Ua Faamanuiaina i Tatou Uma e ala i Tosinaga ma le Faatuatua o Tamaitai

Tuafafine pele, ou te fiafia lava i le mafai ona ou auai i lenei gaoioiga ofoofogia a le Aualofa. Ou te talisapaia mea uma ua tutupu. Ou te fiafia i savali na tuuina mai e Peresitene Camille N. Johnson, Sister J. Anette Dennis, ma Sister Kristin M. Yee.

Ua faamanuiaina a’u i ni tamaitai tulaga ese i lo’u olaga, ma ou te faafetai e faavavau mo la latou faatosinaga ia te a’u. O lo’u agaga faafetai e le oo i ai lo’u tomai e fesootai lelei atu ai. Sa latou sailia le tulaga aupito sili i vaega uma o o latou olaga ae ua faamamafaina le lagonaina ma le talisapaia o le alofa o le Atua i o latou olaga.

Ua faataitai mai e lo’u toalua o Mary lenei mea ma taumafai e ola i le "itu lagilelei o le auala."

Ou te lagona se tiutetauave maoae i le talanoa atu ia te outou tamaitai ofoofogia. Ua ia te outou lo’u alofa ma le faamemelo mo le tagata ua e i ai ma lou tuuto atu i le Alii ma Lana Ekalesia i lenei lalolagi faigata.

Tuafafine pele, faamolemole aua ne’i manatu faatauvaa i le mana ma le aafiaga o la outou faatosinaga gafatia, alofa, ma maaleale ia i latou tou te fegalegaleai. Tou te faamanuiaina le toatele a o outou taumafai e ola i ni olaga faaKeriso.

E i ai taimi, i lou manao faamaoni e mulimuli ia Iesu Keriso ma faia mea lelei, atonu e te lagona e tusa lava po o le a le malosi e te galue ai po o mea e te faia, e le lava lea. O nisi taimi e ui lava i le mea moni e faapea ua lagona e isi tagata uma ua e "sa’o," atonu e te lagona le le atoatoa ma le le aoga. Ae o le galuega silisili e te faia, o le agalelei e te faaalia, ma o le alofa e te faaali atu o faamanuiaga e le mafuatia ia i latou o e maua le avanoa e fegalegaleai ai ma oe, ma ua lava lea!

Ua tatou ola i se taimi faigata. Ua matua vāvāo moni lava le lalolagi. O le tele o luitau o loo i ai i le lalolagi faaleagaga. O ni faafitauli faaagafesootai ia e le mafai e i tatou o ni tagata taitoatasi ona foia ae ui i lea tatou te atugalu ai. O le faatalitonuina o tagata e filifili le amiotonu o se luitau ua leva ona i ai. Sa i ai lava i taimi uma le "faafeagai o mea uma." O le eseesega i le asō e faapea o le "fale tele ma le ateatea" o masalosaloga e foliga mai e leotetele, sili atu ona fefinauai, ma faaitiitia le faapalepale nai lo soo se taimi o lo’u olaga.

O le mea moni, o nei ituaiga o luitau sa i ai lava i taimi uma. E tasi le tausaga a o lumanai le faatulagaina O Le Ekalesia a Iesu Keriso o le Au Paia o Aso e Gata Ai, sa faaliliuina ai e le Perofeta o Iosefa Samita le Tusi a Mamona. Na faaali mai e le Alii ia Iosefa ma Oliva Kaotui le mea ua avea nei ma vaega e 6 o le Mataupu Faavae ma Feagaiga. O loo i ai fautuaga mo taimi faigata.

Sa faamafanafanaina i la’ua e le Alii, "Aua le matatau, le lafu mamoe itiiti e; fai mea lelei; ia tuu le lalolagi ma seoli e galulue faatasi faasaga mai ia te outou, aua afai ua atiae outou i luga o la’u papa, e lē mafai ona latou manumalo." Sa Ia fautuaina foi i la’ua, "Vaai mai ia te a’u i mafaufauga uma; aua le masalosalo, aua le fefefe. … Ia faamaoni, tausi i aʼu poloaiga, ma o le a oulua mautofi ai i le malo o le lagi. Amene."

O le toe tepa i tua i na uluai Au Paia, ua matua ootia ai lava i tatou i faigata sa latou onosaia ma le faataitaiga na latou tuuina mai o le iloaina o le alofa ma le auaunaga a le Atua i le tasi ma le isi.

