A Teimatoa n Aki Bibitaki, ao n Mwaing Ana Tangira ao Otan te Atua

Tariu aika kam tangiraki, n taabo ake kam maeka iai n te aonaaba, taiaoka ma ataia bwa ti tangiri ngkami ao Tamara are i Karawa ma ami Tia Kamaiu a tangiri ngkami. I ataia bwa n tabetai e kona n kangaanga namakinan Aia tangira. A tia naba n reke irou taai akanne. Ma I kakoaua nakoimi bwa e aki bibitaki Aia tangira ibukimi. E memena n taainako ikekei i nanon boong buaka i nanon maiumi e ngae ngkana e na tara ni kangaanga namakinana.

A mwaiti mai buakora aika a tatangiri boong aika a riringa, ke ti aki! A otamwaaka riki karan bwaai aika katobibira ngkana e otamwaaka otan taai. N boong ni mwaitiro, ti tangira namakinan taai i aon ubura. E kaoniira ma abueena ao otana. Ma, aki kona n totokoaki, rokon uanangnang, kakarau, ao boong buaka ngke ti aki noora taai ke n namakina abueena ao n taanako man mangori karaia. N boong n uanangnang ao boong buaka ke i nanon rotongitongin te tairiki, ti nanououa ni kaotin taai? Ti maaku bwa e na aki manga otanako otaan taai? Ti na bon aki! Ti ataia bwa n te tai ni buaka ke n tokin te tairiki, n te tai are e betinako iai naang, ti na manga noora riki ootan taai ao n namakina abueena. E mena taai ikekei n taainako, e aki bibitaki ao n aki mwaingiing. E bon teimatoa.

Aio bon te kabotau ibukin otan ara Tia Kamaiu ao Ana tangira ibukira. E anga karana ootana ao ake ti kantaningai ni kabane i nanon maiura. E tatangira kabueean nanora ao n anganiira te kaantaninga ibukin taai aika a na roko. Ma n taai ake iai uanangnang, bongbuaka, ao boong aika roo ao n aki kona n noora taai, inanon mwananga, bon iai naba uanangnang, bongbuaka, ao boong aika roo are e kangaanga iai namakinan ana tangira ara Tia Kamaiu ao n noora otana. Tao e na iai taai a na taraa n bua man maiura Tamara are i Karawa ao ara Tia Kamaiu, ao ti namakina te maaku ae korakora bwa a kitaniira, bwa aki tangiriira, ao ti bon tiku n ti ngaira. E tia naba n rinanon te namakin ae aron anne Iotebwa Timiti ae kitanaki iroun te Atua.

Ma, tariu, I kaota au kakoaua nakoimi bwa akea ae kona ni kamaenakoira man aia tangira Tamara are i Karawa ao Iesu Kristo! A teimatoa n aki bibitaki, ao n mwaing Aia tangira ibukira, n ai aron otan ao abueen taai. Ti riai n aki maaku bwa A kitaniira ibukina bwa A na bon aki kona. Bon akea n anuan maiuia bwa a na karaoa anne.

I uringa namakinan te maroaa ngke ti mwaing ngkoa nako Mexico mwiin mareakiu ma kaainabau. Ai tibwa te moantai i nanon maiu, ae I maeka n raroanako man mweengau, ao utu ao rikiau. I tuai n bwaati n taetae ke n oota n te taetae, i aon kawaiu ni bung iroun ara moan nati, ao e nanako n angiin te tai kainnabau ni mwakuri ao n reirei. I uringa namakinan te maroaa ae korakora, te bua, ao te maaku. Akea namakinan Tamau are i Karawa bwa e ataa au kangaanga. I aki namakina abueen ao otan ana tangira au Tia Kamaiu. I a moanna n namakina te roo, te bwarannano, ao te bua n au kantaninga.

Ma a roko tabeman tariu n te Bootaki n aine ao n kaoka arou. A koonai ni baia ao n buokai bwa N na namakinna bwa I aki maroa. A kaungaa nanou ao n boutokaai n moangareia, taraia n akoi, aia tangira ae bebete, e ngae ngke I aki oota n aia taetae ao aki naba oota irou. Ma ibukin namakinan aia tangira nakoiu, e urua nangin te rotongotong are I a tia n namakinna, ao I manga moanna n namakina ana tangiraTamau are i Karawa ao ana boutoka nakoiu.

Tariu, ti kona ni karaoa anne i marenara. Ngaira nkabane bon naati aine irouia ara karo ake i karawa, ao ti kainnanoira i bon iroura. Bwa tao ti maeka iaa, ao tera arora, ti riai n aki manga namakinna bwa ti maroaa ke n tiku i bon iroura. Ti katobibiaki irouia tarira ao mwaanera n tamnei. Ti bane n roko nakon te aonaaba n te tai aei, ao ti rangi ni kainnanoira i bon iroura. Te kariiriaki ni kabotau ao n motika taekan temanna e bon roko mairoun te tia kakaitara. E tangiria ni kamaenakoira bukina bwa E ataia bwa e roko te korakora ngkana ti namakina te katiteuanaaki, te tangira, ao te boutoka i marenara. Ti kona ni ibuobuoki i marenara bwa ti na namakina ana tangira ara Tia Kamaiu ngkana ti keiaki ni katiteuanaira bwa naatin te Atua aika aine. Ti a taubai, tabekiiarake raora, ao n oki nakon mwengara ni ikotaki.

