Pagpahiuli sa Pagkapari

Niadtong Abril 5, 1829, nahuman ni Oliver Cowdery ang 150 ka milya nga biyahe latas sa estado sa New York. Sa dihang misalop na ang adlaw, nakaabot siya sa iyang destinasyon sa Harmony Township, Pennsylvania, ug nahimamat si Joseph Smith sa unang higayon.

Si Oliver naglakaw uban sa igsoong lalaki ni Joseph nga si Samuel sulod sa pipila ka adlaw agi sa ulan sa tingpamulak ug lapok aron makaabot sa gamay nga balay duol sa suba diin nagpuyo si Joseph ug ang iyang asawa, si Emma. Si Samuel nagplano nga motabang sa umahan. Si Oliver nakadungog og mga istorya bahin sa usa ka anghel ug ang karaan nga rekord nga nahisulat sa bulawan nga mga palid ug mibati nga ang Espiritu sa Dios nag-aghat kaniya sa pag-adto ug pagtabang ni Joseph nga mapahibalo ang mensahe sa basahon ngadto sa mga tawo.

Si Joseph mapasalamaton nga anaa si Oliver. Sukad nadawat ni Joseph ang mga palid niadtong Septiyembre 1827, ang iyang trabaho sa paghubad mabalda tungod sa panginahanglan nga suportahan ang iyang kaugalingon ug iyang batan-ong asawa, sa pagbalhin gikan sa Palmyra ngadto sa Harmony, ug sa pakawala sa orihinal nga manuskrito.

Duha ka adlaw lang human maabot si Oliver sa Pennsylvania, si Joseph ug Oliver misugod sa paghubad ug pagrekord sa bulawan nga mga palid ngadto sa Basahon ni Mormon. Niadtong Mayo 15, 1829, sobra sa usa ka bulan lang human nagsugod sila sa pagtrabaho nga magkauban sa paghubad, si Joseph ug Oliver naabot sa asoy sa pagbisita ni Kristo ngadto sa mga Nephita sa 3 Nephi.

Sa pagbasa niini nga asoy, nahunong sila tungod sa pagtutok sa panginahanglan nga mabunyagan pinaagi sa awtorisado nga mga sulugoon sa Dios. “Sa pagpamalandong og maayo,” misulat si Oliver sa wala madugay, “klaro kini, nga . . . walay usa nga adunay awtoridad nga gikan sa Dios nga mopahigayon sa mga ordinansa sa ebanghelyo.”¹ Sa pagkahibalo nga sila kinahanglan nga bunyagan ug nga kana nga ordinansa nagkinahanglan og awtoridad nga gikan sa Dios, sila si Joseph ug Oliver nakakaplag og mamingaw nga dapit sa duol nga kakahoyan aron mag-ampo alang sa giya gikan sa langit.

Samtang nag-ampo si Joseph ug Oliver, nakadungog sila sa tingog ni Jesukristo nga namulong og kalinaw ngadto kanila samtang ang anghel mikunsad gikan sa langit diha sa usa ka “siga” sa kahayag “ibabaw sa gakidlap-kidlap nga adlaw sa Mayo.” Gipaila sa anghel ang iyang kaugalingon nga mao si Juan Bautista ug gipatong ang iyang mga kamot ngadto sa matag usa sa ilang mga ulo:

“Diha kaninyo nga akong kauban nga mga sulugoon, sa ngalan sa Mesiyas, ako motugyan sa Pagkapari ni Aaron, nga naghupot sa mga yawe sa pagpangalagad sa mga anghel, ug sa ebanghelyo sa paghinulsol, ug sa bunyag pinaagi sa pagpaunlod alang sa kapasayloan sa mga sala” (Doktrina ug mga Pakigsaad 13).

Gipasabot ni Juan Bautista nga ang Aaronic nga Pagkapari mohatag ni Joseph ug Oliver sa gahom ngadto sa paglihok sa ngalan sa Dios sa pagbunyag sa usag usa. Iya usab nga gipasabot nga aduna pay dugang nga mga gahom sa Pagkapari nga itugyan unya aron mohatag sa gasa sa Espiritu Santo ug mopahigayon sa dugang nga mga ordinansa. Si Juan misugo ni Joseph ug Oliver sa pag-adto sa duol nga Suba sa Susquehanna ug magbunyag sa usag usa.

Human mibiya si Juan Bautista, si Joseph ug Oliver misunod sa iyang mga instruksiyon ug miadto sa Suba sa Susquehanna diin nagpuli-puli sila sa pagbunyag sa usag usa. Si Oliver ug dayon si Joseph gibunyagan, ug dihang mikawas sila sa tubig napuno sila sa espiritu sa Dios ug misugod sa pagpanagna mahitungod sa simbahan ug sa mga butang nga moabot. Sa dihang nahuman na sila sa ilang mga bunyag, mibiya sila sa suba ug mibalik ngadto sa kakahoyan diin ilang giorden ang usag usa ngadto sa Aaronic nga Pagkapari.

Sa wala madugay, ang apostoles sa Bag-ong Tugon ni Kristo nga sila si Pedro, Santiago, ug Juan mipakita kang Joseph ug Oliver mitugyan diha kanila sa Melchizedek nga Pagkapari ug miorden kanila isip apostoles. Kining bag-ong gitugyan nga mas taas nga pagkapari mihatag ni Joseph ug Oliver sa abilidad sa pagtugyan sa gasa sa Espiritu Santo ngadto sa uban human sila mabunyagan, sigon sa gisaad ni Juan Bautista.