O le faavaa po o le amataga mo le iloiloina o o tatou olaga ma tautinoga i le talalelei a Iesu Keriso o le papatisoga.

Mo le toatele o i tatou, sei vagana ai tagata fou liliu mai ma e laiti lava, o o tatou papatisoga ua tele tausaga ua mavae. Ua fetalai manino mai le perofeta maoae o Alema ia i tatou ina ua ia faapea mai, "Ma o lenei faauta, ou te fai atu ia te outou, … afai ua oo ia te outou se liuga o le loto, ma afai ua outou lagona le fia usuina o le pese o le alofa togiola, ou te fia fesili atu, e mafai ea ona outou lagonaina nei?"

O loo faaauau e Alema se savali loloto lea e matua talafeagai lava i o tatou aso. Ua ia fesili moni atu i le Au Paia, "Afai e valaauina i latou e feoti, mata o le a latou saunia e fetaiai ma le Atua?" Ona faamamafa atu lea e Alema uiga auaumama e fa ina ia le pona ai i luma o le Atua.

Muamua, pe o lava ea lo tatou lotomaualalo? I se tulaga, o se toe foi lea i le tulaga manaomia mo le papatisoga, faalotomaualalo i tatou lava ma le i ai o ni loto momomo ma agaga salamo.

Lua, pe ua tafiesea ea i tatou mai le faamaualuga? I le talanoa ai e uiga i le faamaualuga, sa apoapoai atu ai Alema e faasaga i le solia o le Paia e Toatasi i lalo o o tatou vae ma le faafefeteina i le faamaualuga, ma tuu atu o tatou loto i mea lē aoga o le lalolagi ma luga o oa, ma le manatu ua sili atu i tatou nai lo le tasi ma le isi, ma sauaina i latou o e lotomaualalo.

Tolu, pe ua tafiesea ea lo tatou lotoleaga? Mo i latou o e ua i ai faamanuiaga maoae ae latou te le lagona le lotofaafetai aua e na o mea o i ai i isi e mafai ona latou taulai atu i ai, o le lotoleaga e mafai ona sili ona matautia. Ua faateteleina le lotoleaga i sitaili o le olaga ona o le lauiloa ma le tamaoaiga ua suia ai le faatuatua ma le aiga o se faamoemoega autu mo le toatele o tagata.

Fa, pe tatou te faatauemu ea pe sauaina se uso po o se tuafafine? I le lalolagi i aso nei ua tatou vaaia ai le tele o nei mea i ala o faasalalauga faaagafesootai.

Mata e i ai se mea e sili atu ona talafeagai i faafitauli o loo i ai i o tatou aso nai lo lenei savali e uiga i le faamaualuga, lotoleaga, ma sauaga?

O le finauga tele i le salafa o le tele o le lalolagi e faatatau i faafitauli faaletino, ma faaletamaoaiga i lea aso ma lea aso. Ae e itiiti lava se talanoaga e uiga i le toe foi atu i mataupu faavae faaKeriso e taulai atu i sauniuniga e fetaiai ma le Atua, ma le tulaga o o tatou agaga. E manaomia ona taulai atu o tatou olaga ma faateleina le faamamafa i mataupu faaleagaga.

E musuia lava au i taimi uma pe a ou iloiloina mea na tutupu e tau atu i le faapaiaga o le Malumalu o Navu. Ua faagaeetia faapitoa lava au i le faatuatua o tuafafine. O le uiga lofituina lea e tafe mai ai o le faatuatua o tuafafine. O lo latou faatuatua i le talalelei toefuataiina a Iesu Keriso ma le Perofeta o le Toefuataiga, o Iosefa Samita, sa sili ona ofoofogia.

O nei tamaitai tuuto na faaalia lo latou faatuatua i le taua e faavavau o le faaeega paia ma le faamauga i le malumalu e ala i osigataulaga sa latou naunau e fai. Sa latou ositaulagaina o latou taimi ma nai oa laiti sa ia i latou. Sa latou faia foi, e ala i tofiga, le uluai galuega o sauniga na faatinoina i le malumalu o Navu. A o latou fesoasoani e saunia le Au Paia e tuua Navu, o le toatele o tuafafine na tuua faamaumauga o le fesoasoani i sauniga o le malumalu i le aso atoa ona kuka lea ma faamama i le tele o le po. Peitai, sa latou faamanino mai o le faatuatua ma le malamalama lea na faaee atu i o latou luga i le malumalu na mafai ai ona latou olioli a o latou agai atu i le le mailoa ma agai atu i laufanua valevalenoa.

