Ang Lima ka Panimalay nila ni Joseph ug Emma Smith sa Ohio

Sa adlaw nga sila si Joseph ug Emma Smith unang miabot sa Kirtland, si Joseph nakadawat og pagpadayag diin ang Ginoo mimando sa Simbahan sa paghatag kaniya ug sa iyang pamilya og panimalay diin pwede niyang kapuy-an ug magpadayon sa pagtrabaho sa dinasig nga paghubad sa Biblia (tan-awa sa Doktrina ug mga Pakigsaad 41:7).

Bisan niini, sila si Joseph ug Emma migahin og pipila ka tuig nga nagsalig sa kabuotan ug kamaayo sa mga miyembro sa Simbahan sa paghatag kanila og usa ka dapit nga kapuy-an.

Kini mao ang lima ka dapit kon asa mipuyo silang Joseph ug Emma Smith atol sa pito ka tuig nga ang Simbahan didto nahimutang sa amihanang-silangan sa Ohio.

Dihang miabot si Joseph ug Emma Smith sa Newel K. Whitney Store sa Kirtland niadtong Pebrero 4, 1831, si Newel ug iyang asawa, si Elizabeth Ann, diha-diha dayon midapit kanila nga mopuyo sa ilang panimalay hangtod nga makakita og permanente nga mahimutangan. “Nalipay mi nga miabi-abi kanila ug mipakigbahin kanila sa tanang kahupayan ug mga panalangin nga among natagamtaman,” nahinumdom si Elizabeth Ann.¹

Sukad sa miaging Oktubre, dihang ang mga misyonaryo unang naabot sa Ohio, ang mga Whitney mipahigayon og daghang miting sa sala sa ilang panimalay. Sulod sa upat ka semana nga si Joseph ug Emma mipuyo sa Panimalay sa mga Whitney, ang panimalay padayong nagsilbi isip sentro sa kalihokan sa Simbahan.

Daghang Santos ang miabot sa panimalay sa mga Whitney aron motambong sa mga miting ug mobisita sa Propeta. Samtang nagpuyo dinhi si Joseph Smith nakadawat og pipila ka pagpadayag nga karon makit-an sa Doktrina ug mga Pakigsaad.²

Lakip sa labing mahinungdanon mao ang Doktrina ug mga Pakigsaad 41. Nadawat sa unang adlaw nga si Joseph ug Emma mipuyo sa mga Whitney, kini nga pagpadayag mipaila sa katungdanan sa bishop ug mitawag ni Edward Partridge nga moserbisyo sa posisyon. Human si Partridge gipadala ngadto sa Missouri aron moserbisyo isip bishop didto, si Newel K. Whitney gitawag aron moserbisyo isip bishop sa Ohio.³

Ang panahon sa pagpuyo nila ni Joseph ug Emma sa Panimalay sa mga Whitney kanunayng gituyo ,nga temporaryo. Sa adlaw nga si Joseph ug Emma miabot ug nadawat ni Joseph ang pagpadayag nga usa ka panimalay ang kinahanglang tukoron alang nila, si Isaac Morley, usa ka adunahan nga lokal nga mag-uuma, misugot nga usa ka panimalay ang tukoron sa iyang duol nga umahan.

Nakita ni Morley ang pagtukod sa gamay nga panimalay alang nila ni Joseph ug Emma, nga nahuman sulod lang sa upat ka semana. Sila si Joseph ug Emma mibalhin ngadto sa ilang panimalay sa Umahan sa mga Morley sa sayong bahin sa Marso 1831.

Si Isaac ug iyang asawa, si Lucy, naghinam-hinam sa pagtabang nga matukod ang gipahiuli nga Simbahan sukad sa ilang bunyag niadtong Nobiyembre 1830. Samtang ang bag-ong mga kinabig nabunyagan sa Ohio ug ang mga Santos nga gikan sa New York nangabot, daghan ang nakakita og temporaryo nga mga kapuy-an sa Umahan sa mga Morley.

