Ana Angakarea Iesu Kristo aeiBon Ibukim

Tariu aika kam tangiraki, I aki toki ni kakaitau ngkai I mena ibuakomi. Bwa tao ti itaramata ke n te tamnei, ami kakaonimaki ao raoiroimi a rotai ao ni kaungaai. Kam kakabwaiaaki ibukin uotakin Ana tangira ao ana kabebete te Tia Kamaiu nakoia naake irarikimi. Ti tangiri ngkami, ao ti tataro ibukimi.

N ririki aika mwaiti n nako, I kawara teuana te nursery kiraati. E aki kaoti te tia kairiiri n te nursery n te bong anne, ao I noria bwa akea te reirei ae katauraoaki. I tuoa nanon te kabwate ao I kunea te boki n reirei ao I rinea teuana te reirei i aon Ana tangira te Uea. Iai inanona tamneia ataei ni kabutaa te aonaaba ae tei ibukin Ana tangira te Uea ibukiia aomata ni kabane. I titirakiniia ataein te nursery kiraati bwa e kanga Ana tangira te Uea n rotiia ni kabane. Temanna te teinimwane ae tatauraoi ae arana Charlie e katea baina ao n taku, “E rangi ni BUBURA ana tangira te Atua!” E bon koaua, Charlie. Ana tangira te Atua e bon rangi ni “bubura.” Ana tangira e “riaon [are] ti rotia” ao e teimatoa ibukiia Natina n tatabemaniia nako. Bon akea ae kaonotaki nakon Ana tangira. N aron are e reireia te Abotoro Bauro:

“Bwa I taku bwa e boni koaua, bwa e aki kona te mate, ke te maiu, ke anera, ke uea, ke bwaai nabangkai, ke baika na roko,

“Ke te rietata, ke te rinano, ao e aki kona naba te bwai teuana ae karikaki, ni karaureira ma tangirara iroun te Atua, are i nanoni Kristo Iesu are ara Uea.”

Ana tangira te Atua ae korakora e kaotaki rinanon te bwai n tangira n akoi ae Natina, Iesu Kristo. Ara berita ae tabu e katomaira Nakoina ao nakon mwaakan Ana Mwakuri ni Kamaiu. Bwa Ibukina, ti kona n rairi nanora ao ni bitaki. Bwa Ibukina, ti kona ni karekea te korakora ao te konabwai ae riaon are iroura. Bwa Ibukina, ti kona ni kunea te rau ae mai ieta ao te kakoaua bwa “a na bane ni kaetaki bwaai ni kabane.”

E roko Iesu Kristo bwa E na buokiira n tabekirake rawawatara ao n uotii ake ti aki konai ao ake aki riai bwa ti na uoti n ti ngaira. N na karakina teuana ae I rinanona.

Tabeua te tai n nako, I a mena inanon te tai ni kangaanga are e a karekea te aki rau ao namakinan ae akea bonganau. Te bwai ae riki e a moanna ni kabwara nanou ao n anaa korakorau. I iangoia bwa e aera ngkai e a rangi n anganai te tabeaianga ae korakora. I kataia n rangi ni ibuobuoki, n akoi, ao ni mataata, ma akea te bwai ae riki. I a tiku ma te bwarannano ao n rangi ni kainanoa kan buokau ao te rau.

Ribuakon nako aki rauu, I katorobubua n te tairiki teuana irarikin au kainiwene ao ni moana au tataro nakon Tamau are i Karawa. Ai bon akea te bwai ae I kona ni karaoia. E rotai te tang ao n taku, “I aaki kona uotau, e a bon rangi n rawawata, aio tao ai bon Ibukim. Taiaoka, Ko kona n anaia? I a kanakoa aio nakoim. Taiaoka, buokai.” I bubuti buokau rinanon Ana nanoanga Natina. I uringnga n te tai anne bwa e korakai Iesu Kristo ibukiu ao e uota ni kabanerawawatau, ao bwa rinanona, e kona n anaaki te rawawata aio. I namakina reken te kantaninga, kanga ai aron are e rinanona Aramwa te teei, ngke, e uringa mwaakan Ana Mwakuri ni Kamaiu te Tia Kamaiu, e taku, “Ngke au iango e iangoa raoi te koaua aio, I tang inanou: O Iesu, ngkoe Natin te Atua, nanoangaai ngkai I mena n te aro ae kananokawaki ae moan te mao.”

N te bong are imwina, e a moanna n roko te rau n onea mwiin te rawawata. Te rau are e riaon mataatau mai imwaina. Te rau n atakina bwa te kangaanga aei e mena i nanon bain te Tama ao Natina ao tiaki ti ngai ae N na uotia. I rineia bwa N na kaaki rawawatau Iaoia, I namakina Aia tangira ao aia kabebete ao kairakiu bwa N na ata aron te buotoka are I kainanoia.

E roko naba te nonori ae korakora inanou ao n au iango i nanon boong ao wiiki ake imwiina. I aki ataia ae te nonori ae rangi ni kaan nakon ae ana nonori te Atua bon te bwaintangira ae mwaaka n tokanika iaon katakira ake ti kaitarai. E ibuobuoki ni kaeta te bwai ae riki aei nakon arona ni koaua. E riki n aron are e kabwarabwara te Uea “are [te] timna” ni kabotauaki nakon “bwaai ake a rang kakawaki riki.”

Bwaai aika riki aika kangaanga aki mauna nako, ma aikoa rotai n aron are I rinanona mai imwaina, ao te bwai ae riki anne e aki taonanako au iango. Ni koauana bon te kakai. Bon ti Ngaia ae e kona ni karika te aeka n rawawata n nano aei bwa e na “bebete.”

