Pag-uswag sa Doktrina

Niadtong Disyembre 1830, usa ka pagpadayag ang misugo sa mga miyembro sa Simbahan nga “magpundok nga maghiusa didto sa Ohio” (Doktrina ug mga Pakigsaad 37:3). Wala madugay human niana, atol sa komperensiya nga gipahigayon diha sa Panimalay sa mga Whitmer sa Fayette, New York, ang mga Santos nagtinguha og dugang katin-awan sa sugo nga magpundok. Agig tubag, misaad ang Ginoo nga didto sa Ohio Iyang ihatag kanila ang Iyang balaod ug nga sila “pagatugahan og gahom gikan sa kahitas-an” (Doktrina ug mga Pakigsaad 38:32).

Human niini nga mga pagpadayag, ang Simbahan nahimutang sa amihanang-sidlakan sa Ohio gikan sa Pebrero 1831 hangtod Enero 1838 samtang si Joseph Smith ug ang iyang pamilya nagpuyo sa sulod ug palibot sa Kirtland. Panahon kini sa pagpadayag, pag-uswag, kausaban, kadaogan, ug trahedya samtang si Joseph miuswag ngadto sa iyang tahas dili lang isip usa ka tigpadayag apan usab isip usa ka lider sa komunidad ug espirituhanong magtatambag alang sa mga Santos sa Ulahing mga Adlaw. Atol niining higayona, nakadawat si Joseph og daghang pagpadayag nga mipahiuli sa kahibalo nga nawala tungod sa taas nga mga siglo sa apostasiya. Kini nga mga pagpadayag nakapausab sa mga panglantaw sa mga Santos sa Ulahing mga Adlaw sa kalibotan, sa kinabuhi human niini, ug sa plano sa Dios sa kaluwasan. Naglangkob usab kini og mga kabag-ohan nga mipahibalo pag-usab sa mga panan-aw sa mga Santos sa Ulahing mga Adlaw bahin sa paglalang ug sa Pag-ula ni Jesukristo. Kini nakaaghat sa mga Santos sa pagtukod og mga institusyon nga mangita og bag-ong mga kinabig, moseguro sa seguridad sa komunidad, mopakunhod sa kakabos, ug mobayaw sa tanan.

Kini usab nga mga pagpadayag nagmugna, nag-usab, ug naglugway sa mga estruktura sa pagdumala sa Simbahan ug nagpalapad sa pagsabot sa gahom ug estruktura sa pagkapari. Nanawagan usab sila sa mga Santos sa pagtukod og balay sa Ginoo—usa ka templo diin sila moapil sa bag-ong gipahiuli nga mga ordinansa ug modawat sa gisaad nga pagtuga.

Sa usa ka pagpadayag nga nadawat sa adlaw nga naabot si Joseph sa Kirtland, ang Ginoo mitudlo nga “pinaagi sa inyong matuohon nga pag-ampo makadawat kamo sa akong balaod, aron masayod kamo kon unsaon sa pagdumala ang akong simbahan ug sa pagbuhat sa tanang butang sa tukmang paagi sa akong atubangan” (Doktrina ug mga Pakigsaad 41:3). Daghan sa unang mga kinabig sa Kirtland ang mga sakop sa “ang pamilya” nga nagpuyo sa Umahan sa mga Morley. Kini nga grupo naningkamot sa pagsunod sa unsay ilang nasabtan isip angay sa Bag-ong Tugon sa pagbaton sa “tanang mga butang nga ilang gihuptan” (Mga Buhat 4:32). Naobserbahan ni Joseph Smith nga ang mga paningkamot sa pamilya dalaygon apan dili magpadayon. Sa pagkasayod nga pinaagi sa pag-ampo sa hugot nga pagtuo ang Ginoo mopadayag sa gisaad nga balaod, mipatawag og miting si Joseph Smith sa napulog duha ka elder niadtong Pebrero 9, 1831, lima lang ka adlaw human siya naabot sa Ohio.

Atol sa miting, kadtong mitambong misunod sa tawag sa Ginoo sa pag-apil sa pag-ampo sa literal nga paagi. Human sila “nahiusa sa hugot nga pag-ampo, ug nagkauyon mahitungod sa pagdawat sa Balaod,”¹ ang mga elder nangutana bahin sa praktikal ug dinalian nga mga panginahanglan sa Simbahan. Agig tubag, si Joseph Smith midiktar sa sunod-sunod nga mga tubag gikan sa Ginoo, nga nahimong basehan sa usa ka pagpadayag nga nailhan dayon isip ang balaod sa pagpahinungod ug pagkatinugyanan o sa yano ang Balaod (tan-awa sa Doktrina ug mga Pakigsaad 42). Kini nga pagpadayag nagtudlo sa mga Santos kon unsaon sa pagpundok, pag-atiman sa usag usa, ug pagpadayon sa ekonomikanhong pagkapatas nga dili isalikway ang personal nga pagpili ug responsibilidad.