Ua i ai i tamaitai anamua le tiutetauave sili atu mo le aiga ma le fanau ma o lea ua avea ai o se manao mo le puipuiga ma le mausali. O le faatuatua o tuafafine i le naunau e tuua Navu mo le le mailoa sa musuia.

O lagona tusifaamaumauina a Sister Patisepa Samita, a o sauni o ia e alu ese, e matua ootia lava. Sa vaai o ia i le tutu atu o tagata faatupu faalavelave e faasaga i le Au Paia i Misuri ma sa i ai i le maliu o le Aposetolo o Tavita W. Patten. A o feagai o ia ma le aveesea mai Navu, sa ia tusia:

"O lau faatinoga mulimuli i lena nofoaga taua o le faamama lea o potu, salu le fola, ma tuu le salu i lona nofoaga masani i tua atu o le faitotoa. Ma faatasi ai ma le lagona ootia i lo’u loto … , sa ou tapunia lemu le faitotoa ma faasaga atu i se lumanai e le mailoa, … sa faasaga i ai ma le faatuatua i le Atua ma le leai o se faamautinoaga itiiti o le faatuina mulimuli o le talalelei i Sisifo ma ona mataupu faavae moni tumau, nai lo le mea na ou lagonaina i na vaaiga faigata i Misuri."

Sa tusia e Sister Smith le mativa, ma’i, ma le tuulafoaiina lea na mafatia ai le Au Paia a o latou agai atu i sisifo. Ia Mati o le 1847, na maliu ai lona tina, ma o le masina na sosoo ai na fanau ai lona atalii lona lua o Ioane. O lana faamaumauga o lena mea e puupuu, "O ia o la’u tama mulimuli, ma sa na o le fa itula na ola ai o ia."

Mulimuli ane i lona olaga, sa avea o ia o le faatina o le Malumalu o Sate Leki ma le peresitene lona fa o le Aualofa Aoao.

Afai e tatau i se tasi ona faauigaina uiga sili ona taua o o tatou tuafafine paionia, o lo latou faatuatua le maluelue lea i le Alii o Iesu Keriso.

Ou te manatu o tamaitai o le Ekalesia i aso nei ua fai si malolosi ma faamaoni. O le maimoaina e ala i se tioata manino, o le faatuatua o se faailoaga lea o le alofa ma le talisapaia o le Faaola. Ona o Lana taulaga togiola, e leai se le fiafia e faaiu ma o le mea moni e leai se solitulafono e le mafai ona toe faaleleia. A o tatou taulai atu lo tatou faatuatua ia Iesu Keriso ma tumau i luga o le ala o feagaiga e mafai ona tatou ausia a tatou sini e faavavau.

O tulaga i le lalolagi i aso nei ua faateleina le manaomia o le faalolotoina o le liua o le tagata lava ia ma le faamalosia o le faatuatua i le Tama Faalelagi ma Iesu Keriso ma Lana Togiola. Ua saunia e aoaoga faavae ma tusitusiga paia a le Ekalesia se faafanua musuia e fesoasoani ia te oe i le faia o filifiliga amiotonu. Ua tuuina mai e le perofeta a le Alii, o Peresitene Dallin H. Oaks, le taitaiga fitoitonu mo o tatou aso. Ua saunia i tatou e le Alii, i lea fuaitau i luga o lea fuaitau, mo taimi faigata o loo tatou feagai nei.

E tusa lava po o a o tatou tofotofoga, faatasi ai ma le tele o le taitaiga faaleagaga ua tatou maua i le asō, o le a tatou le loto faafetai pe afai tatou le talisapaia o tatou faamanuiaga.

Faafetai atu mo le tagata ua avea ai oe ma mea o e faia. Ou te molimau atu ia te outou o Iesu Keriso o le Faaola ma le Togiola o le lalolagi. O loo soifua o Ia ma tuuina mai le alofa ma le taitaiga tatou te manaomia e toe foi atu ai ia te Ia. Ou te molimau atu ai i le suafa o Iesu Keriso, amene.