Ang Basahon ni Mormon

Niadtong 1820, usa ka batang lalaki nga ginganlan og Joseph Smith miadto sa kakahoyan duol sa iyang panimalay ug nag-ampo alang sa kamatuoran ni Kristo. Niadtong 1830, nagbarog siya sa usa ka printahanan sa Palmyra, New York, ug naggunit sa resulta niana nga kamatuoran sa iyang mga kamot. Bisan og ang distansya tali sa panimalay sa mga Smith ug sa printahanan ni Grandin dili kaayo layo, ang 10 ka tuig nga panaw tali sa Unang Panan-awon ni Joseph Smith ug ang pag-imprinta sa unang edisyon sa Basahon ni Mormon daghan kaayo og nahimo.

Ang pagpili ni Joseph nga mosunod sa unsay gisulti sa Dios kaniya diha sa panan-awon nagpasabot nga dili moapil sa bisan unsa nga mga simbahan sa iyang palibot. Kadto naghimo kaniya nga nawad-an og pipila ka tigtudlo [mentor] ug mga higala. Isip usa ka bata “nga linghod pa ang edad” sa usa ka bag-ong lungsod, gibati niya ang ilang pagkawala. Sulod sa mga tuig wala siyay espirituhanon nga panimalay.

Gipasagdan nga mangita sa kaugalingon niyang mga higala ug dalan, siya usahay naglisod sa pagtuman sa iyang mas dako nga katuyoan. Sa misunod nga tulo ka tuig, kanunay siyang “mibati og panghimaraot” tungod sa iyang “kahuyang ug mga kasaypanan.” Sa unsang paagi ang usa ka tawo mobati og labihan nga gugma sa Dios ug sa gihapon makahimo og sayop?

Usa ka gabii sa Septiyembre 1823, nagsugod sa pag-ampo si Joseph. “Naghinulsol ko sa kinasingkasing sa akong tanang mga sala,” nahinumdom si Joseph, “ug nagpaubos sa akong kaugalingon sa Iyang atubangan kansang mga mata anaa sa tanang mga butang.” Ug dayon, sa makausa, siya nakakita og sanag nga kahayag.

Diha sa kahayag nagtindog ang anghel gikan sa langit kinsa misulti nga ang iyang ngalan mao si Moroni. Siya sa makausa nakapuyo sa kalibotan isip ang kataposang propeta sa karaang katawhan sa Amerika. Kini, kabahin, sa ilang nakalimtan nga mga rekord, miingon siya, nga si Joseph makakaplag sa “kahingpitan sa walay kataposan nga Ebanghelyo” nga gisaad sa Ginoo kaniya.  

Ang tahas nga mailhan kining karaang buhat mahimong lisod. Si Moroni mipasidaan sa personal nga katuyoan sa paggamit sa mga palid. Si Joseph masaligan lamang sa bulawang mga palid diin nakakulit niini ang mga talaan kon ang iyang kasingkasing nakatutok lamang sa buhat sa Dios.

Gikan ni Moroni nahibaloan ni Joseph diin gilubong ang mga rekord diha sa duol nga bungtod. Mibati siya og kasegurohan “nga iyang masunod ang matag sugo nga ihatag kaniya” samtang nagpadulong siya sa pagpangita sa maong dapit. Gikuha niya ang dakong bato nga nag-abli sa usa ka kahon nga hinimo sa binuak nga bato. Didto ang mga palid, sama sa gihulagway ni Moroni. Human nga makuha kini, “ang hunahuna misulod sa iyang alimpatakan nga basin aduna pay butang diha sa kahon” nga iyang ikabaligya nga dili makasupak sa iyang saad. Tungod niana nga hunahuna, si Moroni nagpakita ug misulti kaniya sa paghulat og usa pa ka tuig sa dili pa mobalik alang sa mga rekord.

Matag Septiyembre alang sa sunod nga upat ka tuig, si Joseph miadto sa bungtod. Samtang ang iyang pamilya “midoble sa [ilang] kakugi sa pag-ampo” alang sa iyaha, nakigkita siya ni Moroni ug nagtrabaho aron sa pag-andam sa iyang kaugalingon ug sa pagputli sa iyang mga motibo. Igo ba kaha ang iyang mga paningkamot?

Ang dugay nang gihulat nga higayon sa kataposan miabot. Nanghulam sa kalesa gikan sa usa ka suod nga higala sa pamilya nga ginganlan og Joseph Knight, si Joseph ug ang iyang bag-ong asawa, nga si Emma, miadto dayon sa bungtod pipila ka gutlo ang milabay human sa tungang gabii niadtong Septiyembre 22, 1827, ug nakuha ang mga palid sa kataposan.

Sa ulahing katuigan, si Joseph kanunay nga bugalbugalan ug lutoson niadtong wala motuo nga tinuod ang iyang mga kasinatian. Ang iyang unang mga problema, bisan pa, mao ang pipila niya ka karaang mga higala kinsa hingpit nga nagtuo nga aduna siyay bulawan nga mga palid. Wala kaayo sila magpakabana sa espirituhanon nga bili niini kaysa kantidad niini.