Samtang sila si Joseph ug Emma nagpuyo sa umahan, si Joseph padayon nga mipahigayon og mga miting kauban ang mga Santos ug sa pagdawat og mga pagpadayag. Ang mga rekord nagpakita nga si Joseph midiktar og daghang pagpadayag, lakip ang 13 nga karon gilakip diha sa Doktrina ug mga Pakigsaad.⁴

Ang mga pagpadayag atol niini nga panahon naghatag ni Joseph ug sa mga Santos og mahinungdanong panabot ngadto sa tahas ni Jesukristo isip atong manlalaban, unsaon sa pagdumala og mga miting, unsaon sa pagtudlo sa usag usa sa ebanghelyo, ug ang mga katuyoan sa mga gasa sa Espiritu.

Atol sa mga miting ug mga komperensiya nga gipahigayon sa Umahan sa mga Morley, ang mga elders gitawag aron motuman og mga misyon ug ang mga panagna gihimo mahitungod sa tibuok kalibotan nga padulngan sa gipahiuli nga ebanghelyo.

Mao usab kini ang mahagitong panahon alang ni Joseph ug Emma. Pagka Abril 30, 1831, si Emma nanganak og kaluha nga nabuhi lang sa pipila ka oras. Kini ang ikaduha ug ikatulo nga mga masuso nga nawala ni Joseph ug Emma sulod lang sa tulo ka tuig.

Sa samang adlaw, si Julia Murdock, laing Santos sa Ulahing mga Adlaw nga nagpuyo sa Umahan sa mga Morley, ang namatay samtang nanganak og kaluha. Ang kasubo ni Joseph ug Emma sa pagkawala sa ilang masuso nga kaluha medyo naminosan dihang ang bana ni Julia, si John, mihangyo nila ni Joseph ug Emma sa pagsagop sa iyang kaluha, si Joseph ug Julia.

Human lang sa unom ka bulan sa pagpuyo sa Umahan sa mga Morley, si Joseph ug Emma mibalhin na usab. Niadtong Septiyembre 1831, mibalhin sila ngadto sa Hiram, Ohio, ngadto sa panimalay ni John ug Elsa Johnson. Sa duha ka pagpadayag nga nadawat niadtong Agosto ug Septiyembre 1831, si Isaac Morley gimandoan nga ibaligya ang iyang umahan (tan-awa sa Doktrina ug mga Pakigsaad 63:38–39; 64:20). Human nga ang dako nga porsiyon sa umahan nabaligya niadtong Oktubre 1831, si Isaac ug Lucy mibalhin sa ilang pamilya ngadto sa Missouri.⁵

Ang pagkasayod nga sila si Joseph ug Emma sa umaabot mawad-an og panimalay, si John Johnson, usa ka adunahan nga kinabig, midapit kanila sa pagbalhin ngadto sa iyang panimalay sa Hiram, Ohio, 44 ka milya (71 km) habagatan sa Kirtland. Niadtong Septiyembre 1831, sa wala pa mabaligya ang Umahan sa mga Morley, si Joseph ug Emma Smith mibalhin kauban ang ilang upat ka bulan nga kaluha ngadto sa panimalay nila ni John ug Elsa Johnson.

Ang mga Johnson, kinsa mibalhin sa Ohio niadtong 1818, nanag-iya og malamposon nga umahan ug gatasan ug usa sa labing mauswagon nga mga lumulupyo sa Distrito sa Portage. Sa panimalay sa mga Johnson, giabi-abi ni Joseph ang kanunay nga pagdagsa sa mga bisita, kadaghanan nila kinahanglan nga pakan-on ug papuy-on alang sa tibuok gabii.