Samtang nagtrabaho gihapon sa paghubad sa Basahon ni Mormon, si Joseph Smith ug Oliver Cowdery nagpaabot sa paggamit sa ilang mga gasa sa “pagdala ngadto sa kahayag . . . niadtong mga bahin sa akong mga kasulatan nga gitagoan tungod sa pagkadaotan” (Doktrina ug mga Pakigsaad 6:27). Niadtong Oktubre 1829, si Joseph ug Oliver mipalit og dako nga edisyon sa King James nga Bersiyon sa Biblia gikan sa bookshop ni E. B. Grandin. Pagka Hunyo 1830, uban sa Basahon ni Mormon nga naimprinta na ug ang Simbahan nga naorganisar, si Joseph ug Oliver misugod sa pagtrabaho sa ilang ikaduhang dako nga proyekto sa paghubad: ang dinasig nga paghubad sa Biblia.

Dihang mibiya si Joseph Smith sa estado sa New York, ang iyang trabaho sa dinasig nga paghubad sa Biblia nagsugod na. Nianang panahona, si Joseph nakadiktar na sa importanteng mga rebisyon ug dagkong mga pagdugang sa panan-awon ni Moises ug sa asoy ni Enoch nga makita sa Genesis.² Sa adlaw nga siya ug si Emma naabot sa Kirtland, usa ka pagpadayag ang mimando sa Simbahan nga “[magtukod] og balay” alang ni Joseph aron siya mahimong “magpuyo ug maghubad” (Doktrina ug mga Pakigsaad 41:7). Gikonsiderar ni Joseph Smith ang iyang trabaho sa dinasig nga mga rebisyon sa Biblia nga usa ka “balaan nga mando” ug usa ka importante nga “sanga” sa iyang tawag isip usa ka propeta.³ Ang trabaho ni Joseph Smith sa mga rebisyon sa Biblia usa ka “direkta nga tigpasiugda alang sa daghang pagpadayag” diha sa Doktrina ug mga Pakigsaad, nga “naglakip og labaw pa sa usa ka dosena nga mga seksiyon nga direktang naggikan sa proseso sa paghubad o naglangkob og mga instruksiyon alang kang Joseph ug sa uban mahitungod niini.”⁴

Ang tahas sa paghubad sa Biblia sa pag-aghat sa pagpadayag tingali labing makita diha sa pagpadayag nga nadawat ni Joseph Smith ug Sidney Rigdon niadtong Pebrero 16, 1832. Pipila ka semana ang milabay, ang mga paningkamot ni Joseph Smith sa pagdumala sa misyonaryo nga buhat sa palibot sa Hiram, Ohio, nakapahilayo kaniya gikan sa iyang trabaho sa paghubad. Sa usa ka pagpadayag nga nadawat niadtong Enero 1832, ang Ginoo mimando niya nga ipadayon ang paghubad ug sa pagtutok niana nga buhat “hangtod nga mahuman kini” (Doktrina ug mga Pakigsaad 73:4).

Wala pay usa ka bulan ang milabay, samtang gihubad ang Juan 5:29, si Joseph Smith ug Sidney Rigdon, kinsa nagserbisyo isip tigsulat, adunay panan-awon nga bukas ngadto kanila. Nailhan sa mga Santos nianang higayona isip yano nga “ang Panan-awon,” kini nga pagpadayag naglangkob og halapad nga bag-ong impormasyon mahitungod sa pagkabanhaw sa mga patay ug sa tulo ka gingharian sa himaya nga naghulat nato sa sunod nga kinabuhi (tan-awa sa Doktrina ug mga Pakigsaad 76). Agig dugang, kini nga pagpadayag nagtudlo kanato nga pinaagi ni Kristo “mga kalibotan nalalang,” ug niana, isip “mga anak nga lalaki ug mga anak nga babaye sa Dios,” tanang babaye ug lalaki makaangkon og mahangtorong balaanong kinaiya (Doktrina ug mga Pakigsaad 76:24).

Daghan sa mga pagpadayag nga nadawat niini nga panahon naghatag og pagpalapad ug pagpaklaro alang sa pagkapari. Sa dihang kini nga mga pagpadayag gimantala sa unang edisyon sa Doktrina ug mga Pakigsaad, daghan niini ang gitakda nga dunay ulohan nga “Sa Pagkapari” ug “naghatag og giya ug direksiyon sa pagkapari ug sa pagdumala sa Simbahan.”⁵

Pipila niini nga mga pagpadayag nagpasabot og piho nga mga katungdanan ug mga korum ug sa ilang mga gimbuhaton sa pagdumala. Hinuon, ang ubang mga pagpadayag, naglatid sa doktrina sa Pagkapari, nagpasabot sa mahangtorong kinaiya niini, ug nagtudlo kanato nga ang gahom sa pagkapari mao ang gahom sa Dios nga nagdasig sa mga babaye ug mga lalaki ngadto Kaniya pinaagi sa mga pakigsaad. Niadtong Septiyembre 22 ug 23, 1832, nadawat ni Joseph Smith ang taas nga pagpadayag kabahin sa pagkapari samtang nagmiting diha sa usa ka konseho uban sa duha ka grupo sa mga naghupot sa pagkapari. Niini nga pagpadayag, lagmit nadawat didto sa N. K. Whitney & Co. Store, atong nakat-onan nga ang Melchizedek nga Pagkapari gihatag ngadto sa mga matarong nga mga propeta sukad sa wala pa ang paglalang sa yuta (tan-awa sa Doktrina ug mga Pakigsaad 84:6–17) ug nga diha sa “mga ordinansa niana, ang gahom sa pagka-diosnon gipakita.” Kini nga pagpadayag mibutang usab niadtong kinsa naghupot sa pagkapari ubos sa “panumpa ug pakigsaad” nga samtang ilang buhaton ang ilang calling, sila pagabalaanon.

Labaw sa tanan, ang mga pagpadayag nga nadawat sa Ohio nagpalambo sa pagsabot sa mga Santos sa Ulahing mga Adlaw sa kinaiya ug Pag-ula ni Jesukristo. Diha “sa Panan-awon” (Doktrina ug mga Pakigsaad 76), sila si Joseph Smith ug Sidney Rigdon nakakita sa Manluluwas nga si Jesukristo. Sila mipahayag:

“Ug mao kini ang ebanghelyo, ang maayong balita, diin ang tingog sa kalangitan nagpamatuod ngari kanamo—

“Nga siya mianhi sa kalibotan, gani si Jesus, aron ilansang sa krus alang sa kalibotan, ug mag-antos sa mga sala sa kalibotan, ug magbalaan sa kalibotan, ug sa paghugas niini gikan sa tanan nga dili matarong;

“Nga pinaagi kaniya ang tanan unta maluwas kadtong mga gihatagan sa Amahan sa iyang gahom ug gilalang pinaagi kaniya” (Doktrina ug mga Pakigsaad 76:40–42).

Wala madugay human sa pagpahinungod sa balay sa Ginoo didto sa Kirtland, si Kristo mipakita pag-usab, mipahayag ngadto ni Joseph Smith ug Oliver Cowdery:

“Ako mao ang sinugdanan ug ang kataposan; Ako mao siya kinsa nabuhi, Ako mao siya kinsa gipatay; Ako mao ang inyong manlalaban ngadto sa Amahan.

“Tan-awa, ang inyong mga sala gipasaylo diha kaninyo; kamo malimpyo diha sa akong atubangan; busa, ihangad ang inyong mga ulo ug pagmaya.

“Himoa ang mga kasingkasing sa inyong mga kaigsoonan nga magmaya, ug himoa ang mga kasingkasing sa akong tanan nga mga katawhan nga magmaya, kinsa, uban sa ilang kusog, nagtukod niini nga balay ngadto sa akong ngalan” (Doktrina ug mga Pakigsaad 110:4–6).

Sa gipahinungod nga templo, ang mga Santos nakadawat sa pagtuga sa gahom nga gisaad dul-an sa lima ka tuig ang milabay dihang gisugo sila sa pagpundok sa Ohio. Bisan og dugang nga mga ordinansa ug mga seremonya nga may kalabotan sa “pagtuga” nga gipaila didto sa Nauvoo, ang pagtuga sa gahom nga gisaad alang sa mga Santos sa Kirtland naglakip sa “panahon sa Pentecostes” nga misunod sa pagpahinungod sa templo ug “sa pagpahiuli sa mga yawe sa pagkapari” pinaagi nila ni Moises, Elias, ug Elijah didto sa Kirtland Temple (tan-awa sa Doktrina ug mga Pakigsaad 110).⁶

Kini nga pagtuga sa bag-o nga mga yawe ug mga ordinansa nga misunod sa pahayag sa Ginoo nga ang pag-antos sa mga Santos sa pagtukod sa templo gidawat ug nga ang ilang mga sala gipasaylo pinaagi sa Pag-ula ni Kristo.