Panimalay ni Joseph ug Emma Smith

Ang Panimalay nila ni Joseph ug Emma Smith sa Harmony, Pennsylvania, maoy usa ka dapit sa pagpadayag. Dinhi si Joseph mipadayon sa paghubad sa Basahon ni Mormon pinaagi sa gahom sa Dios, gitabangan sa mga tigsulat sama ni Emma, iyang igsoong lalaki nga si Reuben, Martin Harris, ug Oliver Cowdery.

Human mobalhin niini nga panimalay niadtong Disyembre 1827, duha ka bulan lang human madawat ang bulawan nga mga palid, si Joseph ug Emma mipuyo og kadiyot sa mga ginikanan ni Emma sa wala pa mibalhin ngadto niining 5.46 ektarya nga umahan sa Enero o sayong bahin sa Pebrero sa 1828. Si Joseph ug Emma sa wala madugay mipalit sa balay gikan sa amahan ug igsoong lalaki ni Emma. Ang gamay nga piraso sa propyedad gikan sa Suba sa Susquehanna hangtod sa tiilan sa Bukid sa Oquago. Naglakip kini og kamalig ug usa ka balay nga gihimo sa igsoong lalaki ni Emma nga si Jesse. Ang Panimalay ni Joseph ug Emma Smith usa ka gihimo pag-usab nga balay nga gitukod diha sa orihinal nga lokasyon.

Human sa pag-abot sa Harmony, si Joseph mihimo og pipila ka pag-uswag sa paghubad sa bulawan nga mga palid sulod sa upat ka bulan. Si Emma miserbisyo isip iyang unang tigsulat sa wala pa makadawat og tabang gikan sa iyang igsoong lalaki nga si Reuben Hale ug pagkahuman, ni Martin Harris.

Sa sayong bahin sa Hunyo 1828, si Martin Harris mihangyo ni Joseph Smith nga dad-on ang manuskrito ngadto sa Palmyra aron ipakigbahin sa iyang asawa, si Lucy Harris, ug sa ubang sakop sa pamilya nga nasuko tungod sa suporta ni Martin kang Joseph. Human sa tulo ka pagsulay nga makuha ang pagtugot sa Ginoo nga dad-on ang manuskrito, ang Ginoo sa kataposan mitugot ug mibiya si Martin sa Harmony dala ang manuskrito niadtong Hunyo 14, 1828. Pagkasunod adlaw, si Emma nanganak sa iyang unang anak, usa ka lalaki nga nabuhi lang sa pipila ka oras. Human sa paglubong sa bata sa duol nga Sementeryo sa McKune, si Joseph miatiman sa iyang asawa nga nasakit tungod sa lisod nga pagbati ug naguol pag-ayo tungod sa pagkamatay sa iyang anak. Human sa dul-an duka ka semana, samtang nagsugod na sa pagbalik sa iyang kalig-on, si Emma nakabantay sa pagkaguol nga gibati ni Joseph mahitungod sa manuskrito. Wala na sila makadungog bahin ni Martin, ug iyang nakita nga ang kabalaka nagsugod sa pagpabug-at sa iyang bana.

“Gibati nako ang tumang kabalaka,” gisultihan niya si Joseph usa ka adlaw, “ug dili mahimutang hangtod akong mahibaloan ang butang mahitungod sa unsay gibuhat ni Mr. Harris.” Human sa pipila ka dugang nga pag-awhag, si Joseph misakay sa tartanilya gikan sa Harmony ngadto sa Manchester, diin iyang nahibaloan nga nawala ni Martin ang manuskrito. “Tanan nawala,” si Joseph nawad-an sa paglaom. “Nawad-an ko sa akong kalag.” Mibiya si Joseph sa samang adlaw aron mobalik sa Harmony aron ipakigbahin ang makapasubo nga balita ngadto kang Emma. Sa wala madugay sa iyang pag-abot balik sa Harmony, mipakita si Moroni pag-usab ug gikuha ang mga palid ug ang mga tighubad nga misulti ni Joseph nga kon siya “igo ang pagkamapainubsanon” ibalik kini sa Septiyembre. Human sa panahon sa paghinulsol, nakadawat si Joseph Smith og pagpadayag—karon ang Doktrina ug mga Pakigsaad 3—diin ang Ginoo mideklarar nga ang Iyang mga katuyoan “dili gayud makawang” ug misulti ni Joseph nga siya unta wala “mahadlok sa tawo labaw pa kay sa Dios” (Doktrina ug mga Pakigsaad 3:1, 7). Ang Ginoo usab mipahayag nga si Joseph “gitawag pag-usab ngadto sa buhat.” Ang mga palid gibalik, ug, uban ni Emma nga nagsilbi pag-usab nga iyang tigsulat, si Joseph misugod sa naundang nga mga paningkamot sa paghubad.

Sa Abril 5, 1829, si Oliver Cowdery, usa ka magtutudlo sa eskwelahan nga nag-abang nila ni Joseph Sr. ug Lucy Smith sa Manchester, miabot sa Harmony. Human nakahibalo bahin sa mga pagpadayag ni Joseph Jr., nagtuon ug nag-ampo si Oliver aron masayod kon kini gikan ba sa Dios. Human nakombinser nga kini gikan sa Dios, siya usab nakombinser nga adunay tahas alang kaniya nga himoon sa pagtabang ni Joseph. Duha ka adlaw human sa unang pagkigtagbo ni Joseph Smith, si Oliver misugod sa pagtrabaho isip iyang tigsulat. Magkauban, gihubad ni Joseph ug Oliver ang Basahon ni Mormon sulod lamang sa tulo ka bulan, atol niana nga higayon nadawat usab nila ang Aaronic ug Melchizedek nga mga Pagkapari, gihan-ay alang sa pagmantala sa Basahon ni Mormon, ug pag-andam sa pag-organisar sa Simbahan ni Jesukristo.

Pagbasa pa og dugang mahitungod sa mga panghitabo nga nahitabo sa Panimalay ni Joseph ug Emma Smith sa Mga Santos Volume 1, Kapitulo 5.

Unsa ang Mapaabot

Ang Panimalay ni Joseph ug Emma Smith kabahin sa giniyahan nga paglibot nga anaa sa Dapit sa Pagpahiuli sa Pagkapari. Ang paglibot kinahanglang molungtad sa mga 30 minutos ug modala nimo ngadto sa duha ka nag-unang mga lawak sa balay. Ang mga paglibot magsugod diha sa Sentro sa mga Bisita.

360° nga Pag-aninaw sa Tibuok Palibot