Toomaga ia Iesu Keriso

Susu maia, uso pele, i lenei faamanatuina o le faatuina ma le galuega a le Aualofa.

O lenei atavali maoae na saunia e Michael Malm o loo faaalia ai ma le matagofie ia tamaitai ma alii, tamaiti ma tagata talavou—o ituaiga eseese, ituaiga, ma taimi—o o mai i lo tatou Faaola, o Iesu Keriso. O le galuega lenei a le Aualofa: ia faamalosia le avea ma soo ia Iesu Keriso ma saunia ai e toe foi atu i le afioaga o o tatou matua faalelagi.

O outou o o matou uso. Ma o i matou o a outou.

I le amataga o lenei faigalotu, sa faailoa atu ai outou i le Aufono Faufautua Aoao a le Aualofa. Ua valaauina ma vaetofia i latou e fautuaina ma fefautuaai faatasi ma i matou i le taitaiina o uso o le Aualofa. E pei lava o outou, o i latou o tamaitai o le faatuatua tele—aemaise lava a o latou feagai ma faigata ma luitau o lenei olaga faaletino. O le tausaga lenei, ua outou maua ai le avanoa e musuia ai e i latou i vitio o talanoaga ua faalauiloaina i lenei faasalalauga.

I le lalolagi atoa, e silia ma le valu miliona tamaitai e auai i le Aualofa. O le tuuina atu ma le mauaina o le toomaga, faaletino ma le faaleagaga, tatou te latalata atili atu ai ia Iesu Keriso ma avea atili ai e faapei o Ia.

Matou te tatalo ia faatasi le Agaga ma outou a o outou faalogologo i a matou savali. Sa matou sauniaina ma le mafaufau ia te outou. Ona faamanuiaina lea o i tatou e faalogologo atu ia Elder Quentin L. Cook, o se sui o le Korama a Aposetolo e Toasefululua. Matou te alolofa ia te outou, tamaitai pele i le talalelei a Iesu Keriso. O outou o o matou uso.