e faailoa mai le molimau, sa leoleoina lana tama teine e agelu o auaunaga, sa ia iloa o lana tama teine ua maliu o se tasi o na agelu, ma sa ia mautinoa e faavavau lona aiga ona o lona faamauga i le maota o le Alii. O se afafine o le feagaiga a le Atua, sa ia taulimaina luitau o le olaga ma le faatuatua ma le talitonuga i le fuafuaga o le fiafia a lona Tama alofa, le mana togiola o Iesu Keriso, ma le folafolaga a agelu ua i ai le tausiga o ia ma e pele ia te ia. Sa i ai pea sana tama teine i le falemai. Sa tumau le faigata o lona aafiaga faaletino. Ae sa filifili la’u uo e fai mea faigata faatasi ma Iesu Keriso nai lo le faia na o ia. O ana mea faigata na avea ma se taimi paia, o se vaitau paia.

Ou te iloa se uso sa i ai se fanau laiti e toafa sa ia tausia toatasia i latou ma faigaluega e tausi lona aiga ae na maua foi lona tina i le kanesa ogaoga. Sa ia ta’u mai ia te a’u, i lenei taimi matautia sa amata ai ona ia tatalo faatauanau atili ma faateleina—e oo lava mo se fesoasoani pe o le a faapefea ona ia fafagaina lana fanau. Sa ia faaaofia ai le fesoasoani a le Tama Faalelagi ma le Faaola. O le faatuatuaina o i Laua, sa ia saunia ai e osi feagaiga i le maota o le Alii. Sa faaletonu le soifua maloloina o lona tina, ae ui i lea sa latou malaga o se aiga ma uo i le malumalu aupito lata ane, lea na maua ai faaeega paia o la’u uo fou a o lei leva ae maliu lona tina. O loo tumau le faigata o lona aafiaga faaletino ae o le filifili e noatia i le Faaola e ala i feagaiga, ua faigofie teisi ai le ala agai i luma. E le faigofie, ae faigofie teisi, aua ua tele atu lona mauaina o Lona mana faamalolo, ma le mana faamalosi. Sa ou fesili atu ia te ia e uiga i lana sootaga ma le Faaola, na mamanuina i le afi o faigata. Sa ta’u mai e lenei tamaitai paia e faapea, na semanu e le mafai ona ia iloa ma faalagolago loloto ia Iesu Keriso e pei ona ia faia i le taimi nei pe ana leai nei aafiaga faigata

Tou te iloa, o le afi o le faamamaina e vevela. O le tau o le paia. E faaaoga e se tunu auro ma se faamama ario le afi e susunu ese ai mea le mama. Ae e le togiina e le tunu auro le ‘oa i totonu o le ogaumu ma savali ese. E mataitu ma le faaeteete e le tunu auro le vevela ma le taimi mo le tuuina atu o le okesene, ma vaavaai i le otaota siliva o faaputu i le laualuga o le uamea ua liu suavaia. E tafiesea e le tunu auro le otaota, ae tuua ai le ario mama, o lona laualuga e iila ma māmā—e pei o se faaata, e atagia ai le ata o le tufuga.

"O Ia [e faatatau ia Iesu Keriso] o le a nofo o se tunu auro ma se faamama ario." O i tatou o le ario taua, ua faamamaina ma filifilia i le ogaumu o puapuaga. Ma e pei o le ario ua faamamaina, ua susunuina ese faaletonu, e i ai o tatou uiga faaleatua, e avea i tatou ma ni tamaitai paia.

Pe o le a e iloaina, feiloai, ma talia le vaaaiga mataala a le Faamama Auro pe a e i ai i le afi o faigata?

Na fautua mai Peresitene D. Todd Christofferson: "I le totonugalemu o le afi a lenei faamama, nai lo le ita i le Atua, ia faalatalata atu i le Atua. Valaau atu i le Tama i le suafa o le Alo. Savavali faatasi ma i La’ua i le Agaga, i lea aso ma lea aso. Faataga i La’ua i le aluga o taimi e faaali atu lo laua faamaoni a’ia’i ia te oe. Sau moni ia iloa i La’ua ma iloa moni oe lava."

O le a faigata. E mafai ona e faia mea faigata faatasi ma Iesu, pe e mafai foi ona e faia na o oe. Ae a e faia le mea faigata faatasi ma Iesu Keriso, o le a paia le mea faigata.

O le tamaitai paia o Hana o se faataitaiga faatusi paia o lenei mataupu faavae.

Sa alu Hana i le maota o le Alii, lea sa tagi ai o ia. I se tatalo faamaualalo sa ia faailoa atu ai i le Atua le tiga o lona loto ma lona agaga faanoanoa ona sa leai sana tama. Sa lei muimui o ia. O se faamaoni moni lava ia te Ia e uiga i lona le fiafia ma le faavauvau loloto. Sa ia "sasaa atu [lona] agaga i luma o le Alii," ma lē taofia ai se mea, e ui lava sa Ia silafia moni le loloto o ona tiga.

