Bungtod sa Cumorah

Ang mga panghitabo didto sa Bungtod sa Cumorah mao ang pundasyon sa pag-establisar sa Ang Simbahan ni Jesukristo sa mga Santos sa Ulahing mga Adlaw. Pinaagi sa giya ni anghel Moroni, nakita ni Joseph Smith ang dapit diin gitago ang bulawang mga palid didto sa bungtod niadtong Septiyembre 22, 1823. Dayon nagkita si Joseph og ang anghel didto sa samang petsa sa misunod nga tulo ka tuig hangtod nga gitugotan siyang mokuha sa mga palid niadtong Septiyembre 22, 1827. Gikan niadtong mga palid, si Propeta Joseph Smith mihubad sa Basahon ni Mormon pinaagi sa gasa ug gahom sa Dios. Ang lugar naglakip og lainlaing mga agianan, ang Monumento ni Anghel Moroni, ug ang sentro alang sa mga bisita.

Bisan og komon kining nailhan isip Bungtod sa Cumorah, kini nga ngalan wala na gamita human sa mahinungdanong mga panghitabo sa 1823–1827. Sa katunga nga bahin sa ika-disinuwebe nga siglo, daghang residente sa mga Distrito sa Wayne ug Ontario ang mingalan niini og “Bungtod sa Bulawan nga Biblia” ug “Bungtod sa Mormon.” Hinoon, daghan sa unang mga miyembro sa Simbahan, lakip ang pipila sa labing suod nga mga higala ni Joseph Smith ug mga sakop sa pamilya, mitawag sa maong bungtod og “Cumorah” sa daghang higayon sa tibuok kinabuhi ni Joseph Smith. Posible kini tungod kay si Moroni, nga mao ang kataposang tagsulat sa Basahon ni Mormon ug ang anghel nga maoy nakigkita ni Joseph Smith, misulat nga iyang “itago ang talaan sa ilawom sa yuta” kon iya nang mahuman ang pagdugang og pipila sa iyang kaugalingong mga pulong (tan-awa sa Mormon 8:4, 14). Tungod kay kini nga tudling nagsunod sa asoy ni Moroni sa kataposang dakong gubat tali sa mga Nephita ug mga Lamanita, nga nahitabo sa bungtod nga gitawag og Cumorah, daghan ang nagtuo nga gilubong ni Moroni ang mga palid sa samang bungtod (tan-awa sa Mormon 8:2–4) ug unya didto usab nadawat ni Joseph ang rekord. Ang usa usab sa kataposang mga sulat ni Joseph nagpasabot sa “maayong balita gikan sa Cumorah” ug sa pagbisita ni “Moroni, nga usa ka anghel gikan sa langit” (Doktrina ug mga Pakigsaad 128:20). Samtang ang Simbahan “wala mohatag og posisyon sa piho nga hiyograpikanhong mga lokasyon sa mga hitabo sa Basahon ni Mormon sa karaang Amerika,” ang mga rekord nga gitipigan ni Joseph Smith ug sa iyang mga kauban miklaro nga kini nga bungtod mao ang dapit diin si Joseph Smith nakigkita ni Moroni ug diin si Joseph nakadawat sa mga palid nga naglangkob sa Basahon ni Mormon (tan-awa sa Gospel Topics: Book of Mormon Geography).