Aine aika a Tabu a Katikui Aia Taratara iaon Iesu Kristo

Teuana mai buakon taian kakabwaia aika a tamaroa ni weteakiu bon namakinakin au tangira mai nanou nakoimi, ngkami ainen Ana Ekaretia Iesu Kristo ibukiia Aika Itiaki ni Boong aika Kaitira. N au iango, I mena ibuakomi n ami tabo aika tabu—tao ni botakimi i nanon te umwantabu, ke i aan te oning, i nanon te auti te kai, ke auti, ke n ami auti ni maeka—ao ti tekateka n toma bubuaniwaera bwa I aonga ni kona n tuangi ngkami bwa I tangiri ngkami, bwa I bon kakoaua bwa ngkami bon natin Tamara are i Karawa aine, ao bwa I bon kakoaua raoi bwa kam kona n onimakina Iesu Kristo.

Bon te bwaintangira te tekateka ma aine Aika Itiaki n te aonaaba ae bwanin ake a kakaota te korakora ae rianako, te konabwai, te onimaki ae nano, ao te onimaki iroun Iesu Kristo. E kaotaki aron ana tangira te Atua ibukiia aine n anganakira te tai n reiakinaki ao mairoura n tatabemaniira nako.

Tera ae N na ataia man aia tai ainen Ana Ekaretia Iesu Kristo ake a tia ni kabanea aia tai iai−taian mwakuri ni kakaawari, te kaitibo n taian tabo ni kamaangang, ao kakaraki i nanon taabo ni boobwai?

I ataia bwa e kangaanga aron te maiu.

Ko kona n rinanon taai ni kangaanga ma Iesu, ke ko kona n rinanona i bon iroum n ti ngkoe. Anne bon ami rinerine. Ma ngkana ko rinanon te kangaanga ma Iesu Kristo, e na tabu te kangaanga anne. Kam riki bwa aine aika kam tabu.

I kaitibo ma te aine n te tabo n kamaangang n te tai ae nako. E roko ao n tuangai bwa e reke n te kangaanga natina te aine n te kurati n te kaa ao n karinaki n te onaoraki. E kaotia naba bwa e a tia ni bua maiun natina naba te aine man te aoraki ae te kaentia. I ataia n au iango bwa raraou ae boou aei e tangira te karaunano mai irou. Ma tiaki ti anne te bwai ae tangiria. E aki ti roko irou ibukin te karaunano, e ukoria mai irou bwa N na kakoaua nakoina bwa e a tia n kawakinaki natina te aine iroua anera, e ataia bwa temanna mai buakoia anera akanne bon natina te aine are e a tia ni mate, ao bwa e bon ataia raoi bwa akea tokin ana utu man ana kabaebae i nanon ana auti te Uea. Natin te Atua te aine n te berita ae tabu, e katokanikaia man kangaangan te maiu ma te onimaki ao nanomatoana n ana babaire ni kakukurei Tamana ae tatangira, mwaakan Iesu Kristo ni kamaiu, ao aia berita anera bwa a na tararuaia ma ana utu ake e tangiriia. E bon mena naba ngkai natina te aine n te onaoraki. E bon teimatoa ni matoatoa te bwai ae rinanona n te maiu aei. Ma e rineia raraou aei bwa e na rinanon te kangaanga ae matoatoa ma Iesu Kristo nakon ae na rinanona n ti ngaia. E oneaki ana kangaanga nakon te tai ae tabu, te tai ae na reitinako n tabu.

I ataa te aine ma aman natina aika a uarereke are e kaikawaiarake natina i bon irouna man mwakurina n boutokaia ana utu ngke e reke iroun tinana te kaentia ae korakora. E tuangai bwa i nanon te tai n karawawata anne e moana karaoan ana tataro ae korakora riki ao n katoa tai−ibukin te buoka bwa e na kangaa ni kamwarakeia natina. E ukora ana ibuobuoki Tamara are i Karawa ao te Tia Kamaiu. N ana onimaki i Rouia, E katauraoia bwa e na karaoa ana berita aika tabu i nanon ana auti te Uea. E tabe ni kekerikaaki marurungin tinana, ma a mwananga n aia utu ao ma raoraoia nakon te tembora ae kaan, ike e a entaau iai ni waekoa raoraou ae bou aei tabeua te tai imwain maten tinana. E tiku n teimatoa ni kangaanga te bwai ae rinanona ni maiuna ma rineakina bwa ko na kabaeaki ma te Tia Kamaiu n te berita ae tabu, bon te kawai n waakirake n namakina te bebete. E aki bebete, ma e a bebete riki, ibukina bwa e reke irouna Ana kamaiu, ao mwaakana ni kakorakora. I titirakinna aron ana rereitaki ma te Tia Kamaiu, e aki raoiroi n ain te kakaitara. E kaotia nakoiu te aine ae tabu aei bwa e na bon aki kona n onimakina Iesu Kristo n aron ataakina ae nano ngkai irouna n akean taian kangaanga ake e rinanona.

