Panimalay nila ni John ug Elsa Johnson

Ang Panimalay nila ni John ug Elsa Johnson sa Hiram, Ohio, mao ang panimalay sa pamilya Johnson, dako ug prominente nga pamilya sa Distrito sa Portage, Ohio. Niadtong 1818, si John ug si Alice “Elsa” Johnson unang mibalhin uban sa walo nila ka anak (nag-edad og 2 ngadto sa 17) ngadto sa Ohio gikan sa Vermont. Mipalit sila og 40.4 ka ektarya sa bag-ong natukod nga Western Reserve duol sa Lungsod sa Hiram, gibanabana nga 50 ka milya padulong sa habagatang silangan sa Cleveland. Pagka 1831, dihang miabot sa Pamilya Johnson ang balita mahitungod sa pag-abot sa mga Santos sa Ulahing mga Adlaw sa maong dapit, ang ilang uma mitubo nga ngadto sa 105 ka ektarya ug naglakip sa malamboon nga mga umahan, sibsiban, ug mga gatasan.

Ang mga Johnson tinahod kaayo sa mga miyembro sa komunidad sa Hiram ug aktibo nga mga miyembro sa lokal nga kongregasyon sa Methodist nga gipangulohan ni Ezra Booth. Sa Pebrero 1831, samtang nagbisita sa Kirtland, ang 19 anyos nga anak sa mga Johnson, si Lyman, mitambong og pipila ka miting diin nagsangyaw ang mga Santos sa Ulahing mga Adlaw nga mga misyonaryo. Nakombinser sa kamatuoran sa ebanghelyo, si Lyman nagpabunyag sa wala madugay. Nabalaka sa ilang nakita nga kalit-kalit nga desisyon, si John ug si Elsa nangayo og tambag sa ilang ministro, si Ezra Booth. Nakakuha si Booth og kopya sa Basahon ni Mormon, ug ang tulo “nagtukaw sa tibuok gabii sa pagbasa niini.”¹ Samtang nagbasa sila, nakombinser si Elsa nga dili lamang tinuod ang basahon, apan nga si Joseph Smith makaayo sa iyang makapaluya nga rayoma. Sa wala madugay, ang mga Johnson, si Booth, ug ang doktor sa pamilya Johnson mibiyahe padulong sa Kirtland, diin nahimamat nila si Joseph Smith sa panimalay nila ni Newel ug Elizabeth Ann Whitney. Atol niini nga paghimamat, mihangyo si Elsa nga ayohon siya ni Joseph. “Ikaw ba nagatuo nga makahimo ang Ginoo nako nga instrumento sa pag-ayo sa imong kamot?” Gipangutana siya ni Joseph. Nagsulti nga nagatuo siya, gitugotan ni Elsa sa Joseph Smith nga mogunit sa iyang kamot. Giyukbo niya ang iyang ulo sa hilom nga pag-ampo, dayon iyang gipahayag nga maayo ang iyang kamot. Naayo siya.²

Sa wala madugay, nagpabunyag sila si John ug Elsa. Ang mga Johnson nahimong suod nga mga higala ug magtatabang sa propeta ug, niadtong Septiyembre 1831, midapit nila ni Joseph ug Emma Smith nga mopuyo sa ilang balay. Atol sa tuig nga si Joseph ug si Emma nagpuyo sa Hiram, nakadawat si Joseph og ubay-ubay nga gidaghanon sa mga pagpadayag, lakip sa desisayis nga girekord karon diha sa Doktrina ug mga Pakigsaad. Atol sa duha ka semana nga komperensiya sa daghang elder nga gipahigayon didto sa Panimalay sa mga Johnson sa ulahing bahin sa 1831, gihimo ang desisyon sa pagmantala sa mga pagpadayag ni Joseph Smith.

Atol sa iyang panahon didto sa Hiram, mipadayon usab si Joseph Smith sa pagtrabaho sa iyang rebisyon nga hubad sa Biblia. Kini nga buluhaton mao ang nagdasig sa daghang pagpadayag nga iyang nadawat atol niining panahona. Niadtong Pebrero 1832, samtang naghubad sa Ebanghelyo ni Juan, si Joseph Smith ug si Sidney Rigdon nakakita sa Dios nga Amahan ug ni Jesukristo ug nakakat-on mahitungod sa lainlaing mga gingharian sa himaya nga mapanunod sa katawhan human nga sila mabanhaw (tan-awa sa Doktrina ug mga Pakigsaad 76).

Pagka Sabado, Marso 24, 1832, usa ka pundok sa manggugubot nga gilangkoban sa mga sakop sa lokal nga milisya mipugos og sulod sa panimalay sa mga Johnson ug mibira ni Joseph gikan sa iyang higdaanan. Dihang nabira na siya sa gawas, gidala nila siya ngadto sa balilihan nga may igong gilay-on diin siya ug si Sidney Rigdon gikaligo og alkitran ug gipapitlan og balhibo. Human sa pag-uli ni Joseph sa balay nga nagsampiray, gitambalan ni Emma ang iyang mga samad ug gilimpyohan ang alkitran ug mga balhibo gikan sa iyang panit. Pagkasunod adlaw, mitambong si Joseph sa naandan nga mga serbisyo sa Igpapahulay. “[Samtang] ang akong lawas napuno sa kinawrasan” ug bun-og, si Joseph miasoy, “sa gihapon ako nagsermon ngadto sa kongregasyon sama sa naandan, ug nianang pagkahapon sa maong adlaw nagbunyag og tulo ka tawo”³

Ang Panimalay sa mga Johnson napahiuli na ug mahimong adtoon alang sa libre nga mga paglibot.

Mobasa pa og dugang mahitungod sa Panimalay sa mga Johnson diha sa kapitulo 14 sa Mga Santos, Volume 1.

---

1. Marinda Johnson Hyde segun sa gikutlo diha sa Edward Tullidge, Women of Mormondom (1877), 403.
2. Gibase sa Philo Dibble, “Philo Dibble’s Narrative,” sa Early Scenes in Church History (1882), 79.
3. Joseph Smith, History, 1838–1856, volume A-1, p. 208. www.josephsmithhistory.org.

360° nga Pag-aninaw sa Tibuok Palibot

Unsay Malaoman

Ang Panimalay nila ni Peter ug Mary Whitmer kabahin sa giniyahan nga paglibot nga ipahigayon sa mga misyonaryo.