Panimalay ni Isaac ug Elizabeth Hale

Ang panimalay ni Isaac ug Elizabeth Hale mao ang panimalay sa mga ginikanan ni Emma Hale Smith. Mga 1810, sa dihang si Emma mga sais anyos pa, ang pamilya Hale mibalhin gikan sa troso nga balay diin siya natawo ngadto niining maanindot nga panimalay. Didto siya nagpuyo dihang una niyang nahimamat si Joseph Smith Jr.

Niadtong 1790, si Isaac ug Elizabeth Hale nanimuyo sa Harmony, Pennsylvania, diin si Isaac mipalit og 40.47 ka ektarya nga umahan. Sa misunod nga 20 ka tuig, ang pamilya Hale nagtrabaho aron sa pagpalambo sa ilang umahan (nga mitubo ngadto sa 60.70 ka ektarya), nagtukod og gamay nga balay nga hinimo sa troso, ug mitukod og pinuy-anan sa kamingawan sa Pennsylvania. Nagtukod usab si Isaac og negosyo nga makaginansya isip usa ka mangangayam, namaligya og ihalas ug mga produkto nga panit sa ubos sa suba. Nagputol usab siya og tabla, nagpasibsib og mga karnero, ug nagbangag sa mga punoan sa maple aron himoong maple syrup ug asukar. Si Elizabeth nanganak og lima ka anak nga lalaki ug upat ka babaye niadtong sayong katuigan. Mga 1810, ang pamilya Hale mibalhin ngadto sa duha ka andana nga balay nga bag-ohay lang nahuman duol sa ilang balay nga troso. Ang kasamtangan nga balay kay gitukod pag-usab sa orihinal nga panimalay sa Pamilya Hale diha sa dapit diin nagtindog ang balay kaniadto.

Unang nahimamat ni Joseph Smith Jr. ang pamilya Hale niadtong Oktubre 1825 dihang siya ug ang iyang amahan gisuholan ni Josiah Stowell aron motabang sa pagkalot og pilak sa dapit. Gitugotan ni Isaac Hale ang mga trabahante ni Josiah Stowell nga moabang sa karaang balay nga troso diha sa iyang propyedad sulod sa tulo ka semana. Niining panahona, unang nahimamat ni Joseph ug nagsugod sa pagpangulitawo sa anak nga babaye ni Isaac Hale nga si Emma. Atol sa misunod nga panahon, gitanyagan ni Josiah Stowell si Joseph Smith Jr. og laing trabaho sa iyang umahan duol sa Colesville, New York, aron tugotan si Joseph ug Emma nga magpadayon sa ilang pag-uyab. Ang duha naminyo niadtong Enero 1827.

Human sila maminyo, sila unang nanimuyo sa pamilya ni Joseph sa Manchester, New York. Wala madugay human nadawat ni Joseph ang bulawan nga mga palid, siya ug si Emma mibalhin ngadto sa Harmony diin sa kataposan sila nakapalit og balay gikan sa pamilya ni Emma.

Basaha og dugang ang mahitungod sa panahon ni Joseph sa Panimalay sa mga Hale sa Mga Santos Volume 1, Kapitulo 4.

Unsa ang Mapaabot

Ang Panimalay ni Isaac ug Elizabeth Hale kabahin sa giniyahan nga paglibot nga anaa sa Dapit sa Pagpahiuli sa Pagkapari. Ang mga paglibot magsugod diha sa Sentro sa mga Bisita. Atol sa paglibot inyong masuhid ang kusina, parlor, ug mga lawak katulgan.

360° nga Pag-aninaw sa Tibuok Palibot