Kam nooria, a rangi ni korakora taian kangaanga ake e na buoka te aomata bwa e na rikirake ao korakora. Bon te bwai ae tabu ae na rinanona te aomata. Te tia kaburoa ao ni kaitiaka te tirewa e kabongana te ai ni kaitiaki taian baereka. Ma te bwai ni kaitiaki e aki kateboa te atiibu i nanon te ai ae ura ao e a nako naba. E tararuaa te kabuebue ma te tai ni kaotan te kaeti are e ikeikeinaki te tia kaitiaki, tararuaa te tirewa are e kaburoaki bwa e na karika te biti ae matoa. E ukanako te mannang te tia kaitiaki, ao e tiku te tirewa, taraakina ae ranea ao n ota—n aiaron te kiraati, ae kaota tamnein te tia kaitiaki.

“E [ae Iesu Kristo] na tekateka n aron te tia kaburoa ao te tia kaitiaka te tirewa.” Ngaira bon taian tirewa aika kakaawaki, ti kaitiaki ao n rineaki man ain te karawawataaki. Ao n aron te tirewa are e a tia ni kaburoaki, a kabuekaki baerekara, ti karekea te aro n atua, ti riki bwa aine aika a tabu.

Ko na kina, ni kaitibo, ao n kaitaraa matan te tia kaitiaki ngkana ko a mena n ain te karawawataaki?

E reirei Beretitenti D. Todd Christofferson: “Ngkana ko mena inanon ana ai te tia kaitiaki, nakon ae kona kaota unim iroun te Atua, kaniiko nakon te Atua. Wetea te Tama n aran te Nati. Nakonako ma Tamneiia, ni katoabong. Anganiia aia tai bwa a na kaota Aia kakaonimaki nakoim. Roko n kinaiia raoi ni koaua ao n bon ataiko raoi ni koaua.”

E na bon rangi ni kaangaanga. Ko kona n rinanon taai ni kangaanga ma Iesu, ke ko kona n rinanona i bon iroum n ti ngkoe. Ma ngkana ko rinanon te kangaanga ma Iesu Kristo, e na tabu te kangaanga anne.

Te aine ae tabu ae Anna bon te banna ni katooto man te boki ae tabu n te reirei aei.

E nakon ana auti te Uea Anna, ike e tang iai. N ana tataro ae nanorinano e kaota rawawatan nanona ao tamneina nakon te Atua ibukin e aki kakariki. Tiaki te ngurengure. Bon te nano ni kokoaua ma Ngaia ibukin rawawatana ma korakaina. E "nurakina tamnein [neienne] i matan te Uea," n aki karabaa nanona, e ngae ngke E bon ataia ni koaua rawawatana n marakina.

Ao imwiina e anga te berita Anna−ae kaotan kukurein nanona n katabua are e a tia ni kakabwaiaa iai te Uea. E taku: “O te Uea, ngkana nanom … angan am toro te aine natina ae te mwaane, ao N na angan Iesu ni kabane ana bong ni maiu.”

Ao te ibonga ae Eri, e tuanga Anna "nako ma te rau" ao n berita nakoina bwa

e na anganna natina te mwaane te Uea. Nimamannein Anna bon kaotan te koaua n ana kaeka, "E na reke te akoaki iroun am toro i matam." Ao e wakinako ao e "aki manga mata ni kananoanga."

