Bairean Mwakuri Aika a na Moanibwai ni Karaoaki: Sharlene Miner

Baika a bubura ao ni moanibwai irou bon tangiran te Atua ao tangiraia tabeman. E taku Beretitenti Benson bwa ngkana ti karimoa moa te Atua, ao a na bane n nakoraoi bwaai ni kabane. Koauan aei bwa a bane ni kakaokoro arora. Tabeman mai ibuakora a boutokaia ara utu, tabeman mai ibuakoara akea buuia, tabeman mai ibuakora iai natiia, tabeman mai ibuakoara a maeka n tingaia, ao tabeman a tabe ibukiia utu itinanuun ake bon oin natiia. I a tia n reiakinna bwa ngkana ti karimoa moa te Atua, ao a na bane n nakoraoi bwaai ni kabane. E taku Beretitenti Oaks, “A rang ni mataata aika a moanibwai iroura n aron kabonganaakina iroura.” Ngaia ae I kunea bwa ngke I kakaea bwa I kanga ni kabongana au tai, I kona n noria raoi ngkana e boraoi ma are moanibwai irou.

Ngai bon te taokita ibukin aoraki aika karina, ao I tararuaia naake a roko nakon te onaoraki aika aoraki ke a maraki ke n tibwa tia ni paralyzed (baeraraaiti) ke e a tia ni bua raona ae tangiraki n te kabuanibwai ae kakaiaki. Au kouru bon tangiran moa te Atua ao tangirakia aomata ake tabeman. Ngaia are n tai ae uarereke, I karekea te reitaki n te onimakinaki ao N na buokiia aomata bwa a na namakina ana tangira te Atua. Ngke I nako ni mwakuri, akea n au iango bwa, “N na kanga ni kanakoraoa nakoau ngkai I tabe n mwakuri n te bong aei?” Au tataro n tainako imwain ae I nako ni mwakuri e kangai, “N na kanga ni buoka te aoraki are I noria bwa e namakina ana tangira Iesu Kristo?” Bon te bwai ae rang ni kakawaki naba bwa ngkana a kitana te tabo n aoraki aomata imwiin aia reitaki ma ngai, bwa a namakina ana tangira Iesu Kristo. I aki kororaoi iai, ma N na tuangkami bwa n tainako ngkana I nako ni mwakuri, n tainako ngkana I uti n te ingabong, n tainako ngakana N na reitaki ma au ataei, anne au tataro, a bwa a namakina ana tangira Tamara are i Karawa mai irou.

I kakoaua bwa e tangiri ngkami te Atua te Tama. E tangiriia natina ni kabane. I kakoaua naba bwa ngkai ti ukoria n tibwaua ana tangira Iesu Kristo ma tabeman, a na kaonrakeaki nanora. Ti na kaonaki ma otan Iesu Kristo, ao ana kona n namakina Ana tangira mai iroura.