Panimalay nila ni Joseph ug Emma Smith

Ang Panimalay ni Joseph ug Emma Smith sa Kirtland, Ohio, usa ka dapit sa kalinaw, kahilwasan, ug pagpadayag alang sa pamilya Smith atol sa upat ka tuig nga gihimo nila ang ilang panimalay dinhi. Samtang nagpuyo niini nga panimalay, gihubad ni Joseph ang Basahon ni Abraham, giorganisar ang daghang importante nga mga korum sa pagkapari—lakip na ang unang high council ug ang Korum sa Napulog Duha ka Apostoles—ug kanunay nga nakighimamat sa mga miyembro sa Simbahan. Dinhi niining dapita nga gituman ni Emma ang iyang balaanong sugo sa “pagpili sa sagrado nga mga himno“ alang sa Simbahan (tan-awa sa Doktrina ug mga Pakigsaad 25:11).

Sa adlaw nga miabot sila si Joseph ug Emma sa Kirtland, nakadawat si Joseph Smith og pagpadayag nga nagsugo sa mga Santos nga “angay nga ang akong sulugoon nga si Joseph Smith, Jun., patukoran og balay, diin didto magpuyo ug maghubad” (Doktrina ug mga Pakigsaad 41:7). Sa ulahing bahin sa 1833, human sa sobra sa duha ka tuig sa maong dapit, si Joseph ug si Emma sa kataposan mibalhin ra gayod—uban sa tulo ka gagmayng mga bata—ngadto sa ilang panimalay, nga gitukod pinaagi sa tabang sa pamilya, mga higala, ug mga miyembro sa Simbahan. Bisan tuod kon nagpuyo sila sa maong panimalay sa kapin lamang sa upat ka tuig, mas dugay silang nagpuyo dinhi kay sa ubang mga panimaly diin sila nag-uban isip managtiayon. Ang panimalay nahimong usa ka dapit sa seguridad diin si Emma nagdumala sa panimalay, nanganak og laing anak, ug nagnegosyo og gatasan. Agig dugang sa iyang mga katungdanan sa panimalay, si Emma dinhi usab nagtigom og koleksiyon sa sagrado nga mga himno.

Agig dugang sa paghubad sumala sa gisugo sa Ginoo, gihimo usab ni Joseph ang ubang propetikanhong mga katungdanan. Dinhi niini nga panimalay, nakadawat siya og mga pagpadayag, nakighimamat sa konseho uban sa mga lider sa Simbahan, miduaw sa mga Santos, ug mipalapad sa organisasyon sa Simbahan. Gikan niini nga panimalay, giatiman niya ang pagprinta sa unang edisyon sa Doktrina ug mga Pakigsaad ug sa ikaduhang edisyon sa Basahon ni Mormon ug gidiktar ang usa sa unang asoy sa Unang Panan-awon. Dinhi niini nga panimalay, gidiktar ni Joseph Smith ang pagpadayag nga karon mao ang Doktrina ug mga Pakigsaad 101 nga misangpot sa pagkamugna sa Kampo sa Zion. Unya, ang Korum sa Napulog Duha ka Apostoles ug ang mga Korum sa Seventy giorganisar samtang dinhi pa nagpuyo si Joseph Smith. Ang dagkong mga bahin sa Basahon ni Abraham gihubad usab dinhi sa panahon nga si Joseph ug si Emma nagpuyo pa niini nga panimalay.

Si Joseph ug si Emma maabiabihon nga mga tawo nga sa kasagaran mibukas sa ilang panimalay ngadto sa mga nangitag kaabangan nga lawak. Kini nga mga nangitag kaabangan sa kasagaran mobayad sa ilang pagpuyo o motrabaho alang sa pamilya. Si Eliza R. Snow nag-abang og lawak uban sa mga Smith sa duha ka higayon dinhi niini nga panimalay ug nagserbisyo isip magtutudlo sa lokal nga mga kabataan nga Smith ug sa pipila ka young women diha sa maong dapit. Ang mga sakop sa pamilya nagpuyo usab uban sa mga Smith, lakip na sa mga ginikanan ni Joseph, kinsa nagpuyo diha sulod sa usa ka tuig samtang gitukod pa ang ilang panimalay. Ang lola ni Joseph sa habig sa iyang amahan, Mary Duty Smith, mibista usab sa pamilya dinhi niini nga panimalay.

Karon ang Panimalay nila ni Joseph ug Emma Smith napahiuli na diha sa Kirtland, Ohio, ug abli alang sa publiko nga paglibot.

360° nga Pag-aninaw sa Tibuok Palibot

Unsay Malaoman

Ang Panimalay nila ni Joseph ug Emma Smith abli alang sa giniyahan sa mga misyonaryo nga mga paglibot nga molungtad og mga 25 o 30 minutos. Dunay kalingkoran sa tibuok nga paglibot.