Imwina, ao e kakabwaiaaki Anna n reken natina te mwaane ae Tamuera. Ngke e a tia ni kakoririraki, e kakoroa nanon ana motinnano man uotakin natina te mwaane nakon ana auti te Uea. E anene n nebonebo ao n karabwarabwa nakon te Uea n te tataro. Ao e tataro, "E kakatonga nanou i nanon Iehova." "Akea temanna ae raoiroi n ai aron Iehova; Bwa akea temanna n ai [arom]; ao akea naba te bwaa ae rietata ae ai aron Atuara."

Ao e katuka Tamuera iroun Eri are te ibonga, ni katabua arona ni kabane nakon ana beku te Atua. Te ataei ae e a tibwa tia ni kakoririaaki. An bon iangoa anne? E kakabwaiaaki rimwi ma niman riki natina, n te tai are e katuka Tamuera nakon te Uea, bon ti ngaia natina. E aki ataia bwa e na manga riki imwina natina. E aki reke irouna kakukurein te tai are e a kaman kariariaa te tina−tararuakina ni biribiri man takakaro, reiakinana n tangira ao n tibwatibwa, kaweneana n ana kainiwene.

Ni katoa ririki n rorokona ma kainabana n ana auti te Uea ni karaoan aia angakareea ni katoa ririki, e uouota te niniira ae uarereke are e karaoia ibukin Tamuera. Tera ae taekinna ngke e nooria? Tera aron ana namakin nanon tinana ngke e nang manga kaboo naba ma ngaia?

E aki kabwarabwaraaki rotakin nanona n koroboki aika tabu. Ma I katamneia.

Ko nooria, E kakaonimaki Anna, ao e bon matoatoa aron te maiu.

Tariu aika kaain te Bootaki n Aine ni ikotako ma Anna ni boong aikai, aine aika tabu, are n aia tai n rawawata a nebonebo i nanon ana auti te Uea, a aki mamatam, bunrii nanoia nakon te Uea n te tataro, katabui ake e a tia ni kakabwaiaia iai te Uea, kawakin tuua ake a tia ni karaoia ma Ngaia, ao n onimakina te Uea−Nanona ibukiia ao Ana tai.

Ti rinanon waaki n maiura ae mamate aio i nanon rabwata aika a rorotaki n te kara ao aoraki. Ngaira, ao tabeman riki, iai naba taai nakoira ake ti kona ni kammwakura iai inaomatara, n te marurung ke te aoraki. Ma ngaia are e na bon matoatoa. Ko kona rinanon taai aika matoa ma Iesu, ke ko kona n rinanona i bon iroum n ti ngkoe. I bon koaua raoi bwa ngkana ko rinanon te kangaanga ma Iesu Kristo, e na tabu te kangaanga−tabu i nanon taai, tabu taabo, ao aine aika tabu.

N te tai ae nako, I ongo aia anene ataei ma taekana aikai:

Tariu, ti kainnanoa riki Iesu Kristo. Otana, Ana tangira, Ana kaantaninga, ao mwaakana, ni kamaiu ao ni kakorakora.

A barongai aia taratara aine aika tabu i aon Iesu Kristo. Ti "tataekina Kristo, [ti] kimwareirei inanon Kristo, [ti] kanuaira n ana taeka Kristo, ao waaki nako inanon Kristo." Te tangira ae kororaoi, anne bon ana tangira Kristo, ae aki kona n bwaka.

Ao ngkana ko aki namakina te korakora n am taneiai n te maiu aei, iangoa te reirei aei mairoun Unimwaane Neal A. Maxwell, “ngkana, inanon te tai ae uarereke, ngaira ngkana ti aki rinanon taian kataaki aika a onoti, ti riai ni buokiia naake a rinanon te kataaki—n rangi ni mataata n are a rinanona ao n anga te kamarurung n te maiu n tamnei.”

Anne aia mwakuri aine aika tabu.

I kakoaua bwa Iesu Kristo bon Tia Kamaiu ao ara Tia Kabooira ao te Tia Kaitiakiira ae tararuaira, ao n tatangira. Ngkana ti onimaki i Rouna i nanon ain te karawawataaki, a riki taai ni kaanganga bwa taai aika tabu, ao ti riki bwa aine aika tabu. I tangiri ngkami; I bonkoauabwa ngkami bon naati aine irouia ara karo mai karawa aika a tatangira, ao I bon koaua raoi bwa kam kona n onimakina Iesu Kristo.

N aran Iesu Kristo, amen.