Usa ka Balay sa Ginoo

Sa dihang gisugo ang mga Santos sa pagpundok didto sa Ohio, ang Ginoo misaad nga sila makadawat og pagtuga sa gahom didto (tan-awa sa Doktrina ug mga Pakigsaad 38:32). Pagka Disyembre 1832, dul-an sa duha ka tuig human sa pag-abot sa Kirtland, wala pa nila madawat kana nga pagtuga.

Sa gabii sa Disyembre 27, 1832, si Joseph Smith nakigkita sa mga high priest sa Simbahan didto sa ibabaw nga andana sa N. K. Whitney & Co. Store. “Aron makadawat og padayag ug sa mga panalangin sa langit,” gitudlo ni Joseph, “[kini] kinahanglan nga ang atong mga hunahuna anaa sa Dios ug mopakita og hugot nga pagtuo ug mahimo nga usa ka kasingkasing ug usa ka hunahuna.”

Si Joseph miawhag sa tanan nga mitambong nga magbuwag-buwag sa pag-ampo ug sa pag-ampo nga may tingog ngadto sa Ginoo “aron Siya mopadayag sa Iyang kabubut-on ngari kanamo kabahin sa pagpalig-on sa Zion ug alang sa kaayohan sa mga Santos ug sa tulumanon ug panarbaho sa mga elder.”¹ Atol sa sunod-sunod nga mga miting pagka sunod semana, ang pagpadayag nga karon mao ang Doktrina ug mga Pakigsaad 88 nadawat.

Niini nga padayag, ang Ginoo mipasabot nga ang pagdawat sa pagtuga nagkinahanglan og sagradong mga panagtigom nga ipahigayon sa balay sa Ginoo. “Han-aya ang inyong mga kaugalingon,” miingon ang Ginoo. “Andama ang matag butang nga kinahanglanon; ug paghimo og usa ka balay, gani usa ka balay sa pag-ampo, usa ka balay sa pagpuasa, usa ka balay sa pagtuo, usa ka balay sa pagkat-on, usa ka balay sa himaya, usa ka balay sa kahusay, usa ka balay sa Dios” (Doktrina ug mga Pakigsaad 88:119). Miabot ang panahon alang sa mga Santos nga magtukod og templo aron ang Ginoo makatuga kanila sa gahom, nga apil sa pagpahiuli sa yawe sa pagkapari.

Uban sa sugo sa pagtukod sa templo miabot ang daghang hagit. Sa kinatibuk-an, ang mga miyembro sa Simbahan nianang higayona mga intelihente, kugihan nga mga babaye ug mga lalaki. Ang uban mga tawo nga dunay talento sa pagbuhat, ug daghan ang mitrabaho sa nagkalain-laing higayon sa pagtukod og mga panimalay alang sa ilang kaugalingon ug sa uban. Walay usa, bisan pa, ang nakatukod og bisan unsang butang sama sa gidak-on o sukod sa templo.

Pagka Hunyo 1833, ang pagtukod sa templo wala pa masugdi. Sa Hunyo 1, si Joseph Smith nakadawat og pagpadayag diin ang Ginoo mipadayag sa mga sukod sa templo (Doktrina ug mga Pakigsaad 95:13–17). Wala madugay human niana, ang Unang Kapangulohan nakakita sa mga drowing sa mga plano alang sa bilding.²

Gisugdan nila ni Hyrum Smith ug Reynolds Cahoon ang pagkalot sa pundasyon alang sa templo ug si George A. Smith mikubkob sa unang gikarga nga mga bato gikan sa duol nga Stannard Quarry.³

Dayon, niadtong Hunyo 6, usa ka komperensiya sa mga high priest mitudlo nila ni Hyrum Smith, Reynolds Cahoon, ug Jared Carter nga moserbisyo isip komite sa pagtukod sa Simbahan nga maoy modumala sa proyekto ug misugo nila nga sugdan dayon ang pagtukod.⁴

Human sa miting, si Hyrum Smith miadto sa panimalay sa iyang mga ginikanan ug nakakita og himan. Dihang nangutana ang iyang inahan kon asa siya moadto nga ingon og nagdali, siya mitubag, “Nangandam kami sa pagtukod og usa ka balay sa Ginoo, ug ako determinado nga maoy makauna sa pagtrabaho.”

Pagka Hulyo 23, ang pundasyon sa templo gikalot, ug ang Unang Kapangulohan nangulo sa seremonya sa pagpahiluna sa bato sa pamag-ang alang sa bilding.

Ang Kirtland Temple gitukod gikan sa lokal nga mga gapod [sandstone] nga gipikas nga naggikan sa nauga nga sapa sa habagatang bahin sa bilding. Ang dili regular nga mga bloke sa bato dali nga giputol ug dayon gipatong-patong ug gimasa aron mahimo ang dagkong mga bungbong sa bilding. Ang dili regular nga mga bato gitabonan og baga nga stucco [gisagol nga semento, balas ug tubig] sa gawas ug plaster sa sulod.

Sa ulahing bahin sa 1833, ang mga Santos mitukod og bansohan sa Stoney Brook, usa ka paspas nga moagas nga sapa padulong sa Suba sa Chagrin River nga nag-agos sa mga patag duol sa Whitney Store. Ang bansohan naghatag og trabaho alang sa bag-ong mga kinabig nga bag-o lang naabot sa Kirtland ug naghimo og tabla nga gikinahanglan sa pagtukod sa templo, lakip na ang mga sagbayan, mga salog, ug mga inak-ak sa atop [roofing shingles].