Ona tauto lea o Hana i se tautoga—o se faailoaga o lona naunautai e faapaia lena mea na faamanuiaina ai o ia e le Alii i Ona faamoemoega. Sa ia tautino atu ma le lototoa: "Le Alii e o au, pe afai o le a e … avatu i lau auauna fafine se tamaitiiti, ona ou avatu lea ia te ia i le Alii i aso uma o lona ola."

Sa ta’u atu e Eli, le faitaulaga, ia Hana e "alu ma le filemu" ma faamautinoa atu ia te ia o lana talosaga i le

Alii mo se atalii o le a tuuina mai. O le agamalu o Hana na faamaonia i lana tali, "Ia tuu atu i lau auauna agalelei ia maua le alofa tunoa i lau silafaga." Ona ia tuumuli lea ma ona "foliga ua le toe faanoanoa."

I le aluga o taimi, sa faamanuiaina Hana i se atalii, o Samuelu. O le taimi lava na te’a ai o ia ma le susu, sa ia faamamaluina lana tautinoga e ala i le aumaia o le tamaitiiti i le maota o le Alii. Sa ia usuina viiga o le faafetai i le Alii i le tatalo. Sa ia alaga atu, "Ua olioli lo’u loto i le Alii." "E leai se paia e pei o le Alii: aua e leai se tasi e ese mai i [lau afio]; e leai se papa e pei o lo tatou Atua."

Ona ia tuua lea o Samuelu ia Eli le ositaulaga, ma tuuto atoa atu o ia i le galuega a le Atua. O se tamaitiiti faatoa te’a ma le susu. E mafai ona e vaai faalemafaufau i ai? Ina ua faamanuiaina mulimuli ane o ia i se isi fanau e toalima, i le taimi na ia nono atu ai Samuelu i le Alii, sa na o ia lava lana tama. Sa le mafai ona ia iloa o le a oo mai isi tamaiti. Sa lei fiafia o ia i taimi mu’amu’a uma lea e moomoo i ai se tina—o le vaavaai atu ia te ia o tamoe ma taalo, aoao o ia e alofa ma faasoa atu, ma faamoe o ia i le moega.

O tausaga taitasi pe a laua o atu ma lana tane i le maota o le Alii e fai a la osigataulaga i tausaga taitasi, na te aumaia se ofutele fou sa ia faia mo Samuelu. O le a sana tala na fai atu ina ua vaai ia te ia? O le a se lagona o lona loto faatina pe a toe faatofa atu foi i ai?

E le o faamatalaina e tusitusiga paia lona lototiga. Ae ou te vaai faalemafaufau i ai.

Tou te iloa, sa faamaoni Hana, ma sa faigata pea le olaga.

O o’u uso e o le Aualofa e aofia ai Hana i ona po nei, o tamaitai paia, o e e oo lava i o latou mafatiaga o tapuai i le maota o le Alii, anapopogi, sasaa atu o latou agaga atoa i le Alii i le tatalo, faapaiaina na mea ua faamanuiaina ai i latou e le Alii, tausia tautinoga na latou osia ma Ia, ma faalagolago i le Alii—i Lona finagalo mo i latou ma Lana taimi.

O loo tatou maua se aafiaga faaletino i tino e oo i ai le matua ma faama’i. O i tatou, ma isi, ua i ai le avanoa mamalu e faaaoga ai lo tatou faitalia, mo le lelei po o le leaga. O le a faigata. E mafai ona e faia mea faigata faatasi ma Iesu Keriso, pe e mafai ona e faia na o oe. Ou te mautinoa a outou faia mea faigata faatasi ma Iesu Keriso, e avea le faigata ma mea paia—vaitau paia, avanoa paia, tamaitai paia.

Talu ai nei, sa ou faalogo ai i tamaiti o pepese i upu nei:

Uso e, tatou te manaomia nisi Iesu Keriso. O Lona malamalama, Lona alofa, Lona faamoemoe, ma Lona mana faamalolo, ma faamalosi.

O tamaitai paia e taula’i atu la latou taulaiga ia Iesu Keriso. Tatou te "tautalatala e uiga ia Keriso, [tatou] olioli ia Keriso, [tatou] taumamafa fiafia i afioga a Keriso, ma fetaomi atu i luma ma le tumau ia Keriso." O le alofa mama, o le alofa le pona lena o Keriso, e le uma lava ia i tatou.

Afai, atonu, e te le o lagonaina le luitauina i lou aafiaga i le olaga nei, mafaufau i le fautuaga lenei mai ia Elder Neal A. Maxwell, "Pe a, mo le taimi nei, tatou te le o oo i ni luitau faapitoa, e tatau ona tatou i ai i vae o se isi tagata—e tumu i le loto malamalama ma ofo atu le faafouga faaleagaga."

O le galuega lena a tamaitai paia.

Ou te molimau atu o Iesu Keriso o lo tatou Togiola ma lo tatou Faamama Auro mataala, ma le alofa. Pe a tatou faalagolago ia te Ia i le afi o puapuaga, e avea taimi faigata ma vaitau paia, ma avea i tatou ma ni tamaitai paia. Ou te alofa ia te outou; Ou te mautinoa o outou o afafine o ni matua faalelagi alolofa, ma ou te mautinoa e mafai ona outou faatuatuaina Iesu Keriso.

I le suafa o Iesu Keriso, amene.