Ang mga Agianan ug Kalasangan sa Bungtod sa Cumorah

Sa gabii sa Septiyembre 21, 1823, unang nahimamat ni Joseph Smith ang anghel kinsa nagpaila sa iyang kaugalingon nga si Moroni. Nianang gabhiona, nakadawat usab si Joseph og usa ka panan-awon sa usa ka kahon nga bato sa duol nga bungtod diin gitipigan ang karaang rekord sa katawhan ni Moroni. Gihulagway ni Joseph sa wala madugay ang bungtod nga “may igo nga gidak-on, ug mao ang kinahabugan sa kasilinganan.”

Nailhan karon nga Bungtod sa Cumorah, kining naporma sa gleyser mao ang labing dako nga bungtod sa rehiyon. Sulod sa baynte ka tuig o labaw pa sa wala pa moabot si Joseph, ang lokal nga mga mag-uuma mipalambo sa yuta pinaagi sa pagputol sa mga kahoy aron makahimo og sibsibanan nga yuta ug pagtanom og mga tanaman sa tiilan niini. Human makompleto ni Joseph Smith ang iyang tinuig nga pagbisita sa bungtod tali sa 1823 ug 1827 ug nadawat ang mga palid, ang bungtod padayon nga gigamit alang sa agrikultura. Dul-an sa usa ka siglo human sa sagradong mga panghitabo sa mga 1820 sa dihang ang mga tigkuha og litrato unang nakakuha og mga hulagway sa bungtod, ang tumoy halos wala nay kahoy. Sa dihang gipalit sa Simbahan ang propiyedad niadtong 1928, ang lumad nga kakahoyan halos nawala na ug ginagmay nga pundok na lang ang nagpabilin diha sa usa ka kilid.

Niadtong mga 1930, si Willard ug Rebecca Bean, mga tig-atiman sa mga propyedad sa Simbahan sa maong dapit, mitanom og 65,000 ka evergreen nga nadawat gikan sa New York State Conservation Department. Uban sa tabang sa ilang pamilya, lokal nga mga miyembro ug mga misyonaryo, ug pipila ka gisuholan aron motabang, ilang gitanom ang mga evergreen ug 3,000 ka binhi giluyong gikan sa gawas sa Sagradong Kakahoyan.

Samtang nagtubo ang mga kahoy, naghimo sila og natural nga backdrop alang sa usa ka dako nga pasundayag sa makasaysayanong panghitabo nga nagsugod niadtong 1935. Tali sa 1935 ug 2019, usa ka dako nga entablado ang gitukod sa kasadpang bakilid sa bungtod ug daghang bilding nga gikinahanglan aron suportahan ang nagkalapad nga pagpasundayag sa teatro ang gidugang. Usa ka dako nga lingkoranan usab ang gihimo ug giseguro nga walay mga kahoy ang motubo duol sa entablado.

Sa pagtapos sa pasundayag sa makasaysayanong panghitabo niadtong 2020, mitungha ang ikaduhang higayon aron ipahiuli ang talan-awon. Kapin sa 20 ka bilding nga may kalabotan sa pasundayag sa makasaysayanong panghitabo, mga entablado, ug uban pang mga istruktura ang gitangtang. Agig puli niini, bag-ong mga dalan ang gihimo pinaagi sa bag-ong gitanom nga mga sibsiban sa lumad nga mga sagbot, diin ang mga kahoy nagsugod sa paggamot. Ang mga bisita nga naglakaw sa mga agianan karon, ug sa umaabot, makadiskobre sa usa ka hilom nga kalasangan.

Unsa ang Mapaabot

Adunay daghang lain-laing mga agianan gikan sa sentro alang sa mga bisita ngadto sa Bungtod sa Cumorah. Adunay mas mugbo nga mga agianan nga mga 160 ka metro nga pabalik nga biyahe nga mas tangason ug adunay pipila ka mga lakang. Aduna usab mas taas nga mga agianan nga moagi sa lasang nga mga 320 ka metro ang gilay-on nga pabalik nga biyahe. Mahimong mohangyo ang mga bisita nga moadto sa bungtod sakay sa usa ka golf cart.

360° nga Pag-aninaw sa Tibuok Palibot