I kakoaua bwa a aki toki ni kakanakoa nakoira taekan te tangira ao te boutoka Tamara are i Karawa ao ara Tia Kamaiu, ma a mwaiti taai aika tiaki kinai rongorongo akanne bukina bwa tao ti aki ukorii. Noorakin te mannikiba itinanikun au wintoo, nooran bungin taai ae tamaroa, ke kunean tamaroan ao kamimiin te karikibwai a buokai n taainako n namakina Aia tangira. Ngkana a kangaanga bwaai ao I bwarannano, I kina n tabetai Aia rongorongo n tangira ao n boutoka man kibun te anene man koroboki aika tabu aika a riinga nanou n au tai n wareware, ke man te marooro ae kaunganano ma temanna, ke te bwai ae I namakinna n au kakauongo n taekan anene aika tamaroa ao kuuna aika a kaunganano.

I tangira taekan teuana te anene man ara boki n anene: "His Eye Is on the Sparrow." E taku te moan kibu:

I kaota au kakoaua nakoimi bwa aki ti mena matana i aon te mannikiba ae uarereke ma a bon mena i aomi. Ngkami bon natin te Atua aika aine, I kakoaua bwa kam na bon aki mwanuokinaki. Kam kinaaki, kam tangiraki, ao bwanaami a bon kakaawaki, riki iroun Tamami are i Karawa ao iroun Ana Rikitemanna. A bon atai marakin nanomi, ranin matami, ao rawawatami, ao marakimi. A ongoraeaki n taainako ami tataro iroun Tamami are i Karawa ae tatangira.

E onrake n taian kakaewenako ma kangaanga te mwananga n te maiu aei, ni ikotaki ma buan aika a mwaiti−buan raoraomi ke aika tangiraki, buan marurungin rabwatami ao ami iango, buan ami mwane, ke buan korakorami ao nanomatoami. I tangira are e taekinna Unimwaane Joseph B. Wirthlin ibukin te bwai ae bua: “E kaboi mwiin ake a bua mairouia aika a kakaonimaki te Uea. Are e kabuaaki mairouia ake a tatangira te Uea a na manga anganaki n oin Ana kawai. E ngae ngkana e aki roko n te tai are ti tangiria iai, a na ataia aika a kakaonimaki bwa a na bane ni kaokaki rannimata tebubua mwaitin rannimata ni kimwareirei ao ni kakaaitau.”

E taku te Burabeti Iotebwa Timiti, “Am bwai ni kabane ake a bua a na bane n karekeaki nakoim n tain te manga uti, ti ngkana ko teimatoa ni kakaonimaki. Man te mi mairoun are Moan te Rietaata, I a tia n nooria.”

I kakoaua anne man Ana anga karea ni kamaiu te Tia Kamaiu, a koaua ni kabane berita akanne. Ngkana ko teimatoa ni kakaonimaki nakon te Atua, bwaai ni kabane ake a bua mairoum a na manga kaokaki nakoim, ao kona katuua rannimata ni kimwareirei ao ni kakaaitau nakon Tamam are i Karawa ibukin Ana kakabwaia ni kabomwii.

Te kibu n te boki ae te Kaotioti e uouota nakoiu te rau ao e buokai n namakina ana tangira te Atua," Ao E na kabane rannimataia te Atua ni kaoi mai mataia; Ao e na akea riki te mate, ao e na akea naba te nanokawaki, ma te tang ma te maraki: bwa a mauna nako bwaai rimoa." Uringa naba te beritaaio: “A bane ni ibuobuoki ni karika te raoiroi ibukiia akana a tangira te Atua.” Taeka aika tamaroa man karaunano! Iesu Kristo bon te ota ao maiun te aonaaba, ao E a tia ni berita bwa ngkana ti iriiria, ti na bon aki nakonako n te rotongtong.

I kakoauaa nakoimi bwa a na bon aki mwanuokini ngkami Tamara are i Karawa ao ami Tia Kamaiu, bwa tao antai ngkoe, ko maeka iaa, tera arom, ao tera arom rimoa. A teimatoa n aki bibitaki, ao n mwaing Aia tangira ibukira, n ai aron otan ao abueen taai. Ao ngkana a nako naang ao angibuaka man maium, kam na ataia bwa A teimatoa ikekei ma ngkami, i nanon naba boong aika a rotongtong. N aran Iesu Kristo, amen.