Ang mga kahoy nga gikan sa duol nga lasang nga gipalit sa Simbahan niadtong Marso 1833 gipamutol ug gipalutaw sa Suba sa Chagrin ngadto sa bansohan, diin didto i-proseso aron mahimong tabla. Dinhi, ang mga lalaki nga dunay talento sa pagbuhat mihimo usab og makuti nga pangdekorasyon nga mga butang sa arkitektura nga gidayan-dayan sa mga kahoy nga nagporma sa kadaghanan sa sulod nga dekorasyon sa templo. Ang mga pulpito nga nahimutang sa isig ka kilid sa taas ug ubos nga bahin sa templo unang gihimo usab diha sa bansohan.

“Adunay usa ka labing dako nga tinubdan sa tanan natong mga hunahuna, ug kana mao ang pagtukod sa balay sa Ginoo,” nahinumdom si Lucy Mack Smith niini nga higayon.⁵

Sa pagpadayon sa pagtukod sa templo, ang tibuok komunidad mitampo sa trabaho. Pananglitan, ang kalalakin-an nagtrabaho sa quarry sa pagpikas sa mga bato ug sa paghakot niini ngadto sa dapit sa konstruksiyon. Si Heber C. Kimball nahinumdom nga nagtrabaho kauban si Joseph Smith didto sa quarry: “Wala lang siya nagtan-aw nga walay gibuhat kondili miapil sa trabahoon.”⁶

Sa pagsugod sa pagtukod sa templo, si Joseph ug Emma Smith mibalhin sa ilang pamilya ngadto sa ilang kaugalingong panimalay sa bungtod duol sa templo. Gikan sa ilang bintana sa kusina, si Joseph ug Emma makakita samtang ang templo nagtindog ibabaw sa talan-awon.

Samtang migahin si Joseph og dakong panahon sa dapit sa templo ug sa quarry nga nagtabang nga mapaspas ang trabaho, siya usab nagpadayon sa pagdawat og mga pagpadayag, nagdumala sa pagmantala sa unang edisyon sa Doktrina ug mga Pakigsaad ug ang ikaduhang edisyon sa Basahon ni Mormon, ug sa pag-organisar sa Korum sa Napulog Duha ug sa mga Korum sa Seventy.

“Apan tungod kay ang akong kinabuhi naglangkob og kalihokan ug walay hunong nga mga paningkamot,” si Joseph misulat niini nga panahon, “Ako kining gihimo nga lagda: kon ang Ginoo mosugo, buhata kini.”⁷ Daghan sa mga pagpadayag nga nadawat ug mga miting nga gipahigayon ni Joseph atol niini nga panahon gitumong ngadto sa pagpangandam sa mga Santos alang sa templo.

Sa ulahing bahin sa 1835, ang templo nahuman igo lang nga si Joseph Smith ug ang uban nagsugod sa pagpahigayon og mga miting diha sa bilding. Pagka Enero 21, 1836, samtang nangalagad og bag-ong gipadayag nga mga ordinansa sa ikatulong andana sa templo, si Joseph Smith nakadawat og usa ka panan-awon mahitungod sa celestial nga gingharian ug nakakat-on nga kadtong namatay nga wala mabunyagi niini nga kinabuhi makabaton gihapon og kahigayonan sa sunod (tan-awa sa Doktrina ug mga Pakigsaad 137). Sa hapit na mahuman ang templo, nakat-onan ni Joseph nga aduna pay ipadayag ang Ginoo.

Niadtong Marso 27, 1836, nagdasok nga pundok sa mga Santos ang nagtigom sa Kirtland Temple alang sa pagpahinungod. Diha sa pagpahinungod nga pag-ampo, si Joseph Smith miingon, “Sa ngalan ni Jesukristo, … kansang ngalan lamang ang kaluwasan ikapangalagad ngadto sa katawhan, mangayo kami kanimo, O Ginoo, nga dawaton kini nga balay, ang binuhat sa among mga kamot, imong mga sulugoon, nga gisugo nimo nga among itukod” (Doctrine and Covenants 109:4).

Ang Ginoo midawat sa balay. Uban sa pag-abot sa mga anghel ug balaanong mga pagpakita nianang adlawa ug sa misunod nga mga adlaw, ang mga Santos napanalanginan og panahon sa Pentecostes.

Niadtong Abril 3, usa ka semana human gipahinungod ang templo, si Joseph Smith ug Oliver Cowdery nangadto sa mga pulpito sa kasadpang tumoy sa bilding ug miyukbo sa maligdong ug hilom nga pag-ampo. Human nila gitapos ang ilang mga pag-ampo, usa ka panan-awon ang gipakita ngadto kanila mahitungod sa Manluluwas nga si Jesukristo.

Siya mibarog diha gayod sa pulpito sa ilang atubangan ug mipahayag: “Himoa ang mga kasingkasing sa inyong kaigsoonan nga magmaya, ug himoa ang mga kasingkasing sa tanan kong katawhan nga magmaya, kinsa nakahimo, pinaagi sa ilang kusog, sa pagtukod niini nga balay sa akong ngalan. Kay tan-awa, akong gidawat kini nga balay, ug ang akong ngalan maania dinhi; ug akong ipakita ang akong kaugalingon ngadto sa akong katawhan tungod sa kaluoy dinhi niini nga balay” (Doktrina ug mga Pakigsaad 110:6–7).