Umahan nila ni Isaac ug Lucy Morley

Si Isaac Morley usa sa labing una nga lumulupyo sa Kirtland, Ohio. Siya ug ang iyang asawa, si Lucy, nagpadagan og dako nga 32 ka ektarya nga umahan, nga ilang giablihan ngadto sa mga miyembro sa usa ka komunidad nga nagtinguha sa Simbahan ni Kristo nga gilatid diha sa Bag-ong Tugon.

Si Isaac ug iyang pamilya mipasakop sa Simbahan dihang ang mga misyonaryo miagi sa ilang lugar, ug daghang ubang miyembro sa ilang komunidad ang mipasakop usab. Ang dakong umahan sa mga Morley nahimong dili lang usa ka pundokanan nga dapit apan usa usab ka dapit sa pagpadayag ug dangpanan alang ni Joseph Smith.

Human mipasakop sa Simbahan, ang mga Morley mitanyag sa pagpapuyo sa daghang Santos kinsa mibalhin sa maong dapit, samtang nagtukod usab og panimalay alang ni Joseph ug Emma Smith. Bisan si Joseph ug Emma Smith nagpuyo niini nga panimalay sulod lang sa pipila ka bulan—gikan sa Marso hangtod sa Septiyembre 1831—kini usa ka dapit sa pagpadayag.

Samtang nagpuyo dinhi, si Joseph nakadawat og 13 ka pagpadayag nga karon nakarekord sa Doktrina ug mga Pakigsaad. Sa usa ka gamay nga eskwelahan diha sa propyedad, si Joseph Smith nanagna sa usa ka grupo sa mga lalaki mahitungod sa paglambo sa Ang Simbahan ni Jesukristo sa mga Santos sa Ulahing mga Adlaw. Nianang sama nga pagpundok, 23 ka lalaki, lakip si Joseph Smith mismo, ang gi-orden nga mga high priest.

Karon usa ka gamay nga porsiyon sa yuta bukas ngadto sa publiko. Ang panimalay nga karon nagbarog sa propyedad dili bukas ngadto sa publiko, ug kini dili ang panimalay diin ang mga Morley o mga Smith nagpuyo. Hinuon, ang mga bisita makalakaw og mubo nga patungas nga agianan padulong kon asa nahimutang ang eskwelahan.

Magbasa pa og dugang mahitungod sa Umahan sa mga Morley sa Mga Santos, vol. 1, mga kapitulo 10 ug 11.

Unsay Malaoman

Ang Umahan sa mga Morley usa ka kasinatian sa kinaugalingon nga paggiya diin pwede nimong masuhid ang mga nataran sa propyedad.