Imarenan karekean te kabebeteaki aei, I wareka te kibu mairoun te burabeti Tinoti, are e kabwarabwaraa te bwai are I rinanona: “Ao ko bon ongo irou ibukin karawawatakiu ma nanou ae koaua; ao bon ibukin Natim are ko … nanoangaai iai, ngaia are N na tang nakoim ibukin karawawatakiu ni kabane, bwa e mena kimwareireiu iroum; bwa ko a tia ni kanakoi ami motikitaeka ma irou, ibukin Natim.”

Tariu aine, ti a bane n rineia ni kakoaua iroun Iesu Kristo ao ni butiia te buoka are ti kainanoia n mwaakan Ana Mwakuri ni Kamaiu. N taai tabetai ti kona ni kunea ae rangi ni “baitii” iangoakina are ti bon tiku ni kakoauaa bwa e na buokiira te Atua, ma e aki nako mai nanora ae ti na Butiia ma te onimaki, n rineia ni kakoauaa ae E bon kona ni buokiira. I taku bwa Tamara are i Karawa E kantaningaia bwa ngkoe ao ngai ti na butiia ibukin te ibuobuoki are ti kainanoia ma nanora ni koaua ao n te onimaki bwa Ana anga karea Iesu Kristo bon IBUKIM. Ana Mwakuri ni Kamaiu, Korakaina ae korakora, a riki bon ibukim. E tangiriko ao n tangiria ni kamarurungko ao ni kakabwaiako ma te buoka are ko kainanoia, ngkai ao n aki totoki. Ao iai Mwaakana ni karaoi ngkai ti kamwakura ara onimaki, ni maiuakina ara berita aika tabu, ao n rineia ni kakoaua i Rouna.

E reirei Beretitenti Dallin H. Oaks: “Bwa ibukin Ana mwakuri ni kamaiu are e rinanona n te maiu aei, e kona ara Tia Kamaiu ni karau nanoia, ni kamarurungiia, ao ni kakorakoraia mwaane ao aine ni kabane n taabo nako, ma I kakoauaa bwa E karaoa aei ti nakoia naake a Ukoukoria ao a bubuti ibukin Ana buoka. … Ti tau ibukin te kakabwaia anne ngkana ti kakoaua i Rouna ao n tataro ibukin Ana ibuobuoki.”

Ti aki riai n rinanon kataakira ao rawawatan nanora i bon iroura. Ti katauaki bwa ti na karekea te Tia Kamaiu, Temanna are mwaakana mai karawa, ana tangira, ao ana kabebete e bon nako mai inanona. E tangiria ni kanako raoa ao ni kabebetea te nano ae rawawata.

Ko kona n ongo Ana taeka nakoim ngkai E taetae nakoia ana aomata Aramwa n aia tai n rawawata?

“Tabeki atuumi ao kabeebetei nanomi, bwa I ataa te berita ae tabu are kam a tia ni karaoia nakoiu; ao N na berita n ae tabu ma au botanaomata ao N na kamaiuia man te tautoronaki.

“Ao N na kabebetei naba taian uota ake … iaon angami, bwa kam na aki kona n namakin iaon nukami, n ami tai n tautoronaki; ao N na karaoa aio bwa kam aonga n riki bwa taan kakoaua ibukiu imwiin aio, bwa kam aonga n ataa te koaua bwa Ngai te Uea ae te Atua, I bon kaakawariia au botanaomata inanon aia tai n rawawata.”

Atuun te korobanna are I tibwaia n au marooro n te Maungatabu ni Kabuta ae nako bon “Ao I Nimma.” E reke man are e taekinna te Tia Kamaiu n Reirei ao Berita aika Tabu ngke E kabwarabwaraa aron Marakina i Ketetemwane:

“Te karawaawata are e karika nakoiu, Ngai ae te Aua, te kabanea ni korakora i buakomi ni kabane, bwa n na ruru ibukin te maraki, ao ni wawanako te rara man bwangabwangan kuniu. …

“E ngae n anne, te mimitong nakon te Tama, ao I nimma ao ni katia au katauraoi ibukia natia aomata.”

E nimma te Tia Kamaiu bwa ti aonga ni kona n rairi nanora ao n kaitiakaki. E nimma bwa ti aonga ni kakorakoraaki, ni buokaki, ao ni kamarurungaki. E nimma bwa E na tabekirake rawawatara ao N anganiira te rau. E nimma bwa ti aonga ni kona n oki rikaaki nako matan Tamara ao ni maiu ma naake ti tangiriia n aki totoki. E nimma bwa ibukin Ana tangira ibukim ao ibukiu.

Nanon te korobanna aei e a tia ni bitaki inanon te tai ibukina bwa I a tia ni bitaki. Reitakiu ao mataatau iaon au Tia Kamaiu ao aron te bwai are E karaoia ibukiu e a nano riki.

Arora n Noria inanon maiura e na bitaki ngkai ti rineia ni kakoaua Iaona, n reiakina Arona, n rairannano, ao ni bon ataa raoi Ana Mwakuri ni Kamaiu bwa e rooti nako mwakoron maiura.

I ataia bwa Tamara are i Karawa ao te Tia Kamaiu a tangiriko. I ataia bwa e maiu Iesu Kristo; bon te Tia Kamaiua te aonaaba. Ana Mwakuri ni Kamaiu bon ibukim. Ti a bubuti ma te onimaki ibukin te bwai are ti kainanoia ao imwiina “ti na tei [n] noora ana kamaiu te Atua” bon au tataro. N aran Iesu Kristo, amen.