Ang mga Johnson wala lang naghatag og lawak sa unang andana diin si Joseph, Emma, ug ilang mga anak makapuyo, apan gihatagan usab nila si Joseph og usa ka dako nga lawak sa ikaduhang andana nga nagsilbi nga iyang opisina. Niini nga lawak sa itaas, si Joseph mipahigayon og mga miting uban sa mga miyembro ug mga lider sa Simbahan, mipadayon sa pagtrabaho uban sa mga eskriba sa dinasig nga paghubad sa Biblia, ug midiktar og lawom nga mga pagpadayag, lakip ang 16 nga makita karon diha sa Doktrina ug mga Pakigsaad.⁶

Atol sa komperensiya sa mga elder nga gipahigayon dinhi sa sayong bahin sa Nobiyembre 1831, ang desisyon gihimo sa pagmantala sa usa ka hugpong sa mga pagpadayag ni Joseph Smith.⁷ Sa wala madugay, niadtong Pebrero 16, 1832, samtang si Joseph ug Sidney Rigdon nagtrabaho sa paghubad sa Bag-ong Tugon, usa ka panan-awon ang gipakita ngadto kanila diin sila nakakita ni Jesukristo ug natudloan og dugang mahitungod sa pagkabanhaw sa mga patay.

Wala madugay human niini nga panan-awon, ang mga kaaway sa Simbahan miguba sa panimalay sa mga Johnson, gibira si Joseph gikan sa iyang higdaanan, ug giguyod siya ngadto sa duol nga hinawanan. Gigisi ang iyang sapot gikan sa iyang lawas, ug gitabonan siya sa init nga alkitran ug mga balahibo. Human sa taas nga gabii nga ang alkitran sakit nga gitangtang sa iyang lawas, si Joseph misangyaw og usa ka wali sa Dominggo ngadto sa nagpundok nga mga Santos, uban ang panon sa manggugubot nga miipon kanila.

Subo lang, ang masuso nga anak nga lalaki sa mga Smith, si Joseph—usa sa sinagop nga kaluha—namatay wala madugay human sa iyang pagka-ladlad sa katugnaw. Sa misunod nga pipila ka bulan, ang kalihokan sa manggugubot nga panon ug mga hulga nagpadayon sa pagsamok-samok ni Joseph Smith sa Hiram ug sa palibot nga mga komunidad.

Sa dihang migrabe ang tensyon sa Hiram, si Newel K. Whitney miusab sa pipila ka lawak sa sulod sa iyang tindahan sa Kirtland aron mahatagan si Joseph ug Emma og bag-ong dapit nga kapuy-an. Niadtong Septiyembre 1832, si Joseph, Emma, ug ilang anak nga babaye, si Julia, mibalhin ngadto sa mga lawak sa taas nga andana sa tindahan.

Dul-an sa duha ka tuig, si Joseph ug Emma mipuyo sa Tindahan sa mga Whitney, nga nahimong dili lang usa ka panimalay alang sa ilang batan-on ug nagtubo nga pamilya apan sentro usab sa kalihokan sa Simbahan. Samtang nagpuyo dinhi, si Joseph Smith mipadayon sa pagdawat og mga pagpadayag, lakip sa 16 nga karon gilakip diha sa Doktrina ug mga Pakigsaad.⁸ Pagka Nobiyembre 6, 1832, si Joseph Smith III natawo diha sa N. K. Whitney & Co. Store.

Si Joseph Smith mitukod og opisina diha sa bilding, diin mipadayon siya sa pagtrabaho sa dinasig nga paghubad sa Biblia ug nakigkita sa mga lider sa Simbahan. Sulod sa 18 ka bulan nga si Joseph ug Emma nagpuyo sa Tindahan sa mga Whitney, kini ang punoang buhatan sa Simbahan ug ang dapit sa daghang importante nga mga panghitabo sa Kirtland.

Lakip sa daghang ubang butang, ang mga pagpadayag nga nadawat dinhi naghatag og bag-ong mga panabot sa pagkapari, misugo sa mga Santos sa pagtukod og balay sa Dios, ug nagtudlo kanato kon unsaon nga mahimong mas sama kang Kristo.

Niadtong Marso 8, 1833, human sa pipila ka bulan sa paghisgot ug pagpadayag, ang Unang Kapangulohan sa Simbahan hingpit nga naorganisar diha sa Tindahan sa mga Whitney, ug ang mga magtatambag ni Joseph Smith, si Sidney Rigdon ug Frederick G. Williams, gi-set apart.⁹

Sa usa ka lawak sa luyo sa tindahan, si Joseph Smith nagsugod sa pagpahigayon og mga klase alang sa Tulunghaan sa mga Propeta, usa ka programa sa pagbansay alang sa mga lider sa Simbahan ug mga misyonaryo aron sa pag-andam kanila alang sa pagserbisyo. Niini nga kahimtang nga ang Pulong sa Kaalam, ang balaod sa Ginoo sa kahimsog, unang gipadayag.

Sa ulahing bahin sa 1833, usa ka panimalay ang nahuman alang ni Joseph ug Emma ug sa ilang mga anak. Kining gamay nga panimalay nahimutang sa habagatan sa tindahan sa mga Whitney, ibabaw sa bungtod duol sa balay sa Ginoo nga gitukod.¹⁰ Kini mao ang unang panimalay nga gipanag-iya ni Joseph ug Emma sukad nga mibiya sila sa ilang panimalay sa Harmony, Pennsylvania. Gikan sa iyang bag-ong kusina, si Emma Smith nakakita samtang ang gisaad nga templo gitukod sa ibabaw sa talan-awon.

Niini nga panimalay, si Emma nagdumala og usa ka gatasan, misuhol og mga babaye nga mga trabahante, ug nagsugod sa pagdumala sa usa ka panimalay. Dinhi, uban sa tabang ni William W. Phelps, gihugpong ni Emma ang unang himno sa Simbahan. Laing bata, si Frederick Granger Williams Smith, natawo niadtong Hunyo 1836, ug sa kapin sa tulo ka tuig ang pamilyang Smith nakahimo sa pagpabilin nga nagpuyo sa panimalay. Samtang nagpuyo dinhi, si Joseph Smith nakadawat sa tanan o bahin sa 5 ka pagpadayag.¹¹

Sa panahon nga si Joseph ug Emma mipuyo sa ilang panimalay, ang Simbahan nagpadayon sa paglambo. Agig tubag sa nagkadako nga panginahanglan sa pagpangulo, ang Ginoo mipadayag og bag-ong mga katungdanan sa pagkapari, mga kausaban sa estruktura sa pagdumala, ug ubang mahangtorong mga kamatuoran ngadto sa mga miyembro sa Simbahan. Niadtong Pebrero 17, 1834, si Joseph Smith miorganisar sa unang stake sa Simbahan uban ang calling sa labawng konseho.

Sa ubang mga miting nga gipahigayon niining panahona—ug posible diha sa panimalay—ang mga pagpadayag ni Joseph Smith nagpalapad sa panabot sa pagkapari, nag-organisar sa Kampo sa Zion, pormal nga nag-organisar sa Korum sa Napulog Duha ka Apostoles, ug miandam sa mga Santos alang sa pagtuga sa gahom nga gisaad diha sa templo. Gikan sa iyang posisyon duol sa nahimutangan sa templo, si Joseph nakahimo sa pagdumala sa pagtukod og dugang nga mga pasilidad sa Simbahan, lakip ang usa ka print shop, usa ka eskwelahan, ug ang Kirtland Safety Society.

Ang Pamilya Smith mipuyo niini nga panimalay hangtod sa sayong bahin sa 1838, dihang ang panagsumpaki sa Simbahan ug ang pagsaka sa kalihokan sa manggugubot nga panon miaghat kanila sa pagbiya. Niadtong Enero 12, 1838, si Joseph Smith ug Sidney Rigdon mibiya sa Kirtland padulong sa mga pinuy-anan sa mga Santos sa Ulahing mga Adlaw sa Amihanang-Kasadpan sa Missouri. Si Emma, mabdos og laing bata, misunod dayon.¹²