Puleaina o Faamuamua Faatautava: Sharlene Miner

O a’u faamuamua aupito tetele o le alofa i le Atua ma le alofa atu i isi. Na saunoa Peresitene Benson a tatou faamuamua le Atua, e pauu isi mea uma i lona tulaga e tatau ai. O le moni o le mataupu e eseese uma tulaga o loo tatou i ai. O nisi o i tatou e lagolagoina o tatou aiga, o nisi o i tatou e nofofua, o nisi o i tatou e i ai fanau, o nisi o i tatou e nonofo na o i tatou, ma o nisi e nafa ma aiga i fafo atu o a latou fanau. O le mea ua ou aoaoina o le, afai tatou te faamuamua le Atua, e pauu atu mea uma i lona tulaga e tatau ai. Na saunoa Peresitene Oaks, "O a tatou mea e faamuamua e sili ona iloagofie i le auala tatou te faaaogaina ai o tatou taimi." O lea ua ou iloa ai i le iloiloina o le auala ou te faaaogaina ai lo’u taimi, e mafai ona manino atili la’u vaai pe o ogatusa lo’u olaga ma mea ou te faamuamuaina.

O a’u o se fomai mo faalavelave faafuasei, ma ou te vaaia i latou e o mai i le falemai e mama’i pe tiga pe lei leva ona pipili pe ua maliu se tasi e pele i se faalavelave matautia. O a’u sini o le alofa muamua lea i le Atua ma ia alofa atu i isi. Ma i se taimi puupuu lava, e tatau ona ou faavaeina se sootaga o le faatuatuaina ma e tatau ona ou fesoasoani i isi tagata ia lagonaina le alofa o le Atua. Pe a ou alu e galue, ou te le manatu, "E mafai faapefea ona ou faalauteleina la’u galuega a o ou faigaluega i le asō?" O la’u tatalo i aso uma ae ou te lei alu e faigaluega o le, "E mafai faapefea ona ou fesoasoani i gasegase ou te vaai i ai ia lagonaina le alofa o Iesu Keriso?" E matuai taua foi pe a tuua e tagata le matagaluega o faalavelave faafuasei pe a uma ona matou fegalegaleai, latou te lagonaina le alofa o Iesu Keriso. Ou te le atoatoa i le faiga, ae o le a ou ta’u atu ia te outou o taimi uma lava ou te alu ai e galue, o taimi uma lava ou te ala ai i le taeao, o taimi uma lava o le a ou faia ai se fegalegaleaiga ma la’u fanau, o la’u tatalo lena, ia mafai ona latou lagonaina le alofa o le Tama Faalelagi e ala mai ia te a’u.

Ou te molimau atu e alofa le Tama Faalelagi ia te oe. E alofa o Ia i Ana fanau taitoatasi. Ou te molimau atu foi a o tatou saili e faasoa atu le alofa o Iesu Keriso i isi, o le a faatumulia o tatou lava loto. O le a faatumulia i tatou i le malamalama o Iesu Keriso, ma o le a mafai ona latou lagonaina Lona alofa e ala mai ia i tatou.