Dapit sa Pagpahiuli sa Pagkapari

Ang Dapit sa Pagpahiuli sa Pagkapari sa Oakland Township, Pennsylvania, nagpakita sa makasaysayanong mga talan-awon, mga estatuwa, duha ka gitukod pag-usab nga mga balay, ug ang Sentro sa mga Bisita nga naghandom sa mga panghitabo nga nagpalibot sa paghubad sa Basahon ni Mormon ug ang pagpahiuli sa Aaronic nga Pagkapari. Ang mga bisita magkat-on mahitungod niini nga mga panghitabo pinaagi sa pagtan-aw og salida ug malingaw sa makalingaw nga mga eksibit. Giniyahan nga paglibot sa Panimalay ni Isaac ug Elizabeth Hale ug sa Panimalay ni Joseph ug Emma Smith nagsugod sa sentro sa mga bisita. Ang mga bisita gidapit usab sa pagsuhid sa nagkalain-laing dapit nga modala nila ngadto sa duol nga plantasyon sa asukar diin ang Aaronic nga pagkapari lagmit gipahiuli o sa pagbisita sa tampi sa Suba sa Susquehanna diin sila si Joseph Smith ug Oliver Cowdery gibunyagan. Ang Sementeryo sa McKune, diin gilubong ang unang anak nilang Joseph ug Emma Smith ug diin gilubong ang mga ginikanan ni Emma, tupad sa Monumento sa Pagpahiuli sa Aaronic nga Pagkapari.

Si Joseph Smith mihubad sa kadaghanan sa Basahon ni Mormon dinhi sa panimalay nga iyang gipakigbahin sa iyang asawa nga si Emma. Siya ug ang uban nagsilbing mga tigsulat ni Joseph sulod sa usa ka panahon, sa wala pa si Oliver Cowdery nahimong ang nag-unang tigsulat. Didto sa Dapit sa Pagpahiuli sa Pagkapari, aduna kay oportunidad nga molibot sa duha ka panimalay, ang Panimalay ni Isaac ug Elizabeth Hale, ug ang Panimalay ni Joseph ug Emma Smith ug magkat-on og dugang mahitungod sa panahon nga nagpuyo ang Propeta sa Harmony.

Niadtong Mayo 15, 1829, agig tubag sa pag-ampo ni Joseph ug Oliver mahitungod sa bunyag, gipadala sa Dios si Juan Bautista, kinsa mitugyan ngadto ni Joseph ug Oliver sa Aaronic nga Pagkapari. Si Joseph ug Oliver dayon nagbunyag sa usag usa sa Suba sa Susquehanna. Niadtong 1960 ang Simbahan mibutang og monumento sa dapit nga naghandom sa pagpahiuli sa Aaronic nga Pagkapari. Ang makasaysayanong talan-awon ug agianan sa paglakaw makatabang sa mga bisita nga makasabot sa dapit diin kining milagrosong mga panghitabo nahitabo.