Panimalay ni Peter ug Mary Whitmer

Ang umahan ni Peter ug Mary Whitmer usa sa labing mahinungdanon nga mga lokasyon sa sayo nga bahin sa kasaysayan sa Ang Simbahan ni Jesukristo sa mga Santos sa Ulahing mga Adlaw. Sila si Joseph ug Emma Smith ug Oliver Cowdery nagpuyo dinhi isip mga bisita sa Pamilya Whitmer dihang ilang gikompleto ang paghubad sa Basahon ni Mormon. Diha usab sa Umahan sa mga Whitmer nga ang tulo ka saksi gibisitahan ni anghel Moroni ug gipakita ang bulawan nga mga palid, diin daghang importante nga mga pagpadayag nadawat, ug diin ang Simbahan ni Jesukristo pormal nga naorganisar niadtong Abril 6, 1830.

Nahimamat ni Oliver Cowdery si David Whitmer niadtong 1828 samtang si David didto sa Palmyra alang sa negosyo. Ang duha nahimong managhigala samtang ilang gihisgotan ang mga hungihong sa mga pagpadayag ni Joseph Smith. Nagpabilin sila sa pagkontak sa usag usa atol sa panahon nga si Oliver nagtabang sa paghubad didto sa Harmony. Sa dihang klaro na nga si Joseph ug Oliver nagkinahanglan og mas dako nga pribasiya kay sa anaa sa Harmony aron makompleto ang paghubad, si Oliver mitawag sa iyang higala nga si David alang sa tabang. Niadtong Mayo 1829, mibiyahe si David ngadto sa Harmony diin una niyang nahimamat ang propeta ug iyang asawa. Sa mosunod nga bulan, misakay si David sa iyang karomata ngadto sa Pennsylvania ug gidala si Joseph, Emma, ug Oliver aron mopuyo uban ang iyang pamilya.

Ang pamilya Whitmer naghatag og suporta alang ni Joseph Smith sa lisod nga panahon samtang siya nagtrabaho aron sa pagtuman sa iyang propetikanhong tawag. Si Peter ug Mary Whitmer ug ang ilang pamilya mibukas sa ilang panimalay ug kinabuhi ngadto sa Propeta samtang siya nagpuyo uban kanila diha sa ilang umahan. Pipila sa mga sakop sa pamilya Whitmer nagsilbi isip mga tigsulat atol sa paghubad sa Basahon ni Mormon. Si David Whitmer usa sa tulo ka lalaki nga gipakitaan sa mga palid sa Basahon ni Mormon diha sa umahan sa usa ka anghel sa Dios, ug si Mary Whitmer nahimo usab nga saksi sa Basahon ni Mormon dihang si anghel Moroni mipakita niini ngadto kaniya atol sa pribado nga pagbisita.

Niadtong Hunyo 1829, sila si Peter ug Mary Whitmer mihangop ni Joseph Smith ug Oliver Cowdery isip mga nag-abang sa ilang panimalay. Human si Joseph natapos sa paghubad sa Basahon ni Mormon, gipakita nila ni Oliver Cowdery, David Whitmer, ug Martin Harris ang mga palid diin ang sa Basahon ni Mormon gihubad sa usa ka hilit nga lokasyon duol sa panimalay sa mga Whitmer. Ang tulo sa kaulahian misulat og pamahayag nga nagpamatuod sa katinuod sa basahon nga gimantala sa matag edisyon sa Basahon ni Mormon isip ang Pagpamatuod sa Tulo ka Saksi. Unya, ang walo pa ka saksi mipamatuod usab sa katinuod sa bulawan nga mga palid human gipakita sa Propeta kanila ang mga palid duol sa Palmyra, New York. Upat niining walo ka dugang nga mga saksi mga sakop sa pamilya Whitmer.

Pagka Abril 6, 1830, ang Simbahan ni Jesukristo pormal nga giorganisar diha sa Panimalay sa mga Whitmer. Dul-an sa 55 ka tawo—nga mibiyahe gikan sa mga lungsod sa Colesville, Manchester, ug Fayette—mipaluyo ni Joseph Smith ug Oliver Cowdery isip mga lider sa Simbahan. Pagkahuman, si Joseph ug Oliver mipanalangin ug miapud-apod sa sakramento sa Panihapon sa Ginoo ngadto sa kongregasyon ug mikompirmar og daghang tawo nga kanhi gibunyagan isip mga miyembro sa bag-ong naorganisar nga Simbahan. Sa sama nga adlaw, si Joseph mipakigbahin og pagpadayag gikan sa Dios (Doktrina ug mga Pakigsaad 21) ngadto sa nagpundok nga kongregasyon ug pipila niadtong nanambong gibunyagan sa duol nga Lanaw sa Seneca. Sa wala madugay, ang panimalay sa mga Whitmer gigamit alang sa pipila ka importanteng mga miting lakip ang unang mga komperensiya, gikan sa 1830 hangtod 1831.

Ang mga Whitmer mga sakop sa usa ka dako nga komunidad nga nagsulti og German nga milalin gikan sa sentro sa Europe ngadto sa Pennsylvania nga nangita og kagawasan sa relihiyon. Ang pamilya mibalhin ngadto sa Fayette, New York sa sayong bahin sa mga 1800 ug nahimong respetado nga mga sakop sa ilang komunidad. Niadtong Disyembre 1830, usa ka pagpadayag ang nadawat didto sa Panimalay sa mga Whitmer nga nagsugo sa Simbahan sa “pag-adto sa Ohio” (Doktrina ug mga Pakigsaad 37). Ang mosunod nga Abril, ang Pamilya Whitmer mibaligya sa ilang umahan ug mibalhin kauban ang nahibiling mga Santos ngadto sa Kirtland, Ohio.

Basaha pa og dugang ang mahitungod sa pag-organisar sa gipahiuli nga Simbahan ni Jesukristo didto sa Umahan sa mga Whitmer sa Mga Santos Volume 1, Kapitulo 8.

Unsa ang Mapaabot

Ang Panimalay nila ni Peter ug Mary Whitmer kabahin sa giniyahan nga paglibot nga gipahigayon sa mga misyonaryo didto sa Umahan sa mga Whitmer. Ang paglibot magsugod sa Sentro sa mga Bisita diin ang mga bisita makatan-aw og pasiuna sa salida ug makatan-aw og makalingaw nga mga eksibit.

360° nga Pag-aninaw sa Tibuok Palibot