Mauaina o le Malosi ma le Toomaga ia Iesu Keriso: Dana Earl

I tausaga ua mavae, sa amata ai ona ou tusia i lalo tala mai lo’u olaga, mai le taimi na ou lagonaina ai le Agaga pe na ou lagonaina le uunaiga a le Faaola i lo’u olaga pe sa ou lagonaina Lona toomaga i se taimi na manaomia ai ona ou lagonaina o Ia. Ma sa amata ona ou tusia nei tala i lalo ona sa ou manao e tuuina atu i la’u fanau. Ae o le mea na tupu i le faagasologa o le faia o lenei mea o le, sa amata ona ou vaaia le aao o le Atua i lo’u olaga. Sa amata ona ou vaaia e ala i le tusiaina i lalo o nei aafiaga sa i ai le Atua iina mo au, ma sa ou vaai i Lona aao, sa ou maua nei aafiaga matagofie, ma sa ou maua se faamaoniga sa Ia tausia au ma sa ou iloaina sa i ai o Ia iina. Ma sa ou vaai faalemafaufau ua avea i latou ma nei meaalofa laiti e toetoe lava a mafai ona ou vaai faalemafaufau i le tuuina i totonu o la’u taga, e mafai ona ou feavea’i solo faatasi ma a’u. Ma ina ua ou maua se aso leaga po o se masina leaga, sa mafai ona ou tosoina mai lena aafiaga ma faapea atu, "Ou te iloa. Ona o lena aafiaga sa ou oo i ai sa moni, ma ou te le masalosalo ona sa ou maua lena aafiaga. Ma ua ia te au, ma o sa’u lava. "

Ma ou te manatu, ou te iloa, ua ou talitonu e finagalo le Tama Faalelagi ia tatou maua ni aafiaga ma Ia. Ou te talitonu o le mafuaaga lena e i ai ai a tatou tusitusiga paia—o le mea lea e i ai o tatou aafiaga ma Ia. Ioe, o a’u o se tagata e vaaia, o lea o la’u taga itiiti o aafiaga ou te tauaveina. Ma o ni aafiaga taitasi uma, e mafai ona ou aumaia pe a ou manaomiaina. Ma o le tusiaina i lalo na fesoasoani ia te au ina ia mafai ona ou toe manatuaina. Ma soo se taimi lava ou te manaomia ai, sa i ai lava iina.

O le mafuaaga la ou te manao ai e pue nei tala ma tausia e mo au lava ia o se molimau i mea na ou oo i ai ma mo la’u fanau ma a’u fanau ae ia molimau atu foi i lo’u Tama Faalelagi na ou vaai ia te Ia, na ou vaai ma iloa. Ou te lagona e pei o nisi o se kisi i le muaulu. Sa ou lagonaina lena mea, ma sa ou iloaina. Ma ou te manao e faailoa atu lena mea. Ma o lea sa faaauau ai ona ou tusia ina ia mafai ona ou faailoa atu sa ou vaai i ai pe lagonaina foi.