Pag-organisar sa Simbahan ni Kristo

Niadtong Abril 6, 1830, mga napulo lang ka adlaw human ang Basahon ni Mormon unang gitanyag aron ibaligya didto sa Grandin Printshop, sila si Joseph Smith, Oliver Cowdery, ug uban pa nagpundok sa panimalay ni Peter ug Mary sa Fayette, New York, aron sa pag-organisar sa Simbahan ni Kristo.

Kini nga adlaw, nga gipaabot ni Joseph Smith ug sa iyang mga sumusunod sulod sa daghang bulan, sa kataposan miabot na.

Kapin sa usa ka tuig ang milabay, ang mga pagpadayag ug pagsangyaw ni Joseph Smith nagsugod sa pagsulti ni Joseph ug sa iyang mga sumusunod nga kinahanglan nilang mangandam alang sa pagtukod sa Simbahan ni Jesukristo.¹ Niadtong Marso 1829, sa usa ka pagpadayag ngadto ni Martin Harris, ang Ginoo mipahayag nga ”Ang Pagpamatuod sa Tulo ka Saksi” kinahanglang idugang sa Basahon ni Mormon ug nga ang pagmantala sa basahon mopahibalo “[sa] sinugdanan sa paggula ug sa pagtungha sa akong simbahan gikan sa kamingawan” (Doktrina ug mga Pakigsaad 5:14).

Pagka Hunyo, samtang ang paghubad hapit na mahuman, gidala ni Joseph sila si Oliver Cowdery, David Whitmer, ug Martin Harris sa usa ka mamingaw nga dapit sa kakahoyan sa Umahan sa mga Whitmer. Human sa pag-ampo, ang tulo ka kalalakin-an, nga karon nailhan nga ang Tulo ka Saksi, gipakitaan sa mga palid ug sa ubang mga butang nga may kalabotan sa Basahon ni Mormon. Sa ilang sinulat nga pagpamatuod, nga gilakip sa kada edisyon sa Basahon ni Mormon, ang mga saksi mipahayag nga sila nakakita og anghel sa Dios nga mipakita kanila sa mga palid ug nga sila gisugo, pinaagi “sa tingog sa Ginoo,” sa pagpamatuod niini nga mga butang (“Ang Pagpamatuod sa Tulo ka Saksi,” Basahon ni Mormon, Librarya sa Ebanghelyo).

Wala madugay, duol sa Panimalay sa Umahan sa mga Smith sa Manchester, New York, walo ka dugang pa nga mga saksi ang gipakitaan ni Joseph Smith sa mga palid.

Usab niadtong Hunyo 1829, usa ka pagpadayag ang mimando ni Oliver Cowder nga “mosalig niana nga mga butang nga nahisulat,” labi na kadtong mga bahin sa Basahon ni Mormon nga naghisgot sa simbahan tali sa mga Nephita (Doktrina ug mga Pakigsaad 18:3).² Agig tubag, mainampingong girebyo ni Oliver ang manuskrito sa Basahon ni Mormon ug miipon og usa ka dokumento nga iyang gitawag og “Usa ka sugo gikan sa Dios ngadto kang Oliver kon unsaon niya pagtukod sa iyang Simbahan ug sa pamaagi niini.” Kini nga dokumento, sa kataposan ginganlan pag-usab og “Mga Artikulo sa Simbahan ni Kristo,” nga naglatid og usa ka gobyerno sa simbahan nga sa kadaghanan gibase sa simbahan sa Nephita.³ Ang ginganlan og usab nga dokumento, nga sa kataposan giusab ni Joseph Smith isip ang “Mga Artikulo ug mga Pakigsaad sa Simbahan ni Kristo” (Doktrina ug mga Pakigsaad 20, heading sa seksiyon), gihunong dihang ang laing pagpadayag “nagtudlo namo sa tukma nga adlaw nga . . . kami mopadayon sa pag-organisar sa Simbahan [ni Kristo] pag-usab, dinhi sa yuta.”⁴ Uban sa “Mga Artikulo ug mga Pakigsaad” nga andam na, ang pagmantala na lang sa Basahon ni Mormon ang nahabilin sa wala pa maorganisar ang Simbahan.

Human mamantala ang Basahon ni Mormon niadtong Marso 26, ang miting aron maorganisar ang Simbahan gieskedyul. Bisan walay rekord sa panagtigom sa Abril 6 ang nahibilin, ubay-ubay sa mga nanambong ang nagbilin og mga asoy nga naghatag kanato og detalyadong nahitabo sa panagtigom. Human sa pambukas nga pag-ampo, si Joseph ug Oliver gipaluyohan isip ang una ug ikaduha nga mga elder sa Simbahan ug isip mga magtutudlo sa nagkapundok nga mga miyembro. Dihang napaluyohan na, nagpuli-puli si Joseph ug Oliver sa pag-orden sa usag usa isip mga elder, ang sakramento gipahigayon, ug si Joseph ug Oliver mikompirmar niadtong mga miyembro nga nabunyagan na ug mitugyan sa gasa sa Espiritu Santo ngadto kanila.

Human matapos ang mga pagkompirmar, mibarog si Joseph sa atubangan sa kongregasyon ug gidiktar ang pagpadayag nga karon makit-an sa Doktrina ug mga Pakigsaad 21. Sa dihang nadawat na ang pagpadayag, si Joseph ug Oliver mi-orden og pipila ka kalalakin-an nga anaa sa lainlaing mga katungdanan sa pagkapari, ug misunod sa “malipayon nga higayon nga gigahin sa pagsaksi ug pagbati sa among mga kaugalingon sa mga gahom ug mga panalangin sa Espiritu Santo,” misulat si Joseph Smith sa wala madugay, “gitapos namo ang miting uban sa makapahimuot nga kahibalo nga kami karon indibidwal na nga mga miyembro, ug giila sa Dios, ‘Ang Simbahan ni Jesukristo,’ giorganisar sumala sa mga sugo ug mga pagpadayag.”⁵

Tali sa Abril 6 ug Hunyo 9, si Joseph Smith ug ang uban mipahigayon og susama nga mga miting sa Manchester ug Colesville, New York, diin giorganisar nila ang dugang pa nga mga branch sa Simbahan. Niadtong Hunyo 9, 1830, atol sa unang komperensiya sa Simbahan nga gipahigayon sa Panimalay sa mga Whitmer sa Fayette, New York, ang “Mga Artikulo ug mga Pakigsaad sa Simbahan ni Kristo,” ang dokumento nga gihimo ni Oliver ug Joseph nga naglatid kon unsaon pagdumala ang Simbahan, gipresentar alang sa pag-aprobar sa boto sa mga miyembro.⁶