O Le Taulaga a Iesu Keriso Sa ma EMo Oe

Uso pele, ou te faafetai lava i taimi uma i le faatasi ai ma outou. Pe faafesagai pe i le agaga, o lou faamaoni ma le agalelei e ootia ma musuia ai au. Faamanuia outou mo le aumaia o le alofa ma le toomaga o le Faaola ia i latou o siomia outou. Matou te alolofa ia te outou, ma matou te tatalo mo outou.

I ni nai tausaga ua mavae, sa ou asiasi ai i se vasega pepe. Sa leai se taitai o le vasega pepe i lena aso, ma sa ou iloaina e leai se lesona na saunia. Sa ou tilotilo i le kapoti ma maua ai se tusi lesona ma filifili ai se lesona e uiga i le alofa o le Atua. Sa i ai se ata o tamaiti mai le salafa atoa o le lalolagi e faatusa i le alofa o le Atua mo tagata uma. Sa ou fesili atu i le vasega pepe laitiiti pe mafai faapefea ona oo atu le alofa o le Atua ia i latou uma. Sa sii i luga e se tasi o tamaitiiti laitiiti sagisagi fiafia e igoa ia Charlie ona lima ma alaga mai, "O le alofa o le Atua e TELE!" E moni, Charlie. O le alofa o le Atua e moni lava e "telē." O Lona alofa "e oo atu i [lo tatou] aapa atu" ma e tumau pea mo Ana fanau taitoatasi. E leai se tasi e tuusaunoa i Lona alofa. E pei ona aoao mai le Aposetolo o Paulo:

"Aua ua faatauanauina a’u, e lē o le oti, po o le ola, po o agelu, po o itumalo, po o mana, po o mea o i ai, po o mea o le a oo mai,

"Po o le maualuga, po o le loloto, po o se isi lava tagata, o le a mafai ona vavaeeseina i tatou mai le alofa o le Atua, o loo ia Keriso Iesu lo tatou Alii."

O le alofa sili o le Atua e faaalia e ala i le meaalofa alofa mutimutivale o Lona Alo, o Iesu Keriso. O a tatou feagaiga e fesootai ai i tatou ia te Ia ma Lona mana Togiola. Ona o Ia, ua mafai ai ona tatou salamo ma suia. Ona o Ia, ua mafai ai ona tatou maua le malosi ma le gafatia e sili atu nai lo o tatou lava malosi. Ona o Ia, ua mafai ai ona tatou maua le filemu paia ma le faamautinoaga "o le a faasa’oina tagata uma."

Na afio mai Iesu Keriso e fesoasoani e sii a’e a tatou avega ma tauave mea e le mafai ma e lei fuafuaina e tauave na o i tatou lava. Sei ou faasoa atu se faataitaiga patino.

I se taimi ua mavae, sa ou oo ai i se tulaga faigata lea na ou lagona ai le le mautonu ma le le faatauaina. Sa amata ona ave uma e lea tulaga o’u mafaufauga ma lo’u malosi. Sa ou mafaufau pe aisea na matuai ou popole ai lava. Sa ou taumafai ia ou fesoasoani, agalelei, ma manino, ae sa leai se mea na foliga mai na suia. Sa ou lagonaina le utia ma le matuai moomoo lava mo le toomaga ma le filemu.

I le lotolotoi o lo’u vevesi, sa ou tootuli ai i autafa o lo’u moega i se tasi afiafi ma amata ona tatalo i lo’u Tama oi le Lagi. Sa le mafai ona ou toe faia. Sa ou tagi ma faapea atu, "Ua le mafai ona ou tauavea lenei mea, ua tele naua, o le mea lenei e tatau ona avea ma Au. E mafai ona E aveina, faamolemole? Ou te tuuina atu lenei mea ia te oe. Faamolemole, fesoasoani mai ia te a’u." Sa ou ole atu mo se fesoasoani e ala i le alofa mutimutivale o Lona Alo. Sa ou manatuaina i lena taimi na puapuagatia Iesu Keriso mo a’u ma tauave o’u tiga, ma e ala mai ia te Ia, e mafai ai ona aveesea lenei avega. Sa ou lagonaina se faamoemoe faafuasei, e talitutusa ma le aafiaga o Alema le itiiti, o lē, i le manatuaina o le mana o le Togiola a le Faaola, na faapea mai, "A o taofimau lo’u mafaufau i lenei manatu, sa ou tagi ifo i totonu o lo’u loto: E, Iesu e, oe le Alo o le Atua, ia e alofa mutimutivale mai ia te a’u, o lē ua i ai i le au oona."

O le aso na sosoo ai, na amata ai ona suia e se filemu le mamafatu. O se filemu na sili atu i lo’u malamalama. O se filemu e faapea, sa i ai lenei tulaga i aao o le Tama ma le Alo ma sa le o sa’u e tauave. A o ou filifili e tuu atu la’u avega ia i Laua, sa ou lagonaina lo La alolofa ma le toomaga ma sa taialaina au ia iloa pe faapefea ona maua le lagolago sa ou manaomia.

Sa oo mai foi se vaaiga sili atu i lo’u loto ma lo’u mafaufau i aso ma vaiaso na sosoo ai. Ou te lei iloaina o se vaaiga e latalata atili atu i le ala e silafia ai e le Atua e mafai ona avea ma se meaalofa mamana i le faatoilaloina o tofotofoga tatou te feagai. Sa fesoasoani e tuu ai lenei tulaga i lona tulaga e tatau ai. Na avea e pei ona faamatalaina e le Alii "ae [o se] mataua" e faatusatusa i "mataupu e sili atu ona mamafa."

Sa le’i aluese le tulaga faigata, ae sa lei faatiga ia te a’u i le ala lava lea e tasi e pei ona sa i ai muamua, ma sa le toe puleaina e le tulaga o’u mafaufauga. Sa o se vavega moni lava. E na o Ia lava e mafai ona faia lenei ituaiga o avega mamafa faatiga agaga ia "mama."

I le lotolotoi o le mauaina o lenei toomaga, sa ou faitau ai i le mau lenei mai le perofeta o Senosa, lea o loo faamatala ai lo’u aafiaga: "Ma sa e faafofoga mai ia te au ona o o’u puapuaga ma lo’u faamaoni; ma ona o lou Alo sa … e alofa mutimutivale mai ia te a’u, o lea o le a ou tagi atu ai ia te oe i o’u puapuaga uma, ona o oe ua i ai lo’u olioli lea; ona ua e liliu ese au faamasinoga mai ia te au, ona o lou Alo."

Uso e, ia tatou filifili e talitonu ia Iesu Keriso ma ole atu mo le fesoasoani tatou te manaomia e ala i le mana o Lana Togiola. E i ai taimi atonu tatou te oo ai i tatou lava i le tulaga "otometi" lea e masani ona tatou talitonu o le a fesoasoani mai le Atua ia i tatou, ae tatou te le o ole atu ma le loto i ai ia te Ia i le faatuatua, ma filifili e talitonu e mafai moni lava ona Ia ma o le a fesoasoani mai ia i tatou. Ou te manatu ua faamoemoe lo tatou Tama oi le Lagi o oe ma au o le a ole atu mo le fesoasoani tatou te manaomia i le faamaoni o le loto ma le faatuatua o le taulaga a Iesu Keriso e mo OE. O Lana Togiola, o Ona puapuaga tiga, sa faia ma e mo oe. E alofa o Ia ia te oe ma e finagalo e faamalolo ma faamanuia oe i le fesoasoani e te manaomia, i le taimi nei ma le faavavau. Ma ua ia te Ia le mana e faia ai a o tatou faaalia lo tatou faatuatua, ola i a tatou feagaiga, ma filifili e talitonu ia te Ia.

Na aoao mai Peresitene Dallin H. Oaks: "Ona o Lona aafiaga togiola i le olaga nei, ua mafai ai e lo tatou Faaola ona faamafanafana, faamalolo, ma faamalolosia alii ma tamaitai uma i soo se mea, ae ou te talitonu Na te faia mo na o i latou o e saili ia te Ia ma ole atu mo Lana fesoasoani. … Tatou te agavaa mo lena faamanuiaga pe a tatou talitonu ia te Ia ma tatalo mo Lana fesoasoani."

Sa lei fuafuaina tatou te ui atu i o tatou luitau ma lototiga na o i tatou lava. Sa tatau ona i ai so tatou Faaola, o Le o lona mana paia, alofa, ma le toomaga e patino lava. E finagalo o Ia e faamalie ma faana le loto tiga.

O mafai ona e lagona o Ia o fetalai atu ia te oe e pei ona Ia fetalai atu i tagata o Alema i o latou puapuaga?

"Ina ea ia o outou ulu ma ia faamafanafanaina outou, ona ua ou iloa le feagaiga na outou faia mai ia te a’u; ma o le a Ou osifeagaiga ma oʼu tagata ma laveai i latou mai le pologa.

"Ma o le a ou faamamaina foi avega o i ai … i luga o o outou tauau, e oo ia te outou e lē mafai ona outou lagonaina i latou i luga o o outou tua, a’o outou i ai i le pologa; ma o le a ou faia lenei mea ina ia mafai ona outou tutu o se molimau mo a’u i se taimi o mulimuli mai, ma ina ia mafai ona outou iloa ma le mautinoa o A’u, o le Alii le Atua, ou te asiasi atu i o’u tagata i o latou puapuaga."

O le autu o le atavali sa ou faasoaina atu i la’u savali o le Konafesi Aoao ua mavae atu o le "Ma sa Ou Ai." E sau mai fetalaiga a le Faaola lava ia i le Mataupu Faavae ma Feagaiga a o Ia faamatalaina Ona tiga i Ketesemane:

"O le mafatia lea na oo ai ia te a’u lava, o le Atua lava lea, o lē ua silisili i tagata uma, le gatete ona o le tiga, ma tafetoto ifo ai i pu afu uma. …

"E ui i lea, ia i ai i le Tama le viiga, ma sa ou ‘ai ma faauma ai a’u tapenapenaga mo le fanauga a tagata."

Sa ai le Faaola ina ia mafai ona tatou salamo ma faamamaina. Sa ai o Ia ina ia mafai ona faamalosia, fesoasoani, ma faamaloloina i tatou. Sa ai o Ia ina ia siia’e a tatou avega ma tuuina mai ia i tatou le filemu. Sa ai o Ia ina ia mafai ona tatou toe foi atu i le afioaga o le Tama ma nonofo faatasi ma i latou tatou te alolofa i ai e faavavau. Sa ai o Ia ona o le alofa mo oe ma a’u.

O le uiga o lenei atavali ua suia i le aluga o taimi ona ua ou suia. O la’u sootaga ma le malamalama i lo’u Faaola ma mea ua Ia faia mo a’u ua faalolotoina.

O le auala tatou te vaai ai ia te Ia i o tatou olaga o le a suia a o tatou filifili e talitonu ia te Ia, aoao e uiga ia te Ia, salamo, ma tuu le moni o Lana Togiola e oo atu i vaega uma o o tatou olaga.

"Ou te iloa e alofa lo tatou Tama Faalelagi ma le Faaola ia te oe. Ou te iloa o loo soifua Iesu Keriso; o Ia o le Togiola o le lalolagi. O Lana Togiola e mo oe. Tau ina ia tatou ole atu i le faatuatua mo mea tatou te manaomia ona "tutu pea [e] vaai i le faaolataga a lo tatou Atua" o la’u tatalo lea. I le suafa o Iesu Keriso, amene.