Pagpahiuli sa Aaronic nga Pagkapari nga Agianan

Niadtong Mayo 15, 1829, si Joseph Smith ug ang iyang tigsulat nga si Oliver Cowdery “nangadto sa kakahoyan aron sa pag-ampo ug pagpangutana sa Ginoo kabahin sa bunyag alang sa paghugas sa mga sala, nga kami nakabasa diha sa gihubad [Basahon ni Mormon] nga mga palid.” Gitubag sa Dios ang ilang pag-ampo pinaagi sa pagpadala og anghel nga mensahero: Juan Bautista, nga mibunyag ni Jesukristo. “Diha kaninyo akong kauban nga mga sulugoon, sa ngalan sa Mesiyas,” miingon si Juan human gipandong ang iyang kamot sa ilang mga ulo, “ako motugyan sa Pagkapari ni Aaron.”

Gipasabot ni Juan nga kining Aaronic nga Pagkapari naghupot “sa mga yawe . . . sa ebanghelyo sa paghinulsol, ug sa bunyag pinaagi sa pagpaunlod alang sa kapasayloan sa mga sala.” Siya usab misaad nga ang laing pagkapari, nga dunay “gahom sa pagpandong sa mga kamot alang sa gasa sa Espiritu Santo,” mahimong ihatag unya. Human si Joseph ug Oliver gihatagan sa Aaronic nga Pagkapari, gisugo sila ni Juan sa pagbunyag sa usag usa didto sa duol sa Suba sa Susquehanna.

Samtang ang eksaktong dapit diin si Juan Bautista mipakita ngadto ni Joseph ug Oliver wala mahibaloi, usa ka dalan nga nagsugod sa amihanang kasadpan nga eskina sa Sentro sa mga Bisita padulong ngadto sa malinawon nga kakahoyan sa maple, sama sa lokasyon nga gihulagway sa makasaysayanong mga rekord. Aron mapreserbar ang kasagrado ug kanindot niini nga kakahoyan, ang mga bisita gihangyo nga magpabilin diha sa gimarkahan nga mga agianan, respetohan ang natural nga puy-anan, ug maghunghong kon mag-istorya.

Unsa ang Mapaabot

Ang mga agianan dili kabahin sa giniyahan nga paglibot nga gihatag sa Dapit sa Pagpahiuli sa Pagkapari. Mobati nga gawasnon sa pagsuhid niini sa imong kaugalingon. Adunay tulo ka agianan nga nagporma og likong [loop] sa palibot sa lugar. Ang labing taas nga agianan mga 0.11 ka milya, ug ang labing mubo nga agianan mga 0.03 ka milya. Ang mubo nga agianan gilinyahan og may kasayoran nga karatola.

360° nga Pag-aninaw sa Tibuok Palibot