Sa tinglarag sa 1827, daghang mga pagsulay ang gihimo sa pagkawat sa mga palid. Aron sa pagprotekta niini, nakakita si Joseph og tagoanang mga dapit sa sulod ug palibot sa panimalay sa pamilya.

• Ang mga palid usahay isulod sa lainlaing mga kahon lakip sa kahoy nga kahon nga kanhi sudlanan sa pagpadala og mga bentana nga bildo ug usa ka hinimo nga kahon nga alang lamang gayod sa mga palid.
• Sa usa ka higayon, gilubong ni Joseph ang mga palid ilalom sa salog sa halingan sa sala ug mainampingong gibutang og balik ang mga bika.
• Dayon, gitagoan ni Joseph ang mga palid sa lawak sa atop sa buhatanan og mga baril.
• Usa ka gabii sa dihang ang balay gilungkab, gihatag ni Joseph ang mga palid ngadto sa iyang mga igsoong babaye nga sila si Sophronia ug Katharine aron tagoan sa ilang mga higdaanan.

Sila si Joseph ug Emma sa kataposan mibiya sa Palmyra aron moadto sa malinawon nga umahan sa pamilya ni Emma didto sa Harmony, Pennsylvania. Kadaghanan sa Basahon ni Mormon nahubad didto pinaagi sa pagpadayag ngadto ni Joseph Smith. Dili mominos pito ka tigsulat—lakip ni Emma ug sa iyang igsoong lalaki—misulat samtang si Joseph nagdiktar. Si Emma sa wala madugay mihinumdom, “Bisan og ako usa ka aktibo nga partisipante sa mga talan-awon nga nanghitabo ug diha atol sa paghubad … katingalahan ngari nako, ‘kini usa ka kahibulongan ug katingalahan,’ sama ngadto ni bisan kinsa.”

Sa hinay-hinay nga pagpadayag sa Basahon ni Mormon, nakaplagan ni Joseph Smith ang mga tubag sa pipila sa iyang mga pangutana nga nakadala kaniya ngadto sa Sagradong Kakahoyan isip usa ka 14 anyos nga batan-on nga lalaki. Daghang tawo nga duol sa maong proseso natandog sa mensahe sa basahon ug mahinamong naghulat sa pagbag-o sa daang mga pakigsaad ug sa pagpahiuli sa Simbahan ni Kristo.

Sa samang higayon, ang oposisyon sa proyekto nagkagrabe. Mibalhin si Joseph gikan sa iyang panimalay sa Pennsylvania ngadto sa Umahan sa mga Whitmer sa Fayette, New York aron sa pagkompleto sa paghubad sa rekord.

Ang pipila ka silingan miisip sa milagroso nga istorya sa gigikanan niini isip tuo-tuo; ang uban nagtan-aw sa pangangkon sa bag-ong kasulatan nga usa ka panamastamas. Apan ang mga tigsuporta andam nga mohatag sa ilang oras ug kapanguhaan aron makita nga magpadayon ang buhat. Samtang hapit na makompleto ang manuskrito, onse ka tawo ang mipamatuod pinaagi sa sulat nga nakakita sila sa bulawang mga palid, nagdugang sa pagkabalido sa kaugalingong pagpamatuod ni Joseph Smith.

Dihang andam na ang manuskrito, mihangyo si Joseph Smith ni E. B. Grandin, ang nag-inusarang tig-imprinta sa Palmyra, sa pagmantala sa basahon. Sa sinugdanan midumili siya, apan iyang gikonsiderar og usab human mipasalig kaniya ang mga higala nga ang iyang tahas makita isip “usa lang ka butang sa patigayon.” Si Martin Harris, usa ka lig-on nga tumutuo sa buhat, miprenda sa usa ka bahin sa iyang umahan aron igasto sa pag-imprinta. Ang order daghan kaayo—5,000 ka kopya. Mikabat og pito ka bulan aron makompleto ang proseso sa pag-imprinta ug sa unang nahugpong [bound] nga mga basahon aron andam nga ibaligya. Ang kataposang mga kopya dili pa mahugpong ug maandam alang sa laing tuig.

Pipila ka semana human sa pagmantala sa basahon, ang gipahiuli nga Simbahan ni Jesukristo naorganisar, nagtapos sa 10 ka tuig nga paghulat ni Joseph Smith alang sa usa ka espirituhanon nga panimalay.

Ang Basahon ni Mormon gibasa na karon sa minilyon ka tawo sa labaw sa usa ka gatos ka pinulongan. Ang sama nga mga pulong nga gimantala didto sa Palmyra dul-an sa duha ka siglo na ang milabay nagtubag gihapon sa mga pangutana ug nagdala sa gahom ni Kristo ngadto sa mga kinabuhi karon.