O Le Alofa ma le Malamalama o le Atua e Tumau, E Le Fesuisuiai, ma e Mausali

O’u uso pele, po o fea lava o outou nonofo ai i le lalolagi, faamolemole ia iloa matou te alolofa ia te outou ma e alolofa foi lo outou Tama oi le Lagi ma lo outou Faaola ia te outou. Ou te iloa o nisi taimi atonu e faigata ona lagona lo La’ua alofa. Sa ou oo foi i na taimi. Ae ou te molimau atu ia te outou o lo La alolofa mo outou e le suia lava. E i ai pea iina e oo lava i na taimi pogisa i lou olaga lea atonu e faigata ona lagonaina.

O le toatele o i tatou e fiafia i aso manaia o le la, a ea! O lanu uma o le natura e sili atu ona susulu pe a susulu le la. I aso malulu, tatou te fiafia e lagona le la i o tatou foliga. E faatumulia ai i tatou i le mafanafana ma le malamalama. Ae, e mautinoa lava, e oo mai aso puaoa, timuga, ma pogisa pe a le mafai ona tatou vaai i le la pe lagona lona mafanafana ma ua lē āliga ma pogisa lanu uma. I na aso puaoa pe matagiā po o le pogisa o le po, pe tatou te masalosalo o loo i ai le la? Pe o tatou fefefe ea o le a le toe susulu mai le la? Oi e leai! Ua tatou iloa o le taimi lava e uma ai le afā po o le po, o le taimi lava e o ese ai ao, o le a tatou toe vaai ai i ave susulu o le la ma lagona ai lona mafanafana. O loo i ai pea le la iina, e le masuia ma e mausali. O se mea e tumau pea.

O se talafaatusa taua lenei mo le malamalama o lo tatou Faaola ma Lona alofa mo i tatou. E tuuina mai e Lona malamalama le lanu ma le uiga i mea uma i o tatou olaga. O Lona alofa e faamafanafanaina ai o tatou agaga ma tuuina mai ai ia i tatou le faamoemoe mo le lumanai. Ae e pei lava ona i ai aso puaoa, matagiā, ma aso pogisa pe a le mafai ona tatou vaai i le la, i la tatou malaga atoa i le olaga nei, o le a i ai foi aso puaoa, matagiā, ma pogisa pe a faigata ona lagona le alofa o lo tatou Faaola pe vaai i Lona malamalama. E i ai taimi tatou te lagona ai le pei ua toesea lo tatou Tama oi le Lagi ma lo tatou Faaola mai o tatou olaga, ma tatou te lagona le fefefe tele ua La tuulafoaiina i tatou, e le alolofa i La’ua ia i tatou, ma ua tuua na o i tatou. E oo foi ia Iosefa Samita ma le Faaola lava Ia na oo i aafiaga o le lagona o le tuulafoaiina e le Atua.

Ae, ou uso e, ou te tuuina atu la’u molimau ia te outou e leai se mea e mafai ona vavaeeseina i tatou mai le alofa o lo tatou Tama Faalelagi ma Iesu Keriso! O lo La’ua malamalama ma lo La alolofa mo i tatou e tumau, e le fesuisuiai, ma e le mafaagaeetia, e pei lava o le malamalama ma le mafanafana o le la. E le manaomia ona tatou fefefe ua La tuulafoaiina i tatou aua La te le faia lava. E le o o La’ua uiga le faia o lena mea.

Ou te manatua le lagonaina o le tuuatoatasi ina ua ma siitia atu i Mekisiko ina ua uma ona ma faaipoipo ma lo’u toalua. Mo le taimi muamua i lo’u olaga, sa ou nofo mamao ai mai lo’u aiga ma le auaiga sa ou ola ae ai. Ou te lei tautala pe malamalama lelei i le gagana, sa ou maitaga i le ma pepe muamua, ma sa tele ina alu lo’u toalua e faigaluega ma aoga. Ou te manatua le matuai lagonaina o le tuuatoatasi, leiloa, ma le fefe. Sa faigata ona ou lagona sa silafia au e lo’u Tama oi le Lagi. Sa le mafai ona ou lagona le mafanafana ma le malamalama o le alofa o lo’u Faaola. Sa amata ona ou lagona le pogisa, lotovaivai, ma le faanoanoa.

Ae na o mai nisi o o’u uso o le Aualofa e laveai. Sa latou opoina a’u ma fesoasoani ia ou lagona sa le o tuua na o a’u. Sa latou tuuina mai ia te au le faamalosiauga ma le lagolago e ala i o latou laufofoga fiafia, foliga agalelei, ma le alofa agamalu, e ui lava sa le mafai ona ou malamalama i a latou upu ma sa le mafai ona latou malamalama i au upu. Ae ona sa mafai ona ou lagona lo latou alolofa ma taliaina o au, sa gasolo ese ai ao o le pogisa lea sa ou lagonaina, ma sa amata ona ou toe lagona le alofa ma le lagolago a lo’u Tama oi le Lagi mo au.

Uso e, e mafai ona tatou faia lena mea mo le tasi ma le isi. O i tatou uma o afafine o ni matua faalelagi, ma e tatou te manaomia le tasi ma le isi. Po o fea lava tatou te nonofo ai, e tusa lava po o a o tatou tulaga faaletagata lava ia, e letatau lava ona tatou lagona ua tuua na o i tatou pe faaesea. Ua siomia i tatou e o tatou uso ma tuagane faaleagaga. Ua tatou o mai uma faatasi i le lalolagi i lenei taimi, ma e tatou te matua manaomia lava le tasi ma le isi. O le faaosoosoga e faatusatusa ma faamasino e le tasi le isi e sau mai le fili. E manao o ia e faafeeseeseai i tatou aua ua ia iloa le malosi sili o le a oo mai pe a tatou lagona le lotogatasi, alofa, ma le lagolagosua mo le tasi ma le isi. E mafai ona tatou fesoasoani i le tasi ma le isi ia lagona le alofa o lo tatou Faaola a o tatou taumafai ia lotogatasi o ni afafine o le Atua. Sei o tatou uulima, sii i luga le tasi ma le isi, ma savavali faatasii le fale.

Ou te talitonu e masani ona auina mai e lo tatou Tama oi le Lagi ma lo tatou Faaola ia i tatou savali o le alofa ma le lagolago, ae o le tele o taimi tatou te le iloa ai na savali aua atonu tatou te le o sailia. O le vaaia o se manutagi i fafo atu o lo’u faamalama, molimauina o se lagoto matagofie, pe tau o le matauina o mea matagofie ma mea ofoofogia uma o le natura, e masani ona fesoasoani ou te lagona ai lo La’ua alofa. Pe a faigata mea uma ma ou lagona ai le lotovaivai, o nisi taimi ou te iloa ai a Laua savali o le alofa ma le lagolago ona o se fuaiupu faapitoa o mau e pai mai i lo’u loto a o ou faitau, pe ona o se talanoaga musuia ma se tasi, po o se mea ou te lagonaina a o faalogologo i upu o se viiga matagofie po o se pese faagaeetia.

Ou te fiafia i upu o se tasi o a tatou viiga fou: "O Loo I Ai Lana Silasila i le Manuiti." Fai mai le fuaiupu muamua:

Ou te tuuina atu la’u molimau ia te outou, ua le na o le manuiti o i ai Lana silasila, ae o loo i ai i luga o outou taitoatasi. Ooe o se afafine faapelepele o le Atua, ma ou te molimau atu o le a le faagaloina lava oe. Ua iloa oe, e alofagia oe, ma e taua lou leo, aemaise lava i lou Tama oi le Lagi ma i Lona Alo e Toatasi na Fanaua. La’ua te malamalama lelei i ou lototiga, ou loimata, ou faanoanoaga, ma ou tiga. O au tatalo e faafofogaina i taimi uma e lou Tama Faalelagi alofa.

O lenei malaga i le olaga nei ua faatumulia i luitau ma faigata, e aofia ai le aveesea o ituaiga mea eseese—maliliu o ni uo po o ni e pele, leai o le soifua maloloina faaletino pe faalemafaufau, gau o mea tautupe, ma le leai o se gafatia ma le mautinoa. Ou te fiafia i le saunoaga a Elder Joseph B. Wirthlin e uiga i le leiloa: "E tauia e le Alii ē faamaoni mo mea uma ua leiloloa. O le mea e aveese mai ia i latou o ē alolofa i le Alii o le a faaopoopo atu ia i latou i Lana lava ala. E ui atonu e le oo mai i le taimi tatou te mananao ai, ae o le a iloa e e faamaoni o loimata uma i aso nei o le a iu lava ina toe faafoi mai ta’i sautuaselau i loimata o le olioli ma le lotofaafetai."

Ma sa saunoa le Perofeta o Iosefa Samita, "O le a faaatoatoaina a outou mea uma na leiloloa ia te outou i le toetutu, pe afai tou te faamaoni pea. E ala i le faaaliga a le Silisili Ese, ua ou vaai ai i ai."

Ou te molimau atu ona o lo tatou Faaola pele ma Lana taulaga togiola, ua moni ai na folafolaga. Afai e te tumau faamaoni i le Atua, o le a iu lava ina e toe maua au mea uma na leiloloa, ma o le a maligi ou loimata o le olioli ma le lotofaafetai i lou Tama Faalelagi mo Ana faamanuiaga tauia.

O lenei fuaiupu i le tusi o Faaaliga e masani ona aumaia ia te au le mafanafana ma fesoasoani ou te lagona ai le alofa o le Atua, "E soloiesea foi e le Atua loimata uma i o latou mata; e leai foi se toe oti, po o se faanoanoa, po o se aue, e leai foi se toe puapuaga: aua ua mavae atu mea muamua." Ia manatua foi le folafolaga lenei : "E galulue faatasi mea uma e lelei ai i latou o e ua alofa atu i le Atua." Oka ni upu matagofie ma le mafanafana! O Iesu Keriso o le malamalama ma le ola o le lalolagi, ma ua Ia folafola mai a tatou mulimuli ia te Ia, o le a tatou le savavali i le pouliuli.

Ou te molimau atu ia te outou o le a le galo lava oe e lou Tama oi le Lagi ma lou Faaola, e tusa lava po o ai oe, e tusa lava po o fea o e nofo ai, e tusa lava po o a ou tulaga o i ai nei, ma e tusa lava po o le a lou taimi ua tuanai. O lo La’ua malamalama ma lo La’ua alolofa mo oe e tumau, e lē fesuisuiai, ma e mausali. Ma a mavae atu ao ma afā o lou olaga, o le a e iloa ai sa Laua i ai iina e le aunoa faatasi ma oe, e oo lava i ou aso sili ona pogisa. I le suafa o Iesu